ازاماتتىق جاۋاپكەرشىلىكتى ۇستانىپ, ەل بولىپ جۇمىلعان جۇمىستىڭ نەگىزىندە 15 ناۋرىزدا اتا زاڭدى قولداعاندار 80 پايىزدان استى. كەشە عانا سالتاناتتى جيىندا پرەزيدەنت قاسىم-جومارت توقاەۆ جاڭا كونستيتۋتسيامىزدى قابىلدادى. حالىقتىڭ كەڭ قولداۋىمەن قابىلدانۋى نەگىزگى قۇجاتتىڭ لەگيتيمدىگىن ارتتىرادى جانە رەفورمالاردى جۇزەگە اسىرۋدا تۇراقتى نەگىز بەرەدى.
بۇگىندە ەلىمىز دامۋ جولىنداعى وتە جاۋاپتى كەزەڭدى وتكەرىپ جاتىر. وتانداستارىمىز تاراپىنان جولدانعان 10 مىڭنان اسا ۇسىنىس نەگىزىندە 130 ادامنان تۇراتىن كونستيتۋتسيالىق كوميسسيا قۇرىلىپ, جاڭا اتا زاڭنىڭ جوباسى ۇسىنىلدى. 12 وتىرىس, ودان بولەك, سەكتسيالىق توپتاردىڭ, باق وكىلدەرى, زاڭگەرلەر مەن لينگۆيستەر, فيلولوگتەر مەن ساياساتتانۋشىلاردىڭ سۇزگىسىنەن وتكەن ماڭىزدى قۇجات رەفەرەندۋمعا شىعارىلدى. كەيىن جالپىۇلتتىق كواليتسيا مۇشەلەرى جاڭا كونستيتۋتسيانى الىس-جاقىن ورنالاسقان وتانداستارىمىزعا ەگجەي-تەگجەيلى ءتۇسىندىردى. ءوزىم دە وڭىرلەردە بولىپ, جەرگىلىكتى تۇرعىندارمەن وتكەن تالقىلاۋلارعا قاتىستىم. سول كەزدەسۋلەر بارىسىندا حالىقتىڭ قىزىعۋشىلىق تانىتىپ, قىزۋ قولداپ وتىرعانىنا كوز جەتكىزدىم.
اتا زاڭ – زاڭدىق قادام عانا ەمەس, قوعام مەن مەملەكەت اراسىنداعى سەنىمنىڭ نىعايۋىنىڭ ايقىن كورىنىسى. قابىلدانعان كونستيتۋتسياعا سايكەس, قحا جۇمىسى جاڭا فورماتتا جالعاسادى. اسسامبلەيا مەن ۇلتتىق قۇرىلتاي نەگىزىندە قازاقستان حالىق كەڭەسى قۇرىلادى. بۇل جاڭا ينستيتۋت قۇرامىندا ەتنومادەني بىرلەستىكتەردىڭ وكىلدەرى, قوعامدىق ۇيىمدار, جەرگىلىكتى ءماسليحاتتار مەن قوعامدىق كەڭەستەر وكىلدەرى بىرلەسە جۇمىس ىستەپ, قوعامداعى تۇراقتىلىقتى, كەلىسىم مەن ىنتىماقتى نىعايتۋعا قىزمەت ەتەدى.
ەندىگى باستى ماقسات – كونستيتۋتسيانى حالىققا ءتۇسىندىرۋ, ناسيحاتتاۋ جانە قوعامنىڭ ناقتى ومىرىنە ەنگىزۋ. بۇل ءۇشىن كەز كەلگەن باعىتتاعى ۇيىمدار مەن عالىمداردىڭ ءرولى ەرەكشە ماڭىزدى. سەبەبى ولار جاڭا زاڭداردىڭ ءمانىن تەرەڭىنەن ءتۇسىندىرىپ, جۇرتشىلىقتىڭ سۇرانىسىن زاڭ جوبالارىنا دۇرىس ەنگىزۋگە كومەكتەسەدى.
جاڭا كونستيتۋتسيانى قابىلداۋ – جاۋاپكەرشىلىكتىڭ باستاماسى. ەندىگى مىندەت – ونى قوعامعا جەتكىزۋ, سول ارقىلى عانا ءبىز تۇراقتى, ادىلەتتى جانە ساپالى قوعام قۇرا الامىز.
الىشەر ساتۆالديەۆ,
سەنات دەپۋتاتى