مۇعالىم – نارىق سۇرانىسىنداعى ماماندىق

ءىس-شارا بارىسىندا جۋرناليستەر ۋنيۆەرسيتەتتىڭ باسقارما توراعاسى-رەكتور بەيبىتكۇل كارىموۆامەن كەزدەسىپ, وقۋ ورنىنىڭ ميسسياسى, ستراتەگيالىق دامۋ باعىتتارى مەن قازىرگى تىنىس-تىرشىلىگى تۋرالى اقپارات الدى.

نەگىزى 1944 جىلى قالانعان وقۋ ورنىندا فيزيكا-ماتەماتيكا, ءتىل-ادەبيەت جانە تاريح فاكۋلتەتتەرى اشىلىپ, 100 ستۋدەنت وقۋعا قابىلدانعان بولسا, بۇگىندە رەسپۋبليكاداعى ءبىلىم وشاقتارىن ساپالى مۇعالىم ماماندارىمەن قامتاماسىز ەتىپ وتىرعان وقۋ ورداسىندا 12 مىڭنان استام ستۋدەنت ءبىلىم الىپ جاتىر. ۋنيۆەرسيتەتتە باكالاۆريات, ماگيستراتۋرا جانە PhD دوكتورانتۋرا ءبىلىم باعدارلامالارى بويىنشا پەداگوگ كادرلارى دايارلانادى. وقۋ ورنىندا ەلىمىز وڭىرلەرىمەن قاتار وزبەكستان, موڭعوليا, قىتاي, رەسەي, تۇرىكمەنستان, قىرعىزستان جانە تاجىكستان ەلدەرىنەن كەلگەن تالاپكەرلەر دە ءبىلىم الۋدا.

رەكتور اتاپ وتكەندەي, قازىرگى كەزدە الماتى قالاسى اكىمدىگىمەن, سونداي-اق الداعى ۋاقىتتا وبلىستارمەن بىرلەسكەن جوبالار اياسىندا قاي وڭىردە پەداگوگ ماماندارعا سۇرانىس بارىسى انىقتالاتىن بولادى. قازىرگى كەزدە بۇل باعىتتا ارنايى جوبالار قولعا الىنىپ جاتىر.

بۇگىندە الەمنىڭ 23 ەلىندەگى 83-تەن استام ۋنيۆەرسيتەت جانە عىلىمي ورتالىقتارىمەن سەرىكتەستىك بايلانىس ورناتقان وقۋ ورنى نارىق سۇرانىسىنا وراي زاماناۋي كادرلار دايارلاۋ ىسىنە باستى ءمان بەرىپ وتىر. اسىرەسە شالعاي اۋىلدار, شاعىن كەشەندى مەكتەپتەر, «كەلەشەك مەكتەپتەرىنە» قاجەتتى مامانداردى دايارلاۋ ءىسى ۋنيۆەرسيتەت باسشىلىعىنان وقۋ-ادىستەمەلىك كەشەندى زامانا اعىمىنا, وقۋشىلار تالابىنا, كاسىبي مۇعالىم دايارلاۋ باعىتىنا قاراي يكەمدەپ, ءار كەز نارىققا ساراپتاما جاساپ وتىرۋىن تالاپ ەتەدى. مۇنىمەن قوسا ەرەكشە قاجەتتىلىكتەرى بار بالالاردى وقىتۋعا, ولاردىڭ ساپالى ءبىلىم الۋىنا وراي ينكليۋزيۆتى ءبىلىم بەرۋ باعدارلاماسى ىسكە اسىپ, وسى باعىتتا ارنايى ماماندار دايارلانىپ كەلەدى.

ۋنيۆەرسيتەتتىڭ عىلىمي-يننوۆاتسيالىق جانە شىعارماشىلىق الەۋەتى زامان تالابىنا ساي جابدىقتالعان. مۇندا مولەكۋلالىق فيزيكا جانە تەرموديناميكا زەرتحاناسى, بيوتەحنولوگيالىق زەرتتەۋلەر زەرتحاناسىنىڭ جۇمىسىنا ەرەكشە توقتالىپ وتۋگە بولادى. عالىمداردىڭ جەتىستىكتەرى ەلىمىزبەن قاتار حالىقارالىق كەڭىستىككە كەڭىنەن تانىلعان. فيزيكا, ماتەماتيكا جانە تسيفرلىق تەحنولوگيالار ينستيتۋتىندا اشىلعان فيزيكا زەرتحانالارى زاماناۋي PHYWE جانە PASCO قۇرالدارىمەن جابدىقتالعان. بۇل زەرتحانالار بولاشاقتىڭ ماماندارىن دايارلاۋعا مول مۇمكىندىك بەرەدى.

وقۋ ورنىندا جالپى ءبىلىم بەرەتىن مەكتەپتەرگە شاحمات ءپانى مۇعالىمدەرىن دايارلايتىن «KazChessLab» ءبىلىم بەرۋ الاڭى, سونىمەن قاتار «QyzPU» مەدياستۋدياسى, ءباسپاسوز قىزمەتى, جاڭارتىلعان حورەوگرافيا زالى جانە سەرالى قانيەۆ اتىنداعى كىتاپحانا جۇمىس ىستەيدى.