بۇگىن جاڭا كونستيتۋتسيانى قابىلداۋ جونىندەگى جالپىۇلتتىق رەفەرەندۋم بارىسىنا جۇرگىزىلگەن قوعامدىق باقىلاۋ جۇمىسىنىڭ قورىتىندىسىنا ارنالعان ءباسپاسوز ءماسليحاتى ءوتتى. «AMANAT» پارتياسىنىڭ وكىلدەرى تۇتاس ەل اۋماعىندا جۇرگىزىلگەن اۋقىمدى مونيتورينگ دەرەكتەرىنە سۇيەنە وتىرىپ, داۋىس بەرۋ بارىسىنا جان-جاقتى تالداۋ جاسادى. رەفەرەندۋم كۇنى پارتيا 22 مىڭعا جۋىق بايقاۋشىنىڭ جۇمىسىن ۇيىمداستىردى. ولار ەلىمىزدىڭ بارلىق وڭىرىندەگى سايلاۋ ۋچاسكەلەرىندە ءراسىمنىڭ اشىقتىعىن قامتاماسىز ەتىپ, قولدانىستاعى زاڭ نورمالارىنىڭ قاتاڭ ساقتالۋىن قاداعالادى, دەپ حابارلايدى Egemen.kz.
ءباسپاسوز كونفەرەنتسياسىندا «AMANAT» پارتياسى ساياسي جۇمىس دەپارتامەنتى ديرەكتورىنىڭ ورىنباسارى, پارتيا بايقاۋشىلارىنىڭ جۇمىسىن ۇيلەستىرۋشى گۇلنار نۇراحمەتحانوۆا جانە پارتيانىڭ ساياسي جۇمىس دەپارتامەنتىنىڭ قىزمەتكەرى ارعىن تەمىرجانوۆ ءسوز سويلەدى.
«بۇل رەفەرەندۋم ازاماتتاردىڭ ەل بولاشاعىنا قاتىستى ءوز پىكىرىن بىلدىرۋگە مۇمكىندىك بەرگەن ماڭىزدى قادام بولدى. باقىلاۋ ناتيجەلەرