اقوردادا مەملەكەتتىك حاتشى گۇلشارا ابدىقالىقوۆا ەلىمىزدە ميسسياسىن اياقتاعان ەۋروپالىق وداق وكىلدىگىنىڭ باسشىسى, ەلشى اۋرەليا بۋشەزبەن كەزدەستى.
كەزدەسۋ بارىسىندا مەملەكەتتىك حاتشى 2011 جىلدان بەرى ەو-نىڭ ەلىمىزدەگى وكىلدىگىنىڭ باسشىلىعىن اتقارعان اۋرەليا بۋشەزگە ەكىجاقتى قارىم-قاتىناستى كەڭەيتۋدەگى اۋقىمدى جۇمىسىنا جانە قازاقستان مەن ەو اراسىنداعى كەلىسسوزدەر ۇدەرىسىن دامىتۋعا قوسقان جەكە ۇلەسى ءۇشىن العىس ءبىلدىردى. «ءسىز جۇمىس اتقارعان كەزەڭدە ەكىجاقتى قارىم-قاتىناستاردىڭ بەلسەندىلىگى ارتىپ, ول جاڭا دەڭگەيگە كوتەرىلدى, قازاقستان مەن ەو اراسىندا كوپتەگەن يگىلىكتى ىستەر اتقارىلدى. ءسىزدىڭ وسى رەتتە بەيبىتشىلىكتى, دوستىقتى جانە ىنتىماقتاستىقتى نىعايتۋعا قوسقان ەڭبەگىڭىز ءۇشىن قازاقستان رەسپۋبليكاسىنىڭ قۇرمەت گراموتاسىمەن, سونداي-اق, «قازاقستان كونستيتۋتسياسىنا 20 جىل» مەرەكەلىك مەدالىمەن ماراپاتتالعانىڭىزبەن قۇتتىقتايمىن», – دەدى گ.ابدىقالىقوۆا.
وسى جىلعى 20 قاڭتاردا بريۋسسەلدە قازاقستان رەسپۋبليكاسى مەن ەۋروپالىق وداق اراسىنداعى كەڭەيتىلگەن سەرىكتەستىك جانە ىنتىماقتاستىق تۋرالى جاڭا كەلىسىمدى الدىن الا دايەكتەۋ ءوزارا ءىس-قيمىلدىڭ ماڭىزدى ناتيجەسىنە اينالدى. وعان بيىل كۇزدە قول قويىلادى دەپ جوسپارلانىپ وتىرعانىنا ءمان بەرگەن گۇلشارا ابدىقالىقوۆا سىرتقى ساياسات, الەۋمەتتىك-ەكونوميكالىق جانە مادەني-گۋمانيتارلىق سالالارداعى ءوزارا ءىس-قيمىلدىڭ جۇيەلى ءارى وڭ قارقىنى ساقتالاتىنىنا سەنىم ءبىلدىردى.
كەزدەسۋدە سونداي-اق, حالىقارالىق كۇن تارتىبىندەگى وزەكتى ماسەلەلەر مەن ەكىجاقتى ىنتىماقتاستىقتىڭ كەلەشەگى تالقىلاندى. ءوز كەزەگىندە اۋرەليا بۋشەز: «ءتورت جىل ىشىندە ەكىجاقتى قارىم-قاتىناستار نىعايىپ, ودان ءارى تەرەڭدەي ءتۇستى. بۇرىننان قالىپتاسقان بايلانىستار ەندى جاڭا دەڭگەيگە كوتەرىلەدى, وعان سەبەپ قازاقستان مەن ەۋرووداق اراسىنداعى كەڭەيتىلگەن سەرىكتەستىك پەن ىنتىماقتاستىق تۋرالى جاڭا كەلىسىم بولماق. ال وسى كەلىسىم تۋراسىنداعى كەلىسسوزدەردىڭ مەن جۇمىس اتقارعان جىلدارى جۇزەگە اسىرىلعانىنا قۋانىشتىمىن, جانە جۋىق ارادا ول كەلىسىمگە قول دا قويىلادى دەگەن ۇمىتتەمىز», – دەدى.
بۇگىنگى تاڭدا ەۋرووداق ءبىزدىڭ نەگىزگى ساۋدا جانە ينۆەستيتسيالىق سەرىكتەسىمىز بولىپ سانالادى. وتكەن جىلدىڭ قورىتىندىسى بويىنشا قازاقستاننىڭ ەو-مەن سىرتقى ساۋدا كورسەتكىشى 53 ميللياردتان استام اقش دوللارىن قۇرادى, بۇل – ءبىزدىڭ ەلىمىزدىڭ بارلىق سىرتقى ساۋدا اينالىمىنىڭ جارتىسىنان استامى. بيىلعى قاڭتار-مامىر ارالىعىندا اتالعان كورسەتكىش 13,9 ميلليارد اقش دوللارىنا جەتتى.
وتكەن 10 جىلدا قازاقستان مەن ەو اراسىنداعى تاۋار اينالىمى 13 ەسەگە, ال قازاقستان ەكونوميكاسىنا سالىنعان ەۋروپالىق ينۆەستيتسيانىڭ كولەمى 10 ەسەگە ۇلعايدى. قازاقستاننىڭ تاۋار اينالىمىنىڭ 50 پايىزى جانە شەت ەلدەردەن تارتىلعان ينۆەستيتسيانىڭ جارتىسىنان استامى ەۋروپا ەلدەرىنىڭ ۇلەسىنە تيەدى.
جۋرناليستەرگە ءوز ويىمەن بولىسكەن اۋرەليا بۋشەز ەو-نىڭ قازاقستان ءۇشىن باستى ارىپتەس ەكەنىنە توقتالىپ, ونى ودان ءارى ورىستەتۋدىڭ ماڭىزىنا ەرەكشە ءمان بەردى. «بۇل رەتتە ەو قازاقستانمەن اراداعى بايلانىستاردى تەرەڭدەتۋگە, وعان كومەك قولىن سوزۋعا ءاردايىم ءازىر. ساۋدا-ەكونوميكالىق قاتىناستاردا جانە ينۆەستيتسيالار تارتۋدا, زاڭ ۇستەمدىگىنىڭ قۇرۋىندا, ازاماتتىق قوعامدى دامىتۋدا بىرگە قيمىلدايدى», – دەپ ءوز جۇمىسىن باعالاپ, ماراپاتتاعان قازاقستان تاراپىنا جۇرەكتەن شىققان العىسىن جەتكىزدى.
انار تولەۋحانقىزى,
«ەگەمەن قازاقستان».