ءماجىلىس توراعاسى قابيبوللا جاقىپوۆ تۇرىكمەنستان مەدجليسى توراعاسىنىڭ ورىنباسارى گۋربانگۋل بايراموۆا باستاعان دەلەگاتسيا وكىلدەرىمەن كەزدەستى, دەپ حابارلادى ءماجىلىستىڭ ءباسپاسوز قىزمەتى.
اتالعان ەل پارلامەنتشىلەرى ءبىزدىڭ ەلىمىزگە تۇرىكمەنستاننىڭ بەيتاراپ ەل اتانۋىنىڭ 20 جىلدىعىنا ارنالعان شارالارعا قاتىسۋعا شاقىرۋ ءۇشىن كەلدى.
تاراپتار ەكىجاقتى ىنتىماقتاستىقتى دامىتۋدىڭ اۋقىمدى ماسەلەلەرىن تالقىلاپ, جانار-جاعارماي, ەنەرگەتيكا, اۋىل شارۋاشىلىعى, كولىك جانە كوممۋنيكاتسيا سالالارىنا باسا كوڭىل ءبولدى.
قابيبوللا جاقىپوۆ تۇرىكمەنستاننىڭ قازاقستان ءۇشىن ورتالىق ازياداعى باۋىرلاس ەل, تاتۋ كورشى, ستراتەگيالىق ارىپتەس ەكەنىن اتاپ ءوتتى.
– ءبىزدىڭ ەل باسشىلارىنىڭ ساليقالى ساياساتىنىڭ ارقاسىندا قازاقستان مەن تۇرىكمەنستان ەكىجاقتى ءتيىمدى قارىم-قاتىناستىڭ ۇلگىسىن كورسەتىپ كەلەدى, – دەدى ق.جاقىپوۆ. ءماجىلىس توراعاسىنىڭ ايتۋىنشا, «تۇرىكمەنستان – ءوزبەكستان – قازاقستان – قىتاي» گاز قۇبىرى, «قازاقستان – تۇرىكمەنستان – قىتاي» تەمىرجول قۇرىلىسى سىندى ءىرى جوبالار اياسىندا ىقپالداستىقتىڭ ماڭىزدىلىعى وتە زور.
كەزدەسۋ بارىسىندا تاۋار اينالىمىنىڭ وسىمىنە دە كوڭىل ءبولىندى. وتكەن جىلدىڭ قورىتىندىسى بويىنشا تاۋار اينالىمىنىڭ كولەمى 475 ملن. دوللاردى قۇراعان.
ءوز كەزەگىندە گۋربانگۋل بايراموۆا جۇزەگە اسىرىلىپ جاتقان جوبالار قازاقستان مەن ءتۇرىكمەنستان عانا ەمەس, ايماقتاعى كوپتەگەن ەلدەردىڭ دامۋىنا ىقپال ەتىپ جاتقاندىعىن اتاپ ءوتتى. ودان ءارى گ.بايراموۆا قازاقستاندىق ءارىپتەستەرىن وزدەرىنىڭ كوپپارتيالى پارلامەنتتەرىنىڭ قىزمەتىنەن حاباردار ەتتى.
كەزدەسۋ يەلەرى پارلامەنتارالىق بايلانىستاردى نىعايتۋ جاعدايىن دا نازاردان تىس قالدىرمادى. ول زاڭنامالىق سالادا ءتاجىريبە الماسۋعا جول اشۋمەن قاتار, قوس مەملەكەت اراسىنداعى دوستىقتىڭ تەرەڭدەي تۇسۋىنە ءمۇمكىندىك بەرەدى.
مەيماندار قازاقستاندىق ءارىپتەستەرىن وسى جىلدىڭ جەلتوقسان ايىندا اشعابادتا وتەتىن مەرەكەلىك شارالارعا قاتىسۋعا شاقىردى.