ەلباسىنىڭ 2015 جىلدىڭ 25 اقپانىنداعى «قازاقستان رەسپۋبليكاسىنداعى كەزەكتەن تىس پرەزيدەنتتىك سايلاۋ وتكىزۋ تۋرالى» جارلىعىنا سايكەس, اقمولا وبلىسى اكىمىنىڭ وكىمىمەن سايلاۋشىلار ءتىزىمىن قالىپتاستىرۋ بويىنشا وبلىستىق جۇمىس توبى قۇرىلدى.
وبلىس اكىمى اپپاراتى باسشىسىنىڭ مىندەتىن اتقارۋشى نيكولاي پوليتكين جەتەكشىلىك ەتەتىن جۇمىس توبىنىڭ العاشقى وتىرىسىندا سايلاۋدى ۇيىمشىلدىقپەن وتكىزۋگە قاتىستى ماڭىزدى ماسەلەلەر قاراستىرىلدى. وسى ورايدا, 2014 جىلدان باستاپ وبلىستا «مەكەنجايلىق تىركەلىم», «جەكە تۇلعالار» مەملەكەتتىك مالىمەتتەر بازاسىمەن ينتەگرالدانعان جاڭا «ينتەگرو» اقپاراتتىق جۇيەسى ەنگىزىلگەنىن اتاپ وتكىمىز كەلەدى. بۇل جۇيە سايلاۋشىلار مەن سايلاۋ ۋچاسكەلەرى بويىنشا ەنگىزىلگەن اقپاراتتىڭ 100 پايىزدىق دالدىگىن قامتاماسىز ەتۋگە مۇمكىندىك بەرەدى.
اقمولا وبلىستىق اكىمدىگى مۇددەلى ورگاندارمەن بىرلەسىپ (كوشى-قون پوليتسياسى, حالىققا قىزمەت كورسەتۋ ورتالىعى, ستاتيستيكا جانە ت.ب.), سايلاۋشىلار تىزىمىنە كۇن سايىن ناقتىلاۋلار جۇرگىزۋدە. بۇل شارالار اعىمداعى جىلدىڭ ناۋرىز ايىنىڭ سوڭىنا دەيىن جۇرگىزىلەتىن بولادى, ودان كەيىن سايلاۋشىلار ءتىزىمىنىڭ كۇنتىزبەلىك جوسپارىنا سايكەس, 5 ساۋىرگە دەيىن اكىمدەر ءتيىستى سايلاۋ كوميسسيالارىنا اكت بويىنشا تىزىمدەردى ۇسىناتىن بولادى.
اقمولا وبلىسى اكىمىنىڭ اقپاراتتىق پورتالىندا الداعى سايلاۋعا ارنالعان ءبولىم اشىلدى, وندا سايلاۋشىلارعا قاتىستى بارلىق اقپاراتتار بەرىلگەن جانە كەز كەلگەن سايلاۋشى ءوزىنىڭ تىزىمدە بار-جوعى تۋرالى نەمەسە ءوز سايلاۋ ۋچاسكەلەرىنىڭ ورنالاسقان ورنى تۋرالى مالىمەتتەر الا الادى.
وبلىستىق باق-تاردا سايلاۋعا قاتىسۋ, سايلاۋشىلار ءتىزىمىن تەكسەرۋ جانە 828 سايلاۋ ۋچاسكەسىنىڭ شەكارالارى مەن ورنالاسقان ورىندارى تۋرالى ورتالىق سايلاۋ كوميسسياسىنىڭ سايلاۋشىلارعا ارناعان ۇندەۋى جاريالاندى.
سونداي-اق, وبلىستىق سايلاۋ كوميسسياسىنىڭ توراعاسى ءادىلحان شاياحمەتوۆ قالالىق جانە اۋداندىق سايلاۋ كوميسسيالارىنىڭ جەتەكشىلەرىمەن سەمينار-كەڭەس وتكىزدى.
كەزدەسۋدە وبلىستىق سايلاۋ كوميسسياسىنىڭ حاتشىسى گەننادي گلۋحوۆ, كوميسسيا مۇشەسى ولگا دوبىچينا, وبلىس اكىمدىگىنىڭ ءبولىم باسشىسى ايجان ساقتاعانوۆا ناۋقاندى ۇيىمداستىرۋ, سايلاۋ الدى ۇگىت-ناسيحات جۇمىستارى, اكىمشىلىك كودەكستەگى وزگەرىستەر جونىندە تۇسىنىك بەرىپ, سۇراقتارعا جاۋاپ قايتاردى.
باقبەرگەن امالبەك,
«ەگەمەن قازاقستان».
اقمولا وبلىسى.