پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا مادەنيەت جانە ونەر قىزمەتكەرلەرىن كاسىبي مەرەكەمەن قۇتتىقتادى, دەپ حابارلايدى Egemen.kz.
«مادەنيەت – مەملەكەتتىلىگىمىزدىڭ رۋحاني تىرەگى, حالقىمىزدىڭ تاريحي ساناسى مەن ۇلتتىق بولمىسىنىڭ ايقىن كورىنىسى. قوعامدى ورتاق قۇندىلىقتار توڭىرەگىنە ۇيىستىرىپ, ەلدىڭ رۋحاني تۇتاستىعىن بەكەمدەيتىن قۋاتتى كۇش. بۇگىندە جاڭا كونستيتۋتسيا اياسىندا مادەنيەتكە, بىلىمگە, عىلىم مەن يننوۆاتسياعا ايرىقشا ءمان بەرىلىپ وتىر. بۇل مادەنيەت سالاسىنىڭ الدىنا جاڭا مىندەتتەر قويىپ, دامۋدىڭ تىڭ مۇمكىندىكتەرىن اشتى. ەندىگى ماقسات – باي مۇرامىزدى ۇقىپتى ساقتاۋمەن قاتار, زاماناۋي فورماتتاردى, تسيفرلىق شەشىمدەردى, كرەاتيۆتى يندۋستريالاردى جانە كورەرمەنمەن, وقىرمانمەن, جالپى جۇرتشىلىقپەن جۇمىس ىستەۋدىڭ جاڭا تاسىلدەرىن باتىل دامىتۋ», دەيدى مينيستر.
ايدا بالاەۆا ءوز سوزىندە مەملەكەت باسشىسى مادەنيەت سالاسىن وركەندەتۋگە, شىعارماشىلىق ادامدارىنا قولداۋ كورسەتۋگە جانە سالانىڭ ينفراقۇرىلىمىن نىعايتۋعا ۇدايى ەرەكشە كوڭىل ءبولىپ كەلە جاتقانىن اتاپ ءوتتى.
«وسى جۇيەلى ساياساتتىڭ ناتيجەسىندە سوڭعى جىلدارى مادەنيەت جانە ونەر قىزمەتكەرلەرىنىڭ مارتەبەسىن ارتتىرۋعا, ەڭبەك جاعدايىن جاقسارتۋعا, وڭىرلەردەگى مادەنيەت مەكەمەلەرىن دامىتۋعا جانە ازاماتتاردىڭ مادەني يگىلىكتەرگە قولجەتىمدىلىگىن كەڭەيتۋگە باعىتتالعان ماڭىزدى شارالار جۇزەگە اسىرىلدى. پرەزيدەنت تاپسىرماسىنا سايكەس بىرقاتار جەتەكشى مادەنيەت مەكەمەلەرىنە «ۇلتتىق» مارتەبەسى بەرىلدى. بۇل ولاردىڭ قوعامداعى ورنىن نىعايتىپ, قىزمەتكەرلەردىڭ ەڭبەكاقىسىن ارتتىرۋعا مۇمكىندىك اشتى», دەيدى بالاەۆا.
ءمينيستردىڭ ايتۋىنشا, وتكەن جىلى 61 مادەنيەت نىسانىنىڭ قۇرىلىسى باستالىپ, 252 نىسان جوندەۋدەن وتكەن. بيىل تاعى 64 نىساننىڭ قۇرىلىسى ءجۇرىپ جاتىر. تسيفرلىق دامۋ باعىتىندا دا ناقتى ناتيجەلەر بار. بۇگىندە E-Museum پلاتفورماسى 284 مۋزەيدى بىرىكتىرىپ, 65 مىڭنان استام جادىگەر مەن 750-گە جۋىق 3D-ارتەفاكتىنى قامتىپ وتىر.
ايدا بالاەۆا: مادەنيەت سالاسى كرەاتيۆتى يندۋستريالاردىڭ قوزعاۋشى كۇشىنە اينالدى
مينيستر 600 مادەنيەت قىزمەتكەرى قاتىسقان «مادەنيەت جانە يننوۆاتسيا» فورۋمى سالانىڭ زور الەۋەتىن, مامانداردىڭ جاڭارۋعا دايىن ەكەنىن بىلدىرەتىنىن اتاپ ءوتتى. سونداي-اق مادەنيەت سالاسى بۇرىنعىدان دا اشىق, جاڭاشىل ءارى حالىققا جاقىن بولا تۇسكەنىن ايتتى.
«وسى مەرەيلى كۇنى مادەنيەتكە كۇن سايىن ادال قىزمەت ەتىپ جۇرگەن بارشا ازاماتتارعا ەرەكشە العىس ايتقىم كەلەدى. ارتيستەرگە, مۋزىكانتتارعا, كىتاپحاناشىلارعا, مۋزەي جانە ارحيۆ قىزمەتكەرلەرىنە, رەجيسسەرلەرگە, سۋرەتشىلەرگە, حورەوگرافتارعا, ساحنا مايتالاندارىنا, پەداگوگتەرگە, تەحنيكالىق ماماندارعا جانە ەلىمىزدىڭ رۋحاني بايلىعىن ساقتاپ, دامىتىپ جۇرگەن بارلىق سالا وكىلدەرىنە شىنايى ريزاشىلىعىمدى بىلدىرەمىن. سىزدەردىڭ ەڭبەكتەرىڭىز ۇلتتىڭ رۋحانياتىن بايىتىپ, جاس ۇرپاقتىڭ دۇنيەتانىمىن قالىپتاستىرادى, ەل بىرلىگىن نىعايتادى جانە قازاقستاننىڭ الەمدىك مادەني كەڭىستىكتەگى بەدەلىن ارتتىرا تۇسەدى», دەدى ايدا بالاەۆا.
مادەنيەت سالاسىنداعى مەملەكەتتىك ستيپەنديا سانى ەكى ەسە ارتادى