EXPO حالىقارالىق كورمە ورتالىعىندا قازاقستاندىق وندىرۋشىلەردىڭ جىل سايىنعى IX «Ulttyq ónim – 2026» كورمەسى باستالدى. بيىلعى كورمە وسى ۋاقىتقا دەيىن وتكىزىلگەن كورمەلەردىڭ ەڭ اۋقىمدىسى, دەپ حابارلايدى Egemen.kz
كورمە الاڭىندا قازاقستاننىڭ بارلىق وڭىرىنەن كەلگەن 600 تاۋار ءوندىرۋشى ءوز ءونىمىن ۇسىندى. بۇل وتكەن جىلعى كورسەتكىشتەن ەكى ەسە دەرلىك ارتىق.
سالتاناتتى اشىلۋ راسىمىنە قر پرەمەر-ءمينيسترىنىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين, مەملەكەتتىك ورگاندار مەن بيزنەس-قوعامداستىق وكىلدەرى قاتىستى.
كورمەنىڭ اشىلۋىندا سەرىك جۇمانعارين قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆتىڭ ۇندەۋىن وقىدى.
«پرەزيدەنتىمىز قاسىم-جومارت كەمەل ۇلى توقاەۆ ەكونوميكانىڭ وسۋىنە تىڭ سەرپىن بەرىپ وتىرعان شاعىن جانە ورتا بيزنەستى دامىتۋعا ءاردايىم ەرەكشە كوڭىل ءبولىپ كەلەدى. مەملەكەت تاراپىنان كاسىپكەرلىكتى قولداۋ مەن وعان قولايلى جاعداي جاساۋعا, ىسكەرلىك بەلسەندىلىكتى كەڭەيتۋگە جانە ەلىمىزدىڭ ەكونوميكالىق الەۋەتىن نىعايتۋعا باعىتتالعان كەشەندى شارالار دايەكتى تۇردە جۇزەگە اسىرىلۋدا», - دەلىنگەن ولجاس بەكتەنوۆتىڭ ۇندەۋدە.
جۇزەگە اسىرىلىپ جاتقان مەملەكەتتىك قولداۋ شارالارىنىڭ ىشىندە بيزنەستىڭ قارجىلاندىرۋعا جانە جەڭىلدەتىلگەن نەسيەلەۋ قۇرالدارىنا قولجەتىمدىلىگىن كەڭەيتۋگە ەرەكشە نازار اۋدارىلادى. 2025 جىلى «دامۋ» قورى ارقىلى بيزنەستى قولداۋعا 560 ملرد تەڭگەدەن اسا قاراجات جۇمسالعان. وسىنىڭ ارقاسىندا 13 مىڭ شوب جوباسى جالپى سوماسى 2,2 ترلن تەڭگەگە مەملەكەتتىك قولداۋ شاراسىمەن قامتىلىپ وتىر. جۇزەگە اسىرىلعان شارالار ناتيجەسىندە 15 مىڭعا جۋىق جاڭا جۇمىس ورنىن اشىلىپ, ءونىم شىعارۋدىڭ 27,7 ترلن تەڭگەگە جانە سالىق ءتۇسىمىنىڭ 2 ترلن تەڭگەگە جۋىق ءوسۋىن قامتاماسىز ەتتى.
ەكونوميكانىڭ ناقتى سەكتورىن دامىتۋدىڭ نەگىزگى تەتىگىنىڭ ءبىرى «ينۆەستيتسياعا تاپسىرىس» باعدارلاماسى دەپ اتالادى. ونىڭ نەگىزگى مىندەتى – يمپورتقا تاۋەلدىلىگى جوعارى سالالارداعى جوبالاردى قولداۋ جانە ىشكى نارىق پەن ەكسپورتقا باعدارلانعان جاڭا وندىرىستەر قۇرۋ.
باعدارلامانى جۇزەگە اسىرۋدا «بايتەرەك» حولدينگىنىڭ ينستيتۋتتارى مەن «دامۋ» قورىنا باستى ءرول بەرىلگەن.
«كاسىپكەرلەردى قارجىلاندىرۋ مەن قولداۋدىڭ قولجەتىمدىلىگىن ارتتىرۋ ءۇشىن "دامۋ" قورى كەپىلدىك بەرۋ قۇرالدارىن ەداۋىر كەڭەيتتى. وڭدەۋشى ونەركاسىپ كاسىپورىندارىنىڭ جابدىقتارىن جاڭعىرتۋ ءۇشىن "ورلەۋ" جانە "ورلەۋ-ليزينگ" جەڭىلدىكپەن نەسيەلەۋ باعدارلامالارى ارقىلى قولداۋدىڭ نارىقتىق تەتىكتەرىن كۇشەيتتى. سونداي-اق "ىسكەر ايماق" باعدارلاماسى جۇزەگە اسىپ جاتقان شاعىن قالالار مەن اۋىلداردا ميكرو جانە شاعىن بيزنەستى كەشەندى قولداۋ باعدارلاماسىن ىسكە قوستى. قوردىڭ وڭىرلىك فيليالدارىنىڭ بازاسىندا ءبىز "بايتەرەك" حولدينگىنىڭ بيزنەستى قولداۋدىڭ بارلىق باعدارلامالارى بويىنشا بىرىڭعاي فرونت-كەڭسەلەر قۇردىق, ال شالعاي اۋداندار ءۇشىن ءموبيلدى فرونت-كەڭسە ماقساتىنداعى ارنايى شاعىن اۆتوبۋستار ىسكە قوسىلادى, وندا ماماندار كاسىپكەرلەرگە كەڭەس بەرۋ ءۇشىن شالعاي اۋداندارعا باراتىن بولادى», - دەپ اتاپ ءوتتى «دامۋ» قورىنىڭ باسقارما توراعاسى فارحات سارسەكەەۆ.
2025 جىلى «دامۋ» قورى ارقىلى بيزنەستى دامىتۋعا 560 ملرد تەڭگەدەن استام قارجى ءبولىندى. ناتيجەسىندە جالپى سوماسى 2,2 ترلن تەڭگەگە 13 مىڭعا جۋىق جوبا قولداۋ تاپتى. وسى شارالاردىڭ ارقاسىندا 14 مىڭنان استام جاڭا جۇمىس ورنى قۇرىلىپ, 143 مىڭنان استام جۇمىس ورنى ساقتالدى.
قيىندىققا تاپ بولعان كاسىپكەرلەردى سۇيەمەلدەۋگە ەرەكشە نازار اۋدارىلادى. وسىعان بايلانىستى «دامۋ» قورى جانىنان «وڭالتۋ ورتالىقتارى» قۇرىلۋدا. وندا بيزنەس تۇراقتىلىعىن قالپىنا كەلتىرۋ ءۇشىن قارجىلىق, كونسۋلتاتسيالىق جانە ۇيىمداستىرۋشىلىق قولداۋ الا الادى.
«Ulttyq ónim – 2026» كورمەسى ەكسپو حكو-دا 24 مامىرعا دەيىن جالعاسادى. وسى كۇندەر بويى ول B2B-كەزدەسۋلەر, پانەلدىك سەسسيالار, شەبەرلىك سىنىپتارى مەن قازاقستاندىق بيزنەستىڭ جەتىستىكتەرىن كورسەتۋ ءۇشىن ءتيىمدى الاڭعا اينالادى.