قايرات ءماميدىڭ ءتوراعالىعىمەن قازاقستان رەسپۋبليكاسى جوعارعى سوتىنىڭ كەزەكتى جالپى وتىرىسى ءوتتى. وتىرىستىڭ كۇن ءتارتىبىنە سايكەس اۆتورلىق جانە ساباقتاس قۇقىقتى قورعاۋعا, قىلمىستىق جازا تاعايىنداۋعا قاتىستى جوعارعى سوتتىڭ ەكى نورماتيۆتىك قاۋلىسىنىڭ جوباسى تالقىلاندى.
العاشقى جوبانى تانىستىرا كەلە, جوعارعى سوت سۋدياسى يرينا كالاشنيكوۆا زياتكەرلىك قىزمەت نىساندارىن قورعاۋعا جانە قولدانۋعا قاتىستى قاتىناستار ازاماتتىق قۇقىقتىڭ نورمالارىمەن رەتتەلەتىندىگىن اتاپ ءوتتى. اۆتورلىق قۇقىقتى قورعاۋ رەسپۋبليكانىڭ ەكونوميكالىق ءوسىمىنىڭ تۇراقتى جانە قارقىندى دامۋىن قامتاماسىز ەتۋدىڭ ماڭىزدى شارتتارىنىڭ ءبىرى رەتىندە قاراستىرىلادى جانە قازاقستاننىڭ دسۇ-عا كىرۋى قارساڭىندا ايرىقشا وزەكتى بولىپ تابىلادى.
زياتكەرلىك مەنشىك سالاسىنداعى زاڭناماعا سوڭعى جىلدارى ەنگىزىلگەن وزگەرىستەر اۆتورلىق جانە ساباقتاس قۇقىقتى قورعاۋ تۋرالى زاڭ نورمالارىن سوت ءتاجىريبەسىندە دۇرىس قولدانۋ ماقساتىندا وسى نورماتيۆتىك قاۋلىنى ازىرلەۋگە قاجەتتىلىك تۋدىردى.
جوعارعى سوتتىڭ سۋدياسى مەيرام جانعۇتتينوۆ ەكىنشى نورماتيۆتىك قاۋلى جوباسى تۋرالى ايتا كەلە, بۇل جوبانىڭ جازا تاعايىنداۋ ماسەلەسى بويىنشا جاڭا قىلمىستىق جانە قىلمىستىق-پروتسەستىك زاڭناما نورمالارىن ءبىرىزدى قولدانۋدى قامتاماسىز ەتۋ ماقساتىندا ازىرلەنگەندىگىن اتاپ ءوتتى. جوبادا رەسپۋبليكا زاڭناماسىندا بۇرىن-سوڭدى بولماعان بىرقاتار جاڭا ەرەجەلەر قامتىلعان. بۇلار, اتاپ ايتقاندا, قىلمىستىق تەرىس قىلىققا, كەلىسىمدىك ءىس جۇرگىزۋدەگى جازا تاعايىنداۋعا قاتىستى نورمالار. قىلمىستىق جازا تاعايىنداۋ ماسەلەلەرى بويىنشا سوت پراكتيكاسى بۇرىنىراقتا ەكى نورماتيۆتىك قاۋلىدا كورسەتىلگەن بولاتىن. جاڭا قىلمىستىق, قىلمىستىق-پروتسەستىك جانە قىلمىستىق اتقارۋ كودەكستەرىنىڭ قابىلدانۋىنا بايلانىستى جازا تاعايىنداۋ جونىندەگى جاڭا ينستيتۋتتاردى ءتۇسىندىرۋ, جاڭا نورماتيۆتىك قاۋلى قابىلداۋدىڭ قاجەتتىلىگى تۋىندادى.
نورماتيۆتىك قاۋلىلار جوبالارىن ازىرلەۋ بارىسىندا وسى ماسەلەلەر بويىنشا سوت ىستەرى زەردەلەنىپ, سوت تاجىريبەلەرى ساراپتان وتكىزىلدى, سونداي-اق جەرگىلىكتى سوتتاردان, عكك مۇشەلەرى مەن مۇددەلى مەملەكەتتىك ورگانداردىڭ ۇسىنىستارى مەن ەسكەرتۋلەرى ەسكەرىلدى, دەپ حابارلايدى جوعارعى سوتتىڭ ءباسپاسوز قىزمەتى.