ەرتەڭ ساعات 12:00-دە شىمكەنت قالاسىنداعى ءال-فارابي الاڭىندا «DamDastour» حالىقارالىق گاسترونوميالىق فەستيۆالى وتەدى, دەپ حابارلايدى Egemen.kz.
اتالعان ءىس-شارا ناۋرىز مەرەكەسىنە وراي ۇيىمداستىرىلماقشى. وندا قالا تۇرعىندارى مەن قوناقتارىنا ۇلتتىق جانە الەمدىك اسحانانىڭ ۇزدىك تاعامدارى ۇسىنىلادى.
فەستيۆالگە قازاقستاننان جانە شەتەلدەن كەلگەن حالىقارالىق دەڭگەيدەگى 10 اسپاز قاتىسىپ, شەبەرلىكتەرىن كورسەتەدى.
Digital Qazaqstan فورۋمى العاش رەت شىمكەنتتە وتەدى
فەستيۆال اياسىندا كەلەسى نوميناتسيالار بويىنشا گاسترونوميالىق بايقاۋلار ۇيىمداستىرىلادى:– ۇزدىك كاۋاپ;– ۇزدىك پالاۋ;– ۇزدىك سامسا;– ۇزدىك ۇلتتىق تاعام.
سونىمەن قاتار, ءىس-شاراعا شامامەن 50 جەرگىلىكتى مەيرامحانا قاتىسىپ, كەلۋشىلەرگە ءتۇرلى تاعامدار ۇسىنادى.
فەستيۆال تەك گاسترونوميالىق شارالارمەن شەكتەلمەي, اۋقىمدى مادەني-ويىن-ساۋىق باعدارلاماسىمەن جالعاسادى. قوناقتاردى street style جانە K-pop باعىتتارىنداعى Dance Battle, دومبىراشىلار ءانسامبلىنىڭ ونەر كورسەتۋى, باتىرلار شوۋى, تسيرك قويىلىمدارى, موتوشەرۋ, سپورتتىق اۆتوكولىكتەر كورمەسى, سونداي-اق قولونەرشىلەر جارمەڭكەسى كۇتەدى.
شىمكەنت كوشەلەرىنە 1,6 ملن ءتۇپ گۇل ەگىلەدى
ءىس-شارا بىرنەشە تاقىرىپتىق ايماقتارعا ءبولىنىپ ۇيىمداستىرىلادى. ەتنوايماقتا گاسترونوميالىق بايقاۋلار مەن حالىقارالىق اسپازداردىڭ شەبەرلىك ساباقتارى وتەدى, ال ەۋروپالىق ايماقتا زاماناۋي شوۋ-باعدارلامالار, بي بايقاۋلارى جانە موتوشوۋ ۇسىنىلادى. سونىمەن قاتار, اربات اۋماعىندا كۇنى بويى قولونەرشىلەر كورمەسى جۇمىس ىستەيدى.
فەستيۆالدىڭ رەسمي اشىلۋى سالتاناتتى تۇردە وتەدى, ال كەشكى ۋاقىتتا جەڭىمپازداردى ماراپاتتاۋ ءراسىمى مەن كونتسەرتتىك باعدارلاما ۇيىمداستىرىلادى. ارتىستەر مەن ارنايى شاقىرىلعان حەدلاينەرلەر ونەر كورسەتەدى.
«DamDastour» حالىقارالىق گاسترونوميالىق فەستيۆالى − بۇل ناۋرىز مەرەكەسىنىڭ اتموسفەراسىن سەزىنۋگە, ءتۇرلى حالىقتاردىڭ اسحاناسىمەن تانىسۋعا جانە وتباسى, دوستارمەن بىرگە ۋاقىتتى كوڭىلدى وتكىزۋگە مۇمكىندىك بەرەتىن اۋقىمدى مادەني ءىس-شارا.
شىمكەنت قالاسىنىڭ اكىمدىگى قالا تۇرعىندارى مەن قوناقتارىن وسى مەرەكەلىك ءىس-شاراعا قاتىسۋعا شاقىرادى.