ناۋرىز مەرەكەسى قارساڭىندا قالالىق مادەنيەت سارايىندا جاس جىرشىلار تاۋلىك بويى كەزەك-كەزەك قيسسالار مەن داستاندار, تەرمە, حالىق كومپوزيتورلارىنىڭ شىعارمالارىن ورىندادى. جىراۋلىق ءداستۇردى دارىپتەۋگە ارنالعان اۋقىمدى جيىن «ەر ەدىگە» جىر مەكتەبىنىڭ باستاماسىمەن جۇزەگە استى. 24 ساعات بويى جىرمەن كومكەرگەن 36 جىرشىنىڭ ونەرىن ازيا مەن افريكا ەلدەرى بويىنشا حالىقارالىق GBR ساراپشىلارى باقىلاپ, دۇنيەجۇزىلىك رەكوردتار كىتابىنا ەنگىزدى, دەپ حابارلايدى Egemen.kz.
سايىستىڭ باستى شارتى – دومبىراسىن قولعا الىپ ورتاعا شىققان جىرشى ءبىر ءسات تە توقتاماۋى كەرەك. جينالعان كوپشىلىك وسى ونەر مەرەكەسىن وڭىردە ءۇزىلىپ قالعان جىراۋلىق ءداستۇردى قايتا جاڭعىرتۋدىڭ ۇلگىسى دەپ باعالاپ, ساحناعا شىققان ورىنداۋشىلاردى جىگەرلەندىرىپ وتىردى.
ءداستۇر مەن تۇلعا: جىراۋلىق جولدىڭ ساباقتاستىعى
ونەر كورسەتكەندەردىڭ اراسىنان «قىرىمنىڭ قىرىق باتىرى», «پايعامبارلار قيسساسى» سياقتى ۇزاق داستانداردى بىرنەشە ساعات مۇدىرمەي جىرلاعان تالانتتى جاستار ەرەكشە كوزگە ءتۇستى.
«ساحناعا شىققانداردىڭ ورىنداۋشىلى ونەرى دە ءارتۇرلى بولدى. كەيبىرى 20-40 مينۋت اراسىندا قىسقا تولعاۋلاردى ورىنداسا, كەيبىرى 3-4 ساعاتقا دەيىن داستانداردى توقتاۋسىز جىرلادى. بۇل جەردە قاتىسۋشىلارعا ەش شەكتەۋ قويىلمادى. بارلىعىنا ساحنا كيىمى, داۋىس ىرعاعى, ۇلتتىق اسپاپپەن جىردىڭ ماقامىن بۇزباي ورىنداۋ سيقتى ورتاق تالاپتار قويىلدى», دەيدى «ەر ەدىگە» جىر مەكتەبىنىڭ جەتەكشىسى ادىلبەك سارين.
اقتوبە وبلىسى.