ەلىمىزدەگى «نۇرلى جول» باعدارلاماسىنىڭ اياسىندا جۇزەگە اسىرىلىپ جاتقان كولىكتىك-لوگيستيكالىق جوبالاردىڭ ارقاسىندا جۇك تاسىمالى كولەمى 283 ملرد.توننا شاقىرىمدى قۇراپ وتىر.
بۇل جونىندە ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا پرەزيدەنت جانىنداعى قسزي-ءدىڭ عىلىمي قىزمەتكەرى ەۆگەني حون مالىمدەدى. سونداي-اق, ول ەلباسى وتكەن جىلعى جولداۋىندا «كولىكتىك-لوگيستيكالىق ينفراقۇرىلىمداردى دامىتۋ قاجەت. ول ماكرووڭىرلەردى حابتار قاعيداتى بويىنشا قالىپتاستىرۋ اياسىندا جۇزەگە اسىرىلاتىن بولادى. ونىڭ ۇستىنە, ينفراقۇرىلىمدىق قاڭقا استانامەن جانە ماكرووڭىرلەردى ماگيسترالدى اۆتوموبيل, تەمىرجول جانە اۋە جولدارىمەن شۇعىلا قاعيداتى بويىنشا ءوزارا بايلانىستىرادى», دەگەن بولاتىن, دەي كەلە ەلىمىزدەگى اتالمىش سالاعا بايلانىستى بىرقاتار اقپاراتتارمەن تانىستىردى.
ونىڭ ايتۋىنا قاراعاندا, ستاتيستيكا كوميتەتىنىڭ اقپاراتى بويىنشا, اتالعان كورسەتكىش وتكەن جىلى 487 ملن.توننا شاقىرىم بولعان كورىنەدى. اراداعى ايىرماشىلىقتىڭ ءبىرشاما ەكەندىگىن اتاپ وتكەن ە.حون قازاقستان قىتاي مەن ەۋرازيالىق ەكونوميكالىق وداق ەلدەرى اراسىنداعى جالپى ترانزيتتىك جۇك تاسىمالىنىڭ 1 پايىزىنا يەلىك ەتەتىنىن اتاپ ءوتتى. سونىمەن قاتار, ول ساراپشىلاردىڭ بولجاۋى بويىنشا, قىتاي مەن ەۋرووداق اراسىنداعى ساۋدا كولەمى 2020 جىلدارعا قاراي 781 ميلليارد دوللارعا ارتۋى ءمۇمكىن ەكەندىگىن كولدەنەڭ تارتتى. جانە دە ەۆگەني حوننىڭ ايتۋى بويىنشا, بۇگىنگى تاڭدا باسىمدىققا يە بولىپ وتىرعان تەمىرجول ءجانە اۆتوموبيل دالىزدەرىنىڭ دامۋى دا ايتارلىقتاي ماڭىزعا يە. ونىڭ سەبەبىن ءبىزدىڭ مەملەكەتتەن 5 ءىرى حالىقارالىق كولىك ءدالىزدەرىنىڭ وتەتىندىگىمەن بايلانىستىرا كەلە, ۇكىمەت تاراپىنان جۇزەگە اسىرىلعان بىرقاتار جوبالاردى اتاپ ايتتى. ولاردىڭ قاتارىنا «جەتىگەن – قورعاس», «وزەن – تۇرىكمەنستان مەملەكەتتىك شەكاراسى» كىرەتىندىگىن جەتكىزدى. ال بيىلعى جىلى «جەزقازعان – بەينەۋ» جانە «ارقالىق – شۇباركول» جەلىلەرى پايدالانۋعا بەرىلگەندىگىن اتاپ ءوتتى. ەلميرا ماتىباەۆا, «ەگەمەن قازاقستان».