بۇگىن – ۇلتتىق سپورت كۇنى. ءار وڭىردە كىلەم توسەلىپ اتان جىلىك, ءاپايتوس بالۋاندار بەلدەسەدى. كولدەنەڭ جاتقان قۇبا جوننىڭ توپىراعىن تۇياعىمەن تۋراعان تۇلپارلار ءدۇبىرى ەستىلەر الامان بايگە, ءباسى جوعارى كوكپار ۇيىمداستىرىلادى. بويجەتكەننىڭ بەتىنەن وبۋگە قۇمبىل قۋناق جىگىتتەر قىز قۋعا تۇسەدى.
ناۋرىزناما اياسىندا وتكىزىلەتىن سپورتتىق ءىس-شارالار سالاماتتى ءومىر سالتىن ناسيحاتتاۋعا, ۇلتتىق سپورت تۇرلەرىن دامىتىپ, قوعامدىق بىرلىكتى نىعايتۋعا باعىتتالعان. مەرەكەلىك جارىستار ءداستۇرلى تۇردە كوپ قاتىسۋشى مەن كورەرمەندى جيناپ, كوكتەمگى جاڭارۋ مەن بىرلىك مەرەكەسىنە اينالىپ كەلەدى.
اتاۋلى كۇنگە وراي جەر-جەردە سپورتتىق ويىندار, ءتۇرلى سايىستار ۇيىمداستىرىلادى. ماسەلەن, تۇركىستان قالاسىندا جاڭادان بوي كوتەرگەن اتشاباردا كوكپاردان الەم چەمپيوناتى تۇڭلىگىن ءتۇردى. سوڭعى رەت 2017 جىلى ۇيىمداستىرىلعان الەمدىك دودا اراعا توعىز جىل سالىپ قايتا جالاۋىن تىكتەدى. بيىلعى جاھاندىق سايىستا توعىز مەملەكەتتىڭ كوماندالارى باق سىنايدى. ەلىمىزدىڭ ۇلتتىق قۇراماسىنان سىرت رەسەي, وزبەكستان, تاجىكستان, قىرعىزستان, تۇركيا, ماجارستان, اۋعانستان, موڭعوليا ەلىنىڭ كوكپارشىلارى دوداعا كىردى. 17–19 ناۋرىز ارالىعىندا ىرىكتەۋ سايىسىن وتكىزگەن قاتىسۋشىلار بۇگىن جارتىلاي فينالدىق تارتىستى باستايدى.
بۇكىلالەمدىك كوكپار قاۋىمداستىعىنىڭ پرەزيدەنتى دانيار قوبىلانديننىڭ ايتۋىنشا, 11 ەلگە ساۋىن ايتىلىپ شاقىرتۋ جىبەرىلگەن. دوداعا قاتىسۋشىلارعا بارلىق جاعداي جاسالىپ, شەتەلدىك كوماندا وكىلدەرىنە جاراۋ ارعىماقتار بەرىلگەن.
كوكپاردان الەم چەمپيوناتى جاڭا ەرەجەمەن ءوتىپ جاتىر. دودانىڭ باس تورەشىسى جانىسبەك ساەۆ ەكى توپقا بولىنگەن كوماندالار ىرىكتەۋ كەزەڭىندە تارتىسقا ءتۇسىپ, فينالدىق كەزەڭگە ءبىرىنشى, ەكىنشى ورىن العان كوماندالار شىعاتىنىن اتاپ ءوتتى. بۇعان دەيىن ۇيىمداستىرىلعان دودا كەزىندە كوماندا ىرىكتەۋدە ءبىر رەت جەڭىلسە, فينالعا وتپەيتىن. كەيىنگى ەرەجە جۇمسارتىلىپ, توپتىق كەزەڭدە ءبىر رەت جەڭىلگەن كومانداعا دا فينالدىق تارتىسقا مۇمكىندىك بەرىلىپ وتىر. سودان بولار, الەم چەمپيونى اتاعىنان اركىم دە دامەلى.
قىتاي قۇراماسىن الاڭعا باستاپ شىققان نۇربولات ءتالىپباي ۇلى جىلدان-جىلعا كوكپار ويىنىنا قىزىعۋشىلىق ارتىپ كەلە جاتقانىن جەتكىزدى.
