ەلباسىنىڭ ۇلت جوسپارى – 100 قادام باعدارلاماسىندا ەلىمىزدىڭ ءال-اۋقاتىن ارتتىرۋعا جاڭا يدەيالار مەن جاڭا جوبالاردىڭ قاجەت ەكەندىگى ايتىلعان. وسى ىسكە كرۋگلووزەرنىي پسيحونەۆرولوگيالىق مەديتسينالىق الەۋمەتتىك مەكەمەسى دە ءوز ۇلەسىن قوسىپ كەلەدى دەپ ايتۋعا بولادى. ويتكەنى, مەكەمەنى قارجىلاندىرۋ ءۇشىن باسشىمىز قايرەدەن جاقسىعۇلوۆ, مەملەكەتكە الاقان جايماي-اق, بىرقاتار جۇمىستاردى قولعا الۋدا.
مەكەمەگە قاجەتتى توسەك-ورىن جاپقىشتارىن تىكتىرۋگە ماتالار ساتىپ الىنىپ, تىگىن تسەحىندا 379 قامقورلانۋشىنىڭ توسەك جابدىقتارى تىگىلۋدە. تسەحقا 6 سۋ جاڭا تىگىن ماشيناسىن الدىرىپ, تسەحتىڭ اۋماعىن كەڭەيتىپ, قامقورلانۋشىلاردى جۇمىسقا تارتۋدا. ەڭبەك نۇسقاۋشىسى بوتاكوز احمەتقاليەۆا مەكەمەدەگى ءى جانە ءىى توپ مۇگەدەكتەرگە جۇمىستىڭ قىر-سىرىن ۇيرەتىپ كەلەدى. جۇننەن ءتۇرلى كورپەلەر جاساپ, قولعاپتار توقىتتىرىپ, بالالار ءۇيىنىڭ تاربيەلەنۋشىلەرى مەن كەنتتەگى كوپبالالى وتباسىلارىنا كومەك رەتىندە تاراتىپ وتىرادى.
مەكەمە باسشىلىعى قامقورلانۋشىلار ءۇشىن ارنايى جەر الىپ, جازعى لاگەر اشتى. بۇل رەسپۋبليكا كولەمىندە ءالى قولعا الىنباعان جوبا بولىپ تابىلادى. وسى جەردە قامقورلانۋشىلار باۋ-باقشا ەگىپ, جيناعان ونىمدەرىن وزدەرىنىڭ كۇندەلىكتى اس مازىرىنە پايدالانىپ كەلەدى. سپورتپەن شۇعىلدانۋعا دا جاقسى جاعداي جاسالعان. وسىلايشا, مەكەمە قىزمەتكەرلەرى قامقورلانۋشىلاردىڭ كوڭىلىنەن شىعىپ, ولاردىڭ ۋاقىتتارىنىڭ ءتيىمدى وتۋىنە بارىنشا اتسالىسىپ ءجۇر.
بولعاناي بەكماشەۆا,
مەكەمە قىزمەتكەرى.
باتىس قازاقستان وبلىسى.