ۇكىمەتتە ولاردى ۇتىمدى پايدالانۋ جونىندە جوسپارلار بار ما؟
قاراعاندى جانە قازاقستاننىڭ باسقا دا وبلىستارىندا ورىن العان كوكتەمگى سۋ تاسقىنى, ولاردىڭ الدىن الۋ جانە ءتيىسىنشە قاسىرەتتى سالدارى ءبارىمىزدى دە تەرەڭ ويلاندىرۋعا ءتيىس. سۋ باسقان اۋداندارداعى قالپىنا كەلتىرۋ جۇمىستارى ەلىمىز ءۇشىن, شىنى كەرەك, وتە قىمباتقا ءتۇسىپ وتىر. بۇعان اپاتتىڭ ءمۇمكىندىگىن ءتيىمدى پايدالانا الماي وتىرعان ءوزىمىز دە كىنالىمىز.
اتاپ ايتقاندا, بۇگىنگى تاڭدا بۇۇ وسى باعىتقا ەرەكشە ءمان بەرىپ كەلەدى. مىسالى, 2015 جىلعى 20 ناۋرىزدا نيۋ-دەليدە جاريا ەتىلگەن «ورنىقتى دامۋعا ارنالعان سۋ» تاقىرىبىنداعى بايانداماسىندا تاياۋ جىلدارداعى نەگىزگى كۇن تارتىبىندە ەكوجۇيە, سۋدىڭ ساپاسى جانە اپاتتاردى باسقارۋ باستى نازارعا الىناتىنى اتاپ وتىلگەن.
ارينە, تابيعي سۋ كولەمىن جيناۋ مەن پايدالانۋ پروبلەماسى قازاقستان ءۇشىن جاڭالىق ەمەس. ونىڭ سىرتىندا, 2014 جىلى ءساۋىر ايىندا سۋ رەسۋرستارىن باسقارۋ مەملەكەتتىك باعدارلاماسى قابىلداندى. الايدا, بيىلعى كوكتەم ەكونوميكانىڭ تابيعي رەسۋرسى رەتىندە سۋ تاسقىندارىن قالاي ءتيىمدى پايدالانۋ قاجەت دەگەن ماسەلەنىڭ وزەكتىلىگىن ارتتىرا ءتۇستى. ەندەشە, ازاماتتارىمىزدىڭ قاۋىپسىزدىگىن ساقتاي وتىرىپ, كوكتەمدەگى سۋدىڭ جايىلۋىن پايدالى ىسكە باعىتتايتىن كەز كەلدى.
قازاقستانداعى بارلىق وزەندەردىڭ نەگىزىنەن 70-تەن 80 پايىزعا دەيىن قاردىڭ سۋلارىمەن تولىعىپ وتىراتىنى بەلگىلى. ايتالىق, تابيعي سۋمەن از قامتىلعان قاراعاندى وڭىرىندە سۋ رەسۋرستارىنىڭ 87 پايىزىنان استامى قاردىڭ سۋلارى ەسەبىنەن قالىپتاسادى. سوندىقتان, قار كوپ تۇسكەن سايىن سۋ تاسقىندارىنان قۇتىلا المايمىز. ءبىز بۇگىندە سۋ تاسقىنىنا قارسى قورعايتىن قابىرعالار, بوگەتتەر مەن توعاندار, اينالىپ وتەتىن ارنالار سالۋمەن قاتار, باسقا دا ءىس-شارالاردى قولعا الۋ, ونىڭ ىشىندە وزەن ارنالارىن رەتتەپ وتىرۋ ءۇشىن سۋ قويماسى قۇرىلىسىن سالۋ ماسەلەسى وزەكتى بولىپ تۇر دەپ ويلايمىز.
قىسقاسى, بىزگە سۋ قورىن كەيىن اگرارلىق سەكتوردىڭ, ەنەرگەتيكا جانە باسقا دا سالالاردىڭ قاجەتىنە پايدالانۋ ءۇشىن كوكتەمگى ەرىگەن سۋدى جينايتىن توعاندار قاجەت. بۇل رەتتە, استانا مەن اتىراۋدا ورىن العان جاڭبىر سۋىنىڭ وقىستان بولعان تاسقىندارىن باسقارۋ تۋرالى دا ەستە ۇستاعانىمىز ءجون. ءبىزدىڭ ويىمىزشا, قاجەتتى كولدەردى جاساۋ توتەنشە جاعدايلار جانە سۋعا قاتىستى باسقا دا قىزمەتتەردىڭ جۇمىستارىن جەتىلدىرۋ ارقىلى مۇمكىن بولماق.
ايتپاقشى, قورشاعان ورتا جانە سۋ رەسۋرستارى مينيسترلىگى بولعان كەزدە تاسقىن سۋلاردى جيناۋ ءۇشىن وتىز سۋ قويماسى قۇرىلىسىنىڭ جوباسى جاريالانعان بولاتىن. ال بۇگىندە ونىڭ تاعدىرى مۇلدەم بەلگىسىز.
وسى ارادا ۇكىمەتكە: «بۇگىنگى تاڭدا ۇكىمەتتە تاسقىن جانە جاڭبىردىڭ سۋلارىن ۇتىمدى پايدالانۋ جونىندە جوسپارلار بار ما؟» دەگەن سۇراق قويۋ ورىندى بولماق. ونىڭ ۇستىنە سۋ رەسۋرستارىنىڭ تاپشىلىعى مەن شەكتەۋلىلىگى رەسپۋبليكا ەكونوميكاسىنا جانە ونىڭ مەملەكەت باسشىسى ن.ءا.نازارباەۆتىڭ بەس ينستيتۋتتىق رەفورماسى شەڭبەرىندەگى جوسپارلارىنا قاتەر توندىرەتىنىن ۇكىمەتتەگىلەر دە جاقسى بىلسە كەرەك.
اندرەي بەگەنەەۆ,
ءماجىلىس دەپۋتاتى.