– قارسىلاس كوماندالاردىڭ دا الەۋەتى جوعارى. دەسە دە قازاق ەلىنىڭ ۇلتتىق قۇراماسى تەگەۋرىندى ەكەنىن بىلەمىز. بۇعان دەيىن سان مارتە تارتىسقا تۇستىك, سىرالعى كوكپارشىلار كوپشىلىگى. ءبىز دوداعا جەرگىلىكتى قىلقۇيرىقتى ءمىنىپ تارتىسقا تۇسەمىز. ارعىماقتاردىڭ ەكپىنى كۇشتى ەكەن, بىرتە-بىرتە سايگ ۇلىكتەردىڭ سىرىنا بوي ۇيرەتىپ كەلەمىز. الەم چەمپيوناتى جوعارى دەڭگەيدە ۇيىمداستىرىلىپ جاتىر, – دەيدى كوكپارشى.
ءبىر اپتاعا ۇلاساتىن الەم چەمپيوناتىنىڭ جۇلدە قورى – 30 ميلليون تەڭگە.
ۇلتتىق سپورت كۇنىنە وراي تۇركىستان شاھارىندا تاعى ءبىر ءدۇبىرلى دودا جالاۋىن جەلبىرەتتى. اسىق اتۋدان باستالعان الەم كۋبوگى ەرتەڭ مارەسىنە جەتەدى. ءتول ويىنىمىزدى ۇيرەنگەن قاتىسۋشىلار الەمنىڭ ءار قيىرىنان كەلىپ مەرگەندىگىن سىناپ جاتىر. تۋريزم جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتى, ۇلتتىق اسىق اتۋ فەدەراتسياسى مەن تۇركىستان وبلىسىنىڭ اكىمدىگى ۇيىمداستىرعان سايىستىڭ اتاعى جەر جارىپ تۇر. بۇعان دەيىن تەك ۇلتتىق ويىن دارەجەسىندە ناسيحاتتالىپ كەلگەن اسىق اتۋ كەيىنگى جىلدارى سپورت مارتەبەسىن الىپ, رەسمي فەدەراتسيا قۇرىلدى. ىلكىمدى ىستەردىڭ ناتيجەسىندە الەمدىك دودالار دا ۇيىمداستىرىلىپ كەلەدى.
تۋريزم جانە سپورت مينيسترلىگىنىڭ مالىمەتىنشە, ناۋرىزناما ونكۇندىگىندە ەلىمىزدە 747 سپورتتىق-بۇقارالىق ءىس-شارا وتەدى. ۇلىستىڭ ۇلى كۇنىنە وراي ۇيىمداستىرىلاتىن جارىستارعا شامامەن 150 مىڭ ادام قاتىسپاق. ءىس-شارالار بارلىق ءوڭىردى قامتىپ, اۋىلدىق وكرۋگتەردەن باستاپ اۋدان, قالا جانە وبلىس ورتالىقتارىن دا قامتيدى.
باعدارلاماعا نەگىزىنەن قازاق حالقىنىڭ داستۇرلەرى مەن مادەني مۇراسىن دارىپتەيتىن ۇلتتىق سپورت تۇرلەرى ەنگىزىلگەن. اتاپ ايتقاندا, قازاق كۇرەسى, اسىق اتۋ, جامبى اتۋ, توعىزقۇمالاق, ساداق اتۋ, قۇسبەگىلىك, اۋدارىسپاق, كوكپار, تەڭگە ءىلۋ سىندى سايىس تۇرلەرىنەن جارىسادى. سونىمەن قاتار مەيرام اياسىندا حالىق ويىندارى مەن سپورت جارىستارى دا وتكىزىلەدى. ولاردىڭ ىشىندە: قوي كوتەرۋ, جىلىك سىندىرۋ, لاڭگى تەبۋ, ارقان تارتۋ, الىپتار سايىسىنىڭ دا قىزىعى مول. سپورتتىق ءىس-شارالار بىرنەشە وڭىردە جوسپارلانعان, بۇل حالىقتىڭ ناۋرىزدى مەرەكەلەۋى جوعارى ەكەنىن ايقىنداي تۇسسە كەرەك.