ەڭلىك-كەبەك

كەشەنىنىڭ ماڭايى اباتتاندىرىلدى ەلىمىزدىڭ رۋحاني ورتالىعى سەمەي شاھارىنان قاسيەتتى اباي جەرىنە باراتىن قاسقا جولدىڭ بويىندا تاريحي ەسكەرتكىشتەر كوپ-اق. اسىقپاي ارالاعان ادام م.اۋەزوۆتىڭ ايگىلى «اباي جولى» ەپوپەياسىن قايتا پاراقتاپ شىققانداي اسەردە قالادى. سول ەسكەرتكىشتەردىڭ ءبىرى – «ەڭلىك-كەبەك» كەشەنى. تاياۋدا ونىڭ  باسىندا ماحابباتتىڭ قوس مۇڭلىعىنا ارنالعان ەسكەرتكىش-ءمۇسىن مەن دەمالىس ءۇيى اشىلىپ, ابايدىڭ 170 جىلدىق مەرەيتويى اياسىندا كەشەن ماڭايى اباتتاندىرىلىپ, كوز تارتاتىن كورىكتى كەيىپكە ەندى. اينالاسى اسفالتتالعان الاڭعا كۇن كوزىنەن قالقالايتىن كۇركە ورناتىلدى. سۇلۋلىقتىڭ سيمۆولىنا بالانعان ەلىك بەينەسىمەن بىرگە قويىلعان ەڭلىك پەن كەبەكتىڭ ءمۇسىنىن جەرگىلىكتى ونەر يەسى, سارجال اۋىلىنداعى ش.توقجىگىتوۆ اتىنداعى ورتا مەكتەپتىڭ مۇعالىمى ەرتىس تاتيەۆ جاساعان ەكەن. – شاكارىم قۇدايبەردى ۇلىنىڭ «جولسىز جازا» داستانىندا عاشىقتاردىڭ باستان كەشكەندەرى اسەرلى باياندالاتىنىن بىلەسىزدەر. وسى وقيعا نەگىزىنە سۇيەنە وتىرىپ, ءمۇسىندى بالام ەكەۋىمىز ءبىر جارىم ايدا جاساپ شىقتىق. قوس مۇڭلىقتىڭ ىشكى جان دۇنيەسىنىڭ كورىنىس تابۋىنا نازار اۋداردىق. ماحاببات قۇرباندارىنىڭ جانىنا ەلىكتى قويۋىمىزدىڭ ءمانى بار. ويتكەنى, كەبەك ەڭلىك سۇلۋعا اڭ اتىپ جۇرگەندە كەز بولادى. بۇل جۇمىس وبلىس­تىق ءماسليحات دەپۋتاتى تاسبولات بيتەنوۆتىڭ قولداۋىمەن جۇزەگە استى, – دەدى ەرتىس يسايىن ۇلى. «نۇرلى جول» باعدارلاماسى اياسىندا وبلىستىق ماڭىزى بار جولداردى جوندەۋ باعىتىندا اۋدان اكىمى تۇرسىنعازى مۇساپىربەكوۆتىڭ باستاماسىمەن جۇزەگە اسقان تاعى ءبىر شارۋا – كەسەنەگە تاعزىم ەتە كەلگەن تۋريستەرگە ارنالعان قوناقجاي. وبلىستىق ءماسليحات دەپۋتاتى, سەمەي قالاسىنداعى «اقشىڭ» كورپوراتسياسىنىڭ پرەزيدەنتى مارات قۇرمانباي بۇل كەشەندى ۇلى ابايدىڭ 170 جىلدىق تويىنا تارتۋ رەتىندە جەكە قاراجاتىنا سالدىردى. – ەلىمىزدەگى ايتۋلى تاريحي ورىندار­دىڭ بىرىنە سانالاتىن ەڭلىك پەن كەبەك مازارىنىڭ جانىنان زاماناۋي دەمالىس كەشەنىنىڭ اشىلۋى تۋريستەرگە, قادىرلى مەيماندارعا وتە قولايلى جاعداي جاسايدى, – دەدى قاراۋىل اۋىلىنان كەلگەن بوتابەك اقساقال. كەشەننىڭ قابىرعاسىنا « ۇلى ابايعا – 170 جىل» دەپ جازىلعان. سونداي-اق مەرەيتوي قۇرمەتىنە سالىنعان دەمالىس ءۇيىنىڭ اۋماعى دا 170 شارشى مەتردى قۇرايدى. سەمەي, اباي مەن ابىرالى وڭىرلەرىندە حالىققا, ەل مەن جەر تاريحىنا قاتىستى يگى ىستەرىمەن بەلگىلى مارات سەرىكجان ۇلى يۋنەسكو كولەمىندە تويلانعان ۇلى ابايدىڭ 150 جىلدىق مەرەي­تويىنا دا ايتۋلى ۇلەس قوسقان بولاتىن. دۋمان اناش, «ەگەمەن قازاقستان». شىعىس قازاقستان وبلىسى, اباي اۋدانى.