استانا. 26 ماۋسىم. ەرتەڭ, 27 ماۋسىمدا يتاليانىڭ ميلان قالاسىندا ءوتىپ جاتقان Expo Milano-2015 كورمەسىندە قازاقستاننىڭ ۇلتتىق كۇنى اتاپ وتىلەدى. بۇل تۋرالى «استانا ەكسپو-2017» ۇلتتىق كومپانياسىنىڭ ءباسپاسوز قىزمەتىنە سىلتەمە جاساعان «قازاقپارات» حابارلادى.
شاراعا مەملەكەت باسشىسى نۇرسۇلتان نازارباەۆ قاتىسادى. ساپارى اياسىندا يتاليا مەن قازاقستاننىڭ مەملەكەت باسشىلارى مەن بيزنەس-توپتارىنىڭ كەزدەسۋلەرى وتەدى دەپ كۇتىلۋدە. پرەزيدەنت قازاقستاننىڭ پاۆيلونىندا يتاليانىڭ پرەمەر-مينيسترىمەن كەزدەسەدى, سونان سوڭ قازاقستاندىق-يتالياندىق بيزنەس-فورۋم وتەدى. مۇندا جالپى سوماسى 500 ملن. دوللاردى قۇرايتىن شامامەن 20 كەلىسىمگە قول قويۋ جوسپارلانعان.
ۇلتتىق كۇندى وتكىزۋ – ءوز مەملەكەتىڭدى الەمگە تانىستىرۋعا, ونىڭ تاريحى مەن داستۇرلەرى تۋرالى ايتۋعا ءساتتى مۇمكىندىك. قازاقستان 2005 جىلدان بەرى دۇنيەجۇزىلىك كورمەگە قاتىسىپ كەلەدى. بىراق بيىل مەملەكەتتىڭ پاۆيلونى ەرەكشە ورىنعا يە بولىپ وتىر. EXPO Milano-2015 كورمەسىندە قازاقستان پاۆيلونىنىڭ العاشقى ەكى ايدا تۋريستەر مەن كورمە قوناقتارىنىڭ ەرەكشە قىزىعۋشىلىعىن تۋدىردى.
«Factsand Fiction» نەمىس كومپانياسىمەن قۇرىلعان ءبىزدىڭ پاۆيلون «قازاقستان – مۇمكىندىكتەر مەملەكەتى» تاقىرىبىمەن تانىستىرىلدى. يتاليانىڭ باق دەرەكتەرى بويىنشا ءبىزدىڭ پاۆيلون تۋرسيت ەڭ كوپ كەلەتىن ۇزدىك بەستىككە كىرەدى. مۇندا ءبىر جولعى وتكىزۋ مۇمكىندىگى 80 ادام. ال كۇندەلىكتى كەلۋشىلەردىڭ سانى شامامەن 4 500 ادامعا جەتەدى.
EXPO Milano-2015 دۇنيەجۇزىلىك كورمەسىندە GAZZETTA DI PARMA كۇندەلىكتى گازەتى قازاقستاننىڭ پاۆيلونىن «كورۋگە تۇرارلىق وندىقتىڭ» قاتارىنا قوستى. مۇنىمەن قوسا, بەلگىلى Reppublica باسىلىمى ارقىلى ۇيىمداستىرىلعان داۋىس بەرۋ ناتيجەسى بويىنشا قازاقستاننىڭ پاۆيلونى بۇگىنگى كۇنى كولۋمبيادان كەيىن ەكىنشى ورىنعا يە بولىپ وتىر.
كورمە جۇمىسى باستالعاننان بەرى قازاقستاننىڭ پاۆيلونىن موناكو حانزاداسى, قىتاي پرەمەر-ءمينيسترى, گەرمانيا مەن ۆەنگريانىڭ ەكونوميكا مينيسترلەرى جانە لوندون قالاسى مەرى اكىمى كەلىپ تاماشالادى.
ۇلتتىق پاۆيلون ەكى ماقساتتى كوزدەيدى – ءوز مەملەكەتىن لايىقتى تۇردە تانىستىرۋ, دۇنيەجۇزىلىك جارمەڭكەنىڭ باستى كورنەكتى ورنىنا اينالۋ جانە استانا قالاسىندا ەكسپو-2017 كورمەسىندە قوناقتارعا تاڭعاجايىپ شوۋ ۇسىنىلاتىنىن كورسەتۋ.
اۋدانى 3 000 شارشى مەتردى قۇرايتىن ەكى قاباتتى عيمارات «ەگىنشىلىك», «مال شارۋاشىلىعى», «قازاقستان تۋرالى قىزىقتى فاكتىلەر», «قازاقستاننىڭ اكۆامادەنيەتى», «قازاقستاننىڭ ەكولوگياسى» جانە «بولاشاق اۋىل شارۋاشىلىعى» سياقتى تاقىرىپتارمەن بىرنەشە ەكسپوزيتسيالىق ايماقتارعا بولىنگەن. پاۆيلونعا كەلۋشىلەر تابيعي جانە اۋىل شارۋاشىلىعى رەسۋرستارىن قورعاۋ تاقىرىبىمەن, قازاقستاننىڭ مادەنيەتىمەن جانە مەملەكەت كوزدەگەن تۇراقتى دامۋ يدەيالارىنىڭ قاعيداتتارىمەن تانىسادى.
وسى جىلدىڭ 1 مامىرىندا اشىلعان ميلانداعى كورمە 31 قازانعا دەيىن جالعاسادى.
ەلامان قوڭىر.
دەرەك, سۋرەت: «قازاقپارات».