قازاقستان رەسپۋبليكاسى ورتالىق سايلاۋ كوميسسياسى 24 ناۋرىزداعى ءوزىنىڭ وتىرىسىندا ياكوبجان جۇنىسبەكوۆتى, قايرات الەمباي ۇلى مايشەۆتى, ايگۇل دۇيسەنبايقىزى وتەپوۆا مەن امانتاي حانتەمىر ۇلى اسىلبەكتى قازاقستان رەسپۋبليكاسىنىڭ پرەزيدەنتتىگىنە كانديداتتار رەتىندە تىركەۋدەن باس تارتۋ تۋرالى قاۋلىلار قابىلداعان بولاتىن.
بۇل شەشىم اتالعان كانديداتتار لينگۆيستيكالىق كوميسسيانىڭ وتىرىستارىنا كەلمەگەندىكتەن, ولاردىڭ كونستيتۋتسيا مەن «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ كانديداتتارعا قويىلاتىن تالاپتارىنىڭ مەملەكەتتىك ءتىلدى ەركىن مەڭگەرگەندىگىن انىقتاۋ بولىگىندە سايكەستىگىنىڭ بەلگىلەنبەۋىنە بايلانىستى تۋىندادى.
سونداي-اق, ورتالىق سايلاۋ كوميسسياسى قانات سابىر ۇلى ەسجانوۆ پەن ءبىرجان جەتىرۋ ۇلى دىلماعامبەتتى ولاردىڭ مەملەكەتتىك ءتىلدى ەركىن مەڭگەرگەندىگىن انىقتاۋ راسىمىنەن وتۋدەن باس تارتۋلارىنا بايلانىستى قازاقستان رەسپۋبليكاسىنىڭ پرەزيدەنتتىگىنە كانديدات رەتىندە تىركەۋدەن باس تارتتى.
سونىمەن قاتار, ورتسايلاۋكوم حاتشىسى ب.س.مەلدەشوۆ مۇحامەدراحيم قادىرباي ۇلى قۇرساباەۆتان, مەلس حامزا ۇلى ەلەۋسىزوۆ پەن جاقسىباي ءابىش ۇلى بازىلباەۆتان ءوز كانديداتۋرالارىن الىپ تاستاۋ تۋرالى جازباشا وتىنىشتەرى تۇسكەنى تۋرالى كوميسسيانى اقپاراتتاندىردى.