«بۋراباي» مەملەكەتتىك ۇلتتىق تابيعي ساياباعى بەلارۋس رەسپۋبليكاسىنان اكەلىنگەن جابايى وگىزدەرمەن, ياعني زۋبرلارمەن تولىقتى.
«بەلوۆەج نۋى» ۇلتتىق ساياباعىنان جەتكىزىلگەن ەكى-ءتورت جاس ارالىعىنداعى 10 جابايى زۋبردى «ورمان شارۋاشىلىعى» جاۋاپكەرشىلىگى شەكتەۋلى سەرىكتەستىگى وزدەرىندە ءوسىرىپ, جەرسىندىرۋ ءۇشىن ساتىپ العان.
ولاردىڭ ۇشەۋى – اتالىق, جەتەۋى – انالىق. الداعى ۋاقىتتا بۇل جانۋارلاردىڭ سانى كوبەيتىلگەن سوڭ, «بۋراباي» مەملەكەتتىك ۇلتتىق تابيعي ساياباعىنىڭ اۋماعىن ەن جايلايتىن جابايى وگىزدەر تابىنى قۇرىلادى.
ساياباق باسشىلارىنىڭ ءسوزدەرىنە قاراعاندا, مۇنىڭ ءوزى حح عاسىردىڭ باسىندا تولىق جويىلىپ كەتۋگە جاقىن قالعان زۋبرلاردىڭ سانىن بىرتىندەپ كوبەيتۋگە مۇمكىندىك بەرمەكشى. قازاقستاننىڭ جانۋارلار الەمىن تولىقتىرۋدى ماقسات ەتەتىن بۇل قادام ەلىمىزدىڭ تۋريستىك كلاستەر الەۋەتىن ارتتىرۋعا دا ىقپال ەتەتىن بولادى.
باقبەرگەن امالبەك,
«ەگەمەن قازاقستان».
اقمولا وبلىسى.