قازاقستاننىڭ چەح رەسپۋبليكاسىنداعى ەلشىسى سەرجان ءابدىكارىموۆ چەح رەسپۋبليكاسىنىڭ پرەزيدەنتى ميلوش زەمانعا سەنىم گراموتاسىن تاپسىردى.
سالتاناتتى راسىمنەن كەيىن م.زەماننىڭ 2014 جىلى قاراشادا قازاقستان رەسپۋبليكاسىنا رەسمي ساپارى شەڭبەرىندە قول جەتكىزىلگەن ۋاعدالاستىقتار بويىنشا ەكىجاقتى كەلىسىمدەردىڭ ىسكە اسىرىلۋى تالقىلاندى. چەحيا پرەزيدەنتى ەلباسى ن.ءا.نازارباەۆقا ءوزىنىڭ جىلى سالەمىن جولدادى. ەلشى قازاقستان چەحيامەن قارىم-قاتىناستاردى جان-جاقتى دامىتۋعا زور كوڭىل ءبولىپ, ورتالىق ەۋروپاداعى ماڭىزدى سەرىكتەسى رەتىندە باعالايتىنىن ايتتى. ول چەحيا باسشىسىن قازاقستاننىڭ «نۇرلى جول» باعدارلاماسى نەگىزىندە الەۋمەتتىك-ەكونوميكالىق جانە ساياسي-قوعامدىق دامۋ قارقىنى, ەلباسىنىڭ بەس ينستيتۋتتىق رەفورماسى, قازاق حاندىعىنىڭ 550 جىلدىعى مەن الەمدىك جانە ءداستۇرلى دىندەر كوشباسشىلارىنىڭ V سەزى تۋرالى حاباردار ەتتى. ديپلومات رەسمي استانانىڭ پراگامەن ءوزارا ءتيىمدى ەكىجاقتى جانە كوپجاقتى پىشىمدە سونىمەن قاتار, ەۋرازيالىق ەكونوميكالىق وداق پەن ەۋروپالىق وداق اراسىنداعى ۇنقاتىسۋدى دامىتۋعا دايىن ەكەنىن اتاپ ءوتتى. م.زەمان قازاقستاننىڭ ساياسي جانە الەۋمەتتىك-ەكونوميكالىق جاڭعىرتۋ جولىنداعى جەتىستىكتەرىن, ايماقتىق جانە حالىقارالىق قاۋىپسىزدىك سالاسىنا قوسقان ەلەۋلى ۇلەسىن جوعارى باعالادى. چەحيا باسشىسى ءوز مەملەكەتىنىڭ استانادا وتەتىن ەكسپو-2017 حالىقارالىق كورمەسىنە قاتىسۋ نيەتىن راستادى. چەحيا پرەزيدەنتى ەلشىنى رەسمي تاعايىندالۋىمەن قۇتتىقتاپ, الداعى ەكى ەل يگىلىگىنە باعىتتالعان قىزمەتىنە تابىس تىلەدى.
«ەگەمەن-اقپارات».