كوكشەتاۋداعى تاريحي-ولكەتانۋ مۇراجايىندا «نۇر وتان» پارتياسى اقمولا وبلىستىق فيليالى جانىنداعى «ميراس» قوعامدىق كەڭەسىنىڭ وتىرىسى وتكىزىلىپ, قازاقستان رەسپۋبليكاسى مەملەكەت تاريحى ينستيتۋتى ديرەكتورىنىڭ ورىنباسارى, تاريح عىلىمدارىنىڭ كانديداتى امانگەلدى قاشقىمباەۆتىڭ «ءىلياس ەسەنبەرلين» اتتى عىلىمي-تانىمدىق شىعارماسى كوپشىلىككە تانىستىرىلدى.
اتالعان قوعامدىق كەڭەس ءتوراعاسى مەيرامبەك قيىقوۆ جۇرگىزىپ وتىرعان يگى شاراعا پارتيانىڭ وبلىستىق فيليالى توراعاسىنىڭ ءبىرىنشى ورىنباسارى عالىم بەكماعامبەتوۆ, پارلامەنت سەناتىنىڭ دەپۋتاتى, جازۋشى جابال ەرعاليەۆ, باسقا دا زيالى قاۋىم وكىلدەرى قاتىسىپ, ەلەۋلى ەڭبەك جايلى كەلەلى ويلارىمەن ءبولىستى. شىعارما « ۇلى دالا تۇلعالارى» سەرياسىمەن شىعىپ وتىر. كىتاپتىڭ العى ءسوزىن جازعان تاريح عىلىمدارىنىڭ دوكتورى بۇركىتباي اياعان اۆتوردىڭ جەكە تۇلعا ءومىرىن زەرتتەي وتىرىپ سول زامان احۋالىنا, ساياسات پەن ادەبي ورتاداعى اعىمدارعا شىنايى باعا بەرگەنىن اتاپ وتكەن. مۇنداي پىكىرلەر جەرگىلىكتى زيالى قاۋىم وكىلدەرى تاراپىنان دا قىزۋ قولداۋ تاپتى.
سەناتور جابال ەرعاليەۆ بۇل شىعارمادا ءىلياس ەسەنبەرليننىڭ كوپشىلىك بىلە بەرمەيتىن قىرلارى سۋرەتتەلگەنىن ايتا كەلە, قۇندى دەرەكتەردى كوكشە قاۋىمىنا ادەيىلەپ كەلىپ تانىستىرعانى ءۇشىن اۆتورعا زور ريزاشىلىعىن ءبىلدىردى. اتباسارداعى ءى.ەسەنبەرلين اتىنداعى ادەبي مۇراجايدىڭ ديرەكتورى ۇلبوسىن كامباتىروۆا كورنەكتى جازۋشىنىڭ تۋعانىنا 100 جىل تولۋىنا وراي تۋعان جەرىندە قىركۇيەك ايىندا عىلىمي-پراكتيكالىق كونفەرەنتسيا وتكىزۋگە دايىندىق شارالارىنىڭ باستالىپ كەتكەنىن ايتسا, مەرەيلى داتانىڭ بيىل يۋنەسكو كولەمىندە اتاپ وتىلەتىنى جايلى حابار دا جينالعان قاۋىمدى ءبىر سەرپىلتىپ تاستادى. قازاق حاندىعىنىڭ 550 جىلدىعى قارساڭىن ەلىمىز ءۇشىن بۇل ۇلكەن مەرەي بولماق.
ءوزىنىڭ كوپ جىلعى ەڭبەگى جايلى كەڭىنەن اڭگىمەلەپ, جينالعاندار سۇراقتارىنا جاۋاپ بەرگەن امانگەلدى قاشقىمباەۆ اقمولا وبلىسىنىڭ مۇراجاي ۇجىمىنا, كەزدەسۋگە كەلگەن باسقا دا قوناقتارعا جاڭا كىتابىن سىيعا تارتتى. سونداي-اق, وبلىستىڭ باس مۇراجايىنىڭ تاريحي ءجادىگەرلەر بولىمىنە ەكسكۋرسيا ۇيىمداستىرىلدى.
باقبەرگەن امالبەك,
«ەگەمەن قازاقستان».
اقمولا وبلىسى.
سۋرەتتى تۇسىرگەن
بەرىك ەسكەنوۆ.