ۇلىق مەيرام – ناۋرىز مەرەكەسى قارساڭىندا ەلوردا اسپانىن اسەم اۋەن الديلەپ, ەرەكشە ءبىر رۋحاني كەشتىڭ شىمىلدىعى ءتۇرىلدى. كوكتەمنىڭ جاڭارۋ لەبى مەن ونەردىڭ ماڭگىلىك ءۇنى استاسقان بۇل ءسات – شىنايى ونەر سالتاناتىنا اينالدى. كۇمبىرلەگەن كۇي, سىرلى ساز, جۇرەككە جەتكەن ءان – بارلىعى توعىسىپ, ۋاقىتتىڭ ءوزىن ءبىر مەزەتكە ايالداتقانداي اسەر قالدىردى. بۇل – قازاق مۋزىكاسىنىڭ كورنەكتى وكىلى, كومپوزيتور ءارى ديريجەر ءالي الپىسباەۆتىڭ مەرەيتويىنا ارنالعان تاعىلىمى تەرەڭ, تاعدىرى مول شىعارماشىلىق كەش.
روزا باعلانوۆا اتىنداعى «قازاقكونتسەرت» مەملەكەتتىك اكادەميالىق كونتسەرتتىك ۇيىمىنىڭ ساحناسى ءدال وسى كەشتە تەك كونتسەرت الاڭى عانا ەمەس, ۇلتتىق رۋح پەن كوركەم سەزىمنىڭ قاسيەتتى ورداسىنا اينالدى.
كەش باعدارلاماسىندا ورىندالعان «الاش ەلى», «توسبۇلاق» كۇي-پوەمالارى تىڭدارماندى تەرەڭ تولعانىسقا جەتەلەپ, وتكەن مەن بۇگىندى جالعاعان رۋحاني كوپىرگە اينالدى. ال «اكە», «اققۋىم بولىپ ورالدىڭ با؟», «جۇلدىز – عۇمىر», «امان بولشى, جان انا», «باقىت ءۆالسى», «ماحاببات ءۆالسى», «قازاق ەلى» سىندى اندەر – ادام جانىنىڭ ەڭ نازىك پەرنەلەرىن ءدوپ باسقان تۋىندىلار. ءبىر اندە – اكەنىڭ اسقاق تۇلعاسى مەن ساعىنىشقا تولى بەينەسى, بىرىندە – انانىڭ مەيىرىمى مەن شەكسىز ماحابباتى, ەندى بىرىندە – عۇمىردىڭ وتكىنشىلىگى مەن ءومىردىڭ ءمانى, تاعى بىرىندە – ەلگە دەگەن پەرزەنتتىك سۇيىسپەنشىلىك پەن ماقتانىش سەزىمى ورىلەدى. اتالعان تۋىندىلار تەك مۋزىكالىق شىعارما عانا ەمەس, ولار – ءومىردىڭ كوركەم شەجىرەسى, جاننىڭ ايناسى.
كومپوزيتور شىعارماشىلىعىنىڭ باستى ەرەكشەلىگى – ۇلتتىق ءداستۇردىڭ تەرەڭ تامىرى مەن زاماناۋي مۋزىكالىق ءتىلدىڭ تابيعي ۇيلەسىمىندە. ول كۇيدى جاڭا قىرىنان سويلەتتى, انگە جاڭا تىنىس بەردى, اۋەندى سەزىمگە اينالدىردى. سونىڭ ارقاسىندا سازگەر تۋىندىلارى ۋاقىتپەن بىرگە جاڭعىرىپ, تىڭدارمان جۇرەگىنەن ورىن الىپ كەلەدى.
ساحنا تورىندە ونەر كورسەتكەن ساڭلاقتار كەشتىڭ مازمۇنىن بايىتا ءتۇستى. حالىقارالىق بايقاۋلاردىڭ لاۋرەاتى مەدەت ەسبەرگەنوۆ, «كۇرەڭبەل» تريوسى, سونداي-اق جومارت تاكەباەۆ, ماقسات نۇرلانوۆ, تالعات ورازاەۆ, تولقىن سقاقوۆا, سالتانات مۇراتقىزى, شاحزود سانا, ساۋلە الىمبەتوۆا, ارۋجان جالعاسوۆا, جىبەك مۇسىرعاليەۆا سىندى ونەرپازدار كورەرمەنمەن شىنايى مۋزىكالىق سۇحبات قۇردى. دانەش راقىشەۆ اتىنداعى جەتىسۋ وبلىستىق فيلارمونياسىنىڭ ەسترادالىق-سيمفونيالىق وركەسترى ءار تۋىندىعا ايرىقشا بوياۋ بەرىپ, كەشتىڭ كوركەمدىك دەڭگەيىن اسقاقتاتتى.
ايتۋلى كونتسەرت تەك مەرەيتويلىق ەسەپ ەمەس, كوكتەممەن بىرگە جاڭارعان رۋحتىڭ, ونەرگە دەگەن ىڭكارلىكتىڭ, ۇلتتىق مۇراعا دەگەن قۇرمەتتىڭ كورىنىسى بولدى. مۋزىكا اياقتالعانىمەن, اسەرى ۇزاق ساقتالدى. سەبەبى ءالي الپىسباەۆتىڭ اۋەندەرى – ۋاقىتپەن ۇندەسكەن, جۇرەكپەن سەزىلەتىن, حالىقپەن بىرگە جاسايتىن قۇندى مۇرا. وسىلايشا, ناۋرىز مەيرامىنا ايرىقشا ءسان بەرگەن سىرشىل كونتسەرت جاندى تەربەگەن اۋەننىڭ, جاڭارعان ءومىردىڭ, ماڭگىلىك ونەردىڭ جارقىن رامىزىنە اينالدى.