بيىلعى جىلعى VIII استانا ەكونوميكالىق فورۋمىنىڭ اياسىندا 22 مامىردا «استانا ەكسپو-2017» ۇق» اق-تىڭ «ەكسپو-2017 – تۇراقتى دامۋ ءۇشىن ەنەرگيا» تاقىرىبىنداعى پانەلدىك سەسسياسى وتەدى. وعان جەتى حالىقارالىق ساراپشىلار مەن وتاندىق عالىمدار جانە مەملەكەتتىك ورگانداردىڭ وكىلدەرى, سونداي-اق, ەلىمىزدىڭ دامۋ ينستيتۋتتارى, بيزنەس وكىلدەرى قاتىسادى.
بۇل جونىندە پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا «استانا ەكسپو-2017» ۇك» اق باسقارۋشى ديرەكتورى سالتانات راحىمبەكوۆا مالىمدەدى. ونىڭ ايتۋى بويىنشا, ءبىزدىڭ قازاقستان مەملەكەتى ەكسپو-2017 كورمەسىن وتكىزەتىن ەل بولىپ تاعايىندالعالى بەرى 2013 جىلدان باستاپ ءداستۇرلى تۇردە اەف باعدارلاماسى مەن G-Global الاڭىندا «بولاشاق ەنەرگياسى» تالقىلانىپ كەلەدى. سونداي-اق, اتالعان كورمەنىڭ ءمانى «ەكسپو-2017 – «تۇراقتى دامۋ ءۇشىن ەنەرگيا» جانە «ەنەرگيا تيىمدىلىك – «جاسىل» تەحنولوگيالار مەن تومەنگى كومىرتەكتى ەكونوميكانىڭ نەگىزى» اتتى ەكى پانەلدىك سەسسياسىنىڭ بارىسىندا اشىلاتىنىن ايتتى.
سونىمەن قاتار, استانا ەكونوميكالىق فورۋمى بارىسىندا ەكسپو-2017 حالىقارالىق كورمەسىن العا جىلجىتۋدى ناسيحاتتاۋ بەلسەندى ءجۇرىپ جاتىر, دەي كەلە اتالعان پانەلدىك سەسسياعا قاتىسۋعا نيەت بىلدىرگەندەردىڭ كوپ ەكەندىگىن اتاپ ايتتى.
جانە دە ول ۇستىمىزدەگى جىلعى VIII اەف-تە «استانا ەكسپو-2017» ۇك» اق-تىڭ قازاقستاننىڭ دامۋ ينستيتۋتتارىمەن جانە قوعامدىق ۇيىمدارىمەن بىرلەسە جۇزەگە اسىرىپ وتىرعان «ۆيرتۋالدى ەكسپو-2017» جوباسىنىڭ تانىستىرىلىمى وتەتىندىگىن, اتالعان جاڭالىقتىڭ يگى باستاما ەكەندىگىن جەتكىزدى. جاڭا كومپونەنتتەرمەن تولىعىپ وتىرعان جوبانىڭ ەرەكشەلىكتەرىن اتاپ وتكەن س.راحىمبەكوۆا اتالعان جوبانىڭ «جاسىل» تەحنولوگيالار مەن يننوۆاتسيالار, «Online EXPO-2017» رەسپۋبليكالىق بايقاۋى, ەكسپو-نىڭ ۆيرتۋالدى فورۋمىنان تۇراتىندىعىن كولدەنەڭ تارتتى.
ەلميرا ماتىباەۆا,
«ەگەمەن قازاقستان».