بۇل كۇندەرى وڭتۇستىك كورەيانىڭ سەۋل قالاسىندا «IBSA» اتتى زاعيپتاردىڭ الەمدىك ويىندارى وتۋدە. وسى بايراقتى باسەكەگە ەلىمىزدىڭ ءۇمىتىن ارقالاپ 14 ازامات اتتانعان ەدى.
وسى اپتادا سەۋلدەن ءسۇيىنشى حابار جەتتى. سوڭعى كەزدە جۇلدە الۋدان قازاقستان پاراليمپياداشىلارىنىڭ كوش باسىندا تۇرعان ءانۋار احمەتوۆ جۇزۋدەن وتكەن جارىستا قوس كۇمىس مەدالدى يەلەندى. ءبىر كۇمىس مەدالدى يسلام ساليموۆ جەڭىل اتلەتيكادان ۇتتى. ال, بوز كىلەمدە جاس دزيۋدوشىمىز ءانۋار ساريەۆ قولا مەدالدى جەڭىپ الدى.
«IBSA» ويىندارى پاراليمپياداشىلار اراسىنداعى ءىرى سپورتتىق جارىستاردىڭ ءبىرى. بۇل ويىندار ءتورت جىلدا ءبىر رەت وتەدى. بيىل بەسىنشى مارتە ءوتىپ جاتقان جارىستا سپورتشىلار جەڭىل اتلەتيكا, شاحمات, فۋتبول, گولبول, دزيۋدو, پاۋەرليفتينگ, شوۋداۋن, ءجۇزۋ, جۇپتاسقان ۆەلوجارىس جانە بوۋلينگ سىندى سپورت تۇرلەرىنەن باق سىناسۋدا. قازاقستان قۇراماسىنىڭ سپورتشىلارى تەك ءجۇزۋ, جەڭىل اتلەتيكا, دزيۋدو جانە شاحمات جارىستارىنا قاتىسۋدا.
ەندى, ناقتى ناتيجەگە كەلسەك, ءانۋار احمەتوۆ 100 مەترگە شالقالاپ جانە ەركىن جۇزۋدەن وتكەن سايىستا جولى بولمادى. تەك براسس ادىسىمەن جارىستا 50 مەتردى 32:56 سەكۋندتا ءجۇزىپ ءوتىپ ءبىر كۇمىستى ولجالاسا, كەيىننەن باتتەرفلياي ادىسىمەن 50 مەتردى 28:56 سەكۋند ۋاقىتپەن ءجۇزىپ ءوتىپ, تاعى ءبىر كۇمىس مەدالدى ۇتتى. ءانۋاردىڭ ارىپتەستەرى الىبەك ۋاقپاەۆ, بەكجان ەسىركەپوۆ, مانسۇربەك يبراشەۆتاردىڭ ازىرگە قانجىعالارى مايلانار ەمەس.
جەڭىل اتلەتيكا باسەكەسىندە قىزىلوردالىق يسلام ساليموۆ ءۇمىتتى اقتادى. يسلام 400, 200 مەترگە جۇگىرۋدەن جۇلدەگە ىلىكپەسە دە, ۇزىندىققا سەكىرۋدە ناتيجەنى 5.86 مەترگە جەتكىزىپ, كۇمىس مەدالدى كەۋدەسىندە جارقىراتتى.
بوز كىلەمدەگى بەلدەسۋلەردە ورىنباسار قۇرالباي, تەمىرجان حاسانعاليەۆ, سامات بيمۇراتوۆ العاشقى اينالىمداردا قاپى كەتىپ, جارىس جولىنان شىعىپ قالدى. تەك اتىراۋلىق جاس بالۋان ءانۋار ساريەۆ بەس قارسىلاسىن ۇتىپ, اقىرىندا قولا مەدالعا قول جەتكىزدى. بۇل – ءانۋار باۋىرىمىزدىڭ حالىقارالىق جارىستاعى العاشقى ءىرى تابىسى.
داستان كەنجالين,
«ەگەمەن قازاقستان».