كەشە استانادا قازاقستان كوممۋنيستىك حالىق پارتياسىنان (قكحپ) كانديدات تۇرعىن سىزدىقوۆتى قولدايتىن رەسپۋبليكالىق سايلاۋالدى شتابتىڭ تۇساۋكەسەرى بولىپ ءوتتى. ول استانا قالاسىندا ورنالاسقان.
شاراعا قكحپ ورتالىق كوميتەتىنىڭ حاتشىسى, قازاقستان رەسپۋبليكاسى پرەزيدەنتتىگىنە كانديدات تۇرعىن سىزدىقوۆ, قكحپ وك حاتشىسى جامبىل احمەتبەكوۆ, «حالىقتىق كوممۋنيستەر» فراكتسياسىنىڭ جەتەكشىسى ۆلاديسلاۆ كوسارەۆ, رەسپۋبليكالىق سايلاۋالدى شتابىنىڭ باسشىسى, پارلامەنت ءماجىلىسىنىڭ دەپۋتاتى ايقىن قوڭىروۆ, باق وكىلدەرى قاتىستى.
سونىمەن, قكحپ-دان كانديدات تۇرعىن سىزدىقوۆتى قولداۋ سايلاۋالدى شتابىنا ءماجىلىس دەپۋتاتى ايقىن قوڭىروۆ باسشىلىق جاسايتىن بولدى.
سايلاۋالدى شتابى سايلاۋالدى ناۋقانىنا قاتىسۋشى تۇرعىن سىزدىقوۆقا قولداۋ كورسەتۋدى الدىنا ماقسات ەتىپ قويعان. شتابتىڭ ءمىندەتىنە, سونداي-اق, پارتيانىڭ وڭىرلەردەگى بەلسەندىلىگىن ارتتىرۋ, پارتيانى جاقتاۋشىلاردى سايلاۋالدى ءمىندەتتەردى تابىستى شەشۋ ءۇشىن جۇمىلدىرۋ بويىنشا جۇمىستار جۇرگىزۋ جاتادى.
تۇساۋكەسەر بارىسىندا قازاقستان رەسپۋبليكاسى پرەزيدەنتتىگىنە كانديدات تۇرعىن سىزدىقوۆتىڭ كومانداسى ۇگىت ناۋقانى كەزىندەگى وزدەرىنىڭ جوسپارلارىمەن ءبولىستى.
شتاب باسشىسى ايقىن قوڭىروۆ بريفينگتە جينالعانداردى سايلاۋ ناۋقانىنىڭ جوسپارلارىمەن تانىستىردى.
«ءبىزدىڭ جوسپارىمىز ءىس جۇزىندە بۇكىل سايلاۋالدى ناۋقانىنا دەرلىك جازىپ قويىلعان. بۇلار – زاۋىتتار مەن فابريكالاردىڭ ەڭبەك ۇجىمدارىمەن جانە ءبىزدىڭ پارتيامىزدىڭ قوعامدىق قابىلداۋلارىندا قاراپايىم ازاماتتارمەن كەزدەسۋلەر وتكىزۋ», دەپ اتاپ ءوتتى ا.قوڭىروۆ.
سونداي-اق, كەشە قكحپ-دان پرەزيدەنتتىككە كانديدات تۇرعىن سىزدىقوۆتى قولداۋ سايلاۋالدى شتابى ۇگىت پويىزىنىڭ تۇساۋكەسەرى ءوتتى.
بۇل – پارتيانىڭ سيمۆوليكاسىمەن بەزەندىرىلگەن ءۇش ماشينادان تۇراتىن اۆتوكەرۋەن. شتاب باسشىسى ايقىن قوڭىروۆ اتاپ وتكەندەي, ۇگىت پويىزىنىڭ العاشقى توقتايتىن جەرى كوكشەتاۋ قالاسى, ياعني اقمولا وبلىسىنىڭ ورتالىعى بولادى. ءدال سول جەردە حالىقتىق كوممۋنيستەر وزدەرىنىڭ سايلاۋالدى تۇعىرناماسىن ناسيحاتتاۋدى باستاپ, قكحپ-دان ۇمىتكەر ءۇشىن ۇگىت جۇمىستارىن جۇرگىزەدى.
كوكشەتاۋدا كانديداتتىڭ جاستار وكىلدەرىمەن جانە وبلىستاعى بىرقاتار كاسىپورىنداردىڭ ەڭبەك ۇجىمدارىمەن كەزدەسۋلەرى جوسپارلانعان.
ودان ءارى دەلەگاتتار قوستاناي, پەتروپاۆل, الماتى جانە قازاقستاننىڭ باسقا قالالارىنا ساپار شەگەدى. بارلىعى 40 شارا جوسپارلانىپ وتىرسا, كانديداتتىڭ كەم دەگەندە 11 مارتە جۇرتشىلىق الدىندا ءسوز سويلەۋى بەلگىلەنگەن.
