استانا. 25 تامىز. جاقىندا امەريكادا ۇسىنىلعان «قار ادامى» تۋرالى ۆيدەو الەۋمەتتىك جەلىنى پايدالانۋشىلار اراسىندا ۇلكەن پىكىرتالاس تۋعىزدى. بۇل تۋرالى Yahoo News حابارلادى.
قۇرلىقتا «بيگفۋت» دەگەن ات العان ميفتىك تىرشىلىك يەسى كاليفورنيا شتاتىنداعى بلافف-كريك دەگەن جەردە تۇسىرىلگەن ەكەن. روليك اۆتورى م.دەۆيس ونى 2008 جىلى تۇسىرگەنىن ايتادى. بىراق جەلىدە وسىدان بىرنەشە كۇن بۇرىن عانا جىبەرىلگەن. وپەراتوردىڭ ويىنشا, ول بۇتالار اراسىندا وتىرعان يەتيدى, ياعني «قار ادامىن» ءتۇسىرىپ ۇلگەرگەن.
«كۇن قاراڭعى ەدى. مەن سوندا دا وزىمنەن بىرنەشە مەتر جەردە وزگەشە تىرشىلىك يەسىن كورىپ تۇرعانىما كۇدىكتەنە المادىم, - دەيدى ول. – مەن تابيعات كورىنىستەرىن ءتۇسىرىپ ءجۇر ەدىم. سوسىن تۇسىرىلگەن ماتەريالدى قاراسام, وندا جىلجىپ بارا جاتقان ۇلكەن اق تۇلعانى كوردىم».
دەۆيس سونداي-اق ءتۇسىرىلىم جاسالعان جەرگە جاقىن ماڭدا دەنەسى بولشەكتەنىپ تاستالعان بۇعىنى كورگەنىن دە ايتادى. دەگەنمەن, بۇل روليكتەن پايدالانۋشىلاردىڭ بارلىعى بىردەي «قار ادامىن» كورە الماعان. كوپ كىسى مۇنى الدەقانداي ءبىر ءتۇسىرىلىمنىڭ مونتاجى دەپ تە ەسەپتەيدى. تاعى بىرەۋلەر كادرعا ادام تەكتەس مايمىل ءتۇسىپ كەتكەن دەگەن ويدا. وسىنىڭ ءبارى قازىر تالاس تۋعىزىپ جاتىر.
تالعات رايىمبەك.
https://youtu.be/uRWbrybYMo4