پارلامەنت ءماجىلىسىنىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ توراعاسى ماۋلەن اشىمباەۆ نيدەرلاند كورولدىگىنىڭ قازاقستانداعى توتەنشە جانە وكىلەتتى ەلشىسى حەنري حۋبەرت دريسسەرمەن كەزدەستى, دەپ حابارلادى ءماجىلىستىڭ ءباسپاسوز قىزمەتى.
م.اشىمباەۆ ەكى ەل اراسىنداعى قاتىناستاردىڭ قارقىندى جانە ءتيىمدى دامىپ كەلە جاتقانىن اتاي وتىرىپ, نيدەرلاند قازاقستاننىڭ ەۋروپاداعى بىردەن-ءبىر ىسكەر سەرىكتەسى ەكەندىگىن جەتكىزدى. كورولدىك قازاقستان تاۋەلسىزدىگىن العالى بەرگى ۋاقىتتا ەلىمىزدىڭ ەكونوميكاسىنا 50 ملرد. دوللاردان استام قارجى قۇيدى.
ايماقتىق جانە عالامدىق ۇدەرىستەرگە قاتىسۋ بارىسىنا توقتالعان ءماجىلىستىڭ كوميتەت ءتوراعاسى قازاقستاننىڭ 2017-2018 جىلدارى بۇۇ قاۋىپسىزدىك كەڭەسىنە تۇراقتى ەمەس مۇشە بولۋعا ۇمتىلىسىن قولدايتىنىنان ءۇمىتتى ەكەندىگىن ءبىلدىردى.
تاراپتار «100 ناقتى قادام» شەڭبەرىندە جاسالىپ جاتقان ينستيتۋتتىق 5 رەفورماعا ايرىقشا نازار اۋداردى. ح.دريسسەردىڭ ءمالىمدەۋىنشە, قازاقستان ەۋروپاعا قاۋىپسىزدىك, تۇراقتىلىق پەن ءوركەندەۋ ورتالىعى رەتىندە ماڭىزدى.
جۇرگىزىلىپ جاتقان رەفورمالار بويىنشا دەپۋتاتتاردىڭ جۇمىسى تۋرالى م.اشىمباەۆ ءبىزدىڭ ەل نيدەرلاندتىڭ زاڭنامالىق قىزمەت سالاسىنىڭ ءتاجىريبەسىنە قىزىعۋشىلىق تانىتاتىنىن ءبىلدىردى. سونىمەن قاتار, ماجىلىسمەن ەكى ەل اراسىنداعى پارلامەنتارالىق ىنتىماقتاستىقتىڭ ودان ءارى دامۋىنىڭ ماڭىزىنا توقتالدى.
تاراپتار بولاشاق ءوزارا بايلانىستار باعىتىنىڭ ىشىندە ساۋدا-ەكونوميكالىق, مادەني-ىزگىلىك بايلانىستاردى ەرەكشە اتادى. ح.دريسسەر قازاقستاندى دسۇ-عا ەنۋىمەن قۇتتىقتادى.