قازىر, كوممۋنيستەردىڭ وزدەرى اتاپ كورسەتكەندەي, رەسۋرستاردى جۇمىلدىرۋ قاجەت. بۇگىنگى كۇش كەڭ اۋقىمدى ناسيحات پەن شتاب جۇمىسى ءۇشىن جەتكىلىكسىز. ەسكە سالا كەتسەك, ۇگىت ناۋقانى ءبىر اي دەرلىك ۋاقىت – «تىنىشتىق كۇنىنە» دەيىن جۇرەتىن بولادى.
قازاقستان رەسپۋبليكاسى پرەزيدەنتتىگىنە كانديدات تۇرعىن سىزدىقوۆ ءوزىنىڭ سوزىندە اتالعان ەلەكتوراتتىق ناۋقاننىڭ ماڭىزدىلىعىن اتاپ كورسەتتى: «ءبىز سايلاۋ ۇدەرىسىنە العاش رەت قاتىسىپ وتىرعان جوقپىز, ءبىز ءۇشىن بۇل ەش جاڭالىق ەمەس. ءبىز بەرىلىپ وتىرعان مۇمكىندىكتى حالىققا ءوزىمىزدىڭ باعدارلامانى تاعى ءبىر مارتە جەتكىزۋ ءۇشىن, ءوزىمىزدىڭ ماقساتتارىمىز بەن مىندەتتەرىمىزدى تانىستىرۋ ءۇشىن, سايلاۋالدى تۇعىرنامامىزدىڭ باسىمدىقتارىن ەگجەي-تەگجەيلىرەك ءتۇسىندىرۋ ءۇشىن پايدالانعىمىز كەلەدى», دەدى ول.
«جۇمىستى ادال, تولەرانتتى ءجۇرگىزەتىن بولامىز. سەبەبى, ادامدار كىمنىڭ قانداي باعدارلامانى ۇسىنىپ وتىرعانىن جانە ونىڭ قايدا اپاراتىنىن انىق بىلۋلەرى ءتيىس.
ءبىزدىڭ سايلاۋالدى تۇعىرنامامىزدىڭ قۇرامداسىنىڭ ءبىرى ازاماتتارىمىزدىڭ كەلەشەك بۋىنى ءۇشىن تەڭدەي العىشارتتار مەن مۇمكىندىكتەر تۋعىزۋ, ءتيىمدى الەۋمەتتىك ليفتىلەر مەن جوعارى قوعامدىق مۇراتتار ءۇشىن جاعدايلار جاساۋ بولىپ تابىلادى», دەدى شتابتىڭ تۇساۋكەسەرى كەزىندە پرەزيدەنتتىكتەن ۇمىتكەر تۇرعىن سىزدىقوۆ. تۇساۋكەسەر اياقتالعان سوڭ شاقىرىلعاندارعا ۇگىت ماتەريالدارىنىڭ ۇلگىلەرى ۇلەستىرىلدى.
اتاپ كورسەتەتىن ءبىر جايت – كەشە سايلاۋالدى شتابتارى ەلىمىزدىڭ بارلىق وڭىرلەرىندە اشىلدى.
كانديدات تۇرعىن سىزدىقوۆ 1966 جىلى قازاقستاننىڭ اۋىل شارۋاشىلىعىن مەحانيكالاندىرۋ جانە ەلەكترلەندىرۋ تەحنيكۋمىن «تەحنيك-مەحانيك» ماماندىعى بويىنشا بىتىرگەن. 1974 جىلى ماسكەۋدە بلكجو وك جانىنداعى جوعارى كومسومول مەكتەبىنىڭ تۇلەگى اتانسا, 10 جىلدان سوڭ تسەلينوگراد اۋىل شارۋاشىلىعى ينستيتۋتىن «عالىم-اگرونوم» ماماندىعىن الىپ, ءتامامداپ شىقتى.
كانديدات تۇرعىن سىزدىقوۆ ءوزىنىڭ ەڭبەك جولىن سلەسار بولىپ باستاعان. كەيىنىرەك تراكتورشى, مەحانيك جانە «كازاحسەلماش» زاۋىتىندا شەبەر بولىپ ىستەدى. كسرو كەزىندە كوممۋنيستەر قاتارىنا الىندى. سول كەزدە بۇگىنگى كانديدات 26 جاستا بولسا, قازىر 67-دە. بۇگىن ول پارتيا ورتالىق كوميتەتىنىڭ حاتشىسى لاۋازىمىن يەلەنىپ وتىر.