زاڭ ءتۇسىندىرىلدى

جاقىندا وتكەن وبلىس اكىمدىگى مەن مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى اقتوبە وبلىسى بويىنشا دەپارتامەنتىنىڭ باستاماسىمەن ۇيىمداستىرىلعان سەمينار-كەڭەس سىبايلاس جەمقورلىققا قارسى زاڭنامانىڭ وزەكتى ماسەلەلەرىنە ارنالدى. سەمينار-كەڭەستىڭ جۇمىسىنا وبلىستىق اتقارۋشى ورگاندار, وبلىستىق تەكسەرۋ كوميسسياسى, سونداي-اق, ورتالىق مەملەكەتتىك ورگانداردىڭ اۋماقتىق بولىمشەلەرىنىڭ باسشىلارى, «نۇر وتان» پارتياسىنىڭ, «اتامەكەن وداعى» ۇەپ وكىلدەرى قاتىستى. سەمينارعا قاتىسۋشىلاردىڭ الدىندا سويلەگەن سوزىندە وبلىس اكىمى اپپاراتىنىڭ باسشىسى كونستانتين پەتروۆ ءىس-شارانىڭ ماقساتى سىبايلاس جەمقورلىققا قارسى زاڭنامانى ءتۇسىندىرۋ بولىپ تابىلاتىنىن اتاپ ءوتتى. بۇدان كەيىن ءسوز العان مەم­لەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ اقتوبە وبلىسى بويىنشا دەپارتامەنتى باسشىسىنىڭ ورىنباسارى, تارتىپتىك كەڭەس ءتور­اعاسى قايىرجان توقىشەۆ سىبايلاس جەمقورلىققا قارسى كۇرەس ستراتەگياسىنىڭ نەگىزگى ەرەجەلەرىن ءتۇسىندىردى. سونىمەن قاتار, ول بۇگىندە اگەنتتىك پەن ونىڭ اۋماقتىق بولىمشەلەرى ەلىمىزدە سىبايلاس جەمقورلىق دەڭگەيىن ازايتۋ ءۇشىن, مەملەكەت پەن قوعام ءومىرىنىڭ ءارتۇرلى سالاسىندا ونىڭ سەبەپتەرى مەن جاعدايلارىن جويۋ ءۇشىن جۇرگىزىپ جاتقان كەشەندى شارالارعا توقتالدى. بايانداماشى مەملەكەتتىك قىزمەت كورسەتۋدىڭ قول جەتىمدىلىگىن, ساپاسىن كوتەرۋدى جۇمىستىڭ ماڭىزدى كورىنىسى رەتىندە اتادى. – بۇگىندە ازامات پەن مەملەكەتتىك ورگانداردىڭ قارىم-قاتىناسى, ەتەنە ارالاسۋى مەملەكەتتىك قىزمەت الۋمەن بايلانىستى. بۇل ارالاسۋ سىباي­لاس جەمقورلىققا الىپ كەلۋى ءمۇم­كىن. ياعني, حالىقتىڭ قۇقىقتىق ساناسىنىڭ تومەن بولۋى جانە مەم­لەكەتتىك قىزمەتتى الۋ ءتارتىبى تۋرالى اقپاراتتاندىرىلماعاندىعى وسى سالادا سىبايلاس جەمقورلىق كورىنىستەرىنىڭ نەگىزگى سەبەبى بولىپ تابىلادى» دەدى قايىرجان توقىشەۆ. وسىنداي سىبايلاس جەم­قورلىق كورىنىستەرىن بولدىرماۋ ماقساتىندا بۇگىنگى كۇنى شە­نەۋنىكتەردىڭ ازاماتتارمەن ءتى­كەلەي بايلانىستارىن ازايتاتىن جانە سىبايلاس جەمقورلىق كو­رىنىستەرىن بارىنشا تەجەيتىن قىز­مەتتەر سالاسىن دامىتۋ مەن مەم­لە­كەتتىك اپپارات جۇمىسىن اقپا­راتتاندىرۋ جونىندە كەشەندى شارالار قابىلدانۋدا. ساتىبالدى ءساۋىرباي, «ەگەمەن قازاقستان». اقتوبە وبلىسى.