الماتى. 20 مامىر. ءتارتىپ ساقشىلارى قالانى دۇرلىكتىرگەن پەدوفيلدى تۇتقىندادى. الماتى قالالىق ىشكى ىستەر دەپارتامەنتى ءباسپاسوز قىزمەتىنىڭ جەتەكشىسى سالتانات ازىربەك ۇستالعان ازاماتتىڭ 1963 جىلى تۋعان وسى قالانىڭ تۇرعىنى ەكەنىن مالىمدەدى. بۇل تۋرالى tengrinews.kz حابارلادى.
بۇدان بىرنەشە كۇن بۇرىن ورتا جاستان اسقان ءبىر ەر ازاماتتىڭ ءبۇلدىرشىن قىزبەن كوپ قاباتتى ءۇيدىڭ اۋىزعى ەسىگىنەن بىرگە كىرىپ, ودان سوڭ قالتارىستا ءوزىنىڭ شالبارىنىڭ سىرماعىن اعىتقانى تۋرالى الەۋمەتتىك جەلىدە سالىنعان ۆيدەروليك بارشا قاۋىمنىڭ جاعاسىن ۇستاتقان. وعاش كورىنىس ۇيگە كىرە-بەرىس ەسىكتەگى ورناتىلعان ۆيدەوباقىلاۋ تاسپاسىنا تولىقتاي جازىلىپ قالعان. كوپ كەشىكپەي وقيعانىڭ رادوستوۆەتس كوشەسىندەگى كوپ قاباتتى تۇرعىن ۇيلەردىڭ بىرىندە بولعانى انىقتالدى.
الماتى قالاسى بوستاندىق اۋدانىنىڭ كريمينالدى پوليتسياسى جەدەل ىسكە كىرىستى. پوليتسيانىڭ جاپپاي ىزدەستىرۋ شارالارىنان حاباردار بولعان اۋدان تۇرعىندارىنىڭ ءبىرى بولىمشەگە كەلىپ, ون جاسار قىزىنا الدەكىمنىڭ ۆيدەروليكتەگىدەي زورلىق جاساعانىن باياندادى. تەز ارادا جينالعان مالىمەتتەر پەدوفيل-قىلمىسكەردىڭ 40-45 جاستار شاماسىنداعى ورتا بويلى, ەۋروپالىق ناسىلدەگى ازامات ەكەندىگىن ايعاقتاپ تا بەردى.
ارادا كوپ ۋاقىت وتپەي, جەدەل دە مۇقيات ءىس اتقارعان الماتى پوليتسياسى پەدوفيلدىڭ قولىنا كىسەن سالىپ, تەرگەۋ يزولياتورىنا اكەلىپ قامادى.
تالعات ءسۇيىنباي.
دەرەك, سۋرەت: tengrinews.kz.