استانا. 27 ناۋرىز. قىتايدىڭ شانحاي قالاسىندا مانەرلەپ سىرعاناۋدان الەم چەمپيوناتى وتۋدە. دودادا ەل نامىسىن جالعىز دەنيس تەن قورعاۋدا. بۇگىن ول قىسقا باعدارلاما بويىنشا جارىس جولىنا شىقتى. بۇل تۋرالى egemen.kz حابارلادى.
وسى رەتتە ايتا كەتەر جايت, دەنيس تەن ايدىنعا شىققان كەزدە ۇيىمداستىرۋشىلار قاتەلىككە جول بەردى. ولار ءبىزدىڭ سپورتشىنىڭ كومپوزيتسياسىن قوسۋ كەزىندە سالعىرتتىق تانىتىپ, تەننىڭ جۇيكەسىنە ايتارلىقتاي سالماق ءتۇسىردى. ال مانەرلەپ سىرعاناۋدا مۇنداي جايت سپورتشىعا كەرى اسەرىن تيگىزەرى انىق. ناتيجەسىندە, دەنيس العاشقى جاتتىعۋىندا قاتەلىك جىبەرۋگە ءماجبۇر بولدى. دەسەك تە, قالعان ۋاقىتتا بارلىق جاتتىعۋىن ءمىنسىز ورىنداعان ونى تورەشىلەر 85,89 ۇپايمەن باعالادى. بۇل كورسەتكىشپەن قازاقستان سپورتشىسى ازىرگە ءۇشىنشى ورىندا كەلەدى. ال جاپونيا سەنىم ارتقان يۋدزۋرۋ حانيۋ 95,20 ۇپايمەن كوش باستاپ تۇر. ەكىنشى ورىنعا 92,74 ۇپاي جيناعان يسپانيا سپورتشىسى حاۆەر ەرناندەس جايعاستى.
ەرلەر اراسىنداعى ەركىن باعدارلاما ەرتەڭ بولادى. سايىستى «قازاقستان» ۇلتتىق تەلەارناسى استانا ۋاقىتىمەن ساعات 15:35-تەن باستاپ تىكەلەي ەفيردە كورسەتەدى.
ايتا كەتەيىك, الەم چەمپيوناتىنىڭ ىرىكتەۋ كەزەڭىنە قاتىسقان ابزال راحىمعاليەۆ جانە جۇپتىق بيلەۋ سايىسىندا ونەر كورسەتەتىن ءىلياس ءالي مەن كارينا ۋزۋروۆالار نەگىزگى كەزەڭگە وتە المادى.
ەلامان قوڭىر.
دەرەك: egemen.kz.
سۋرەت: facebook.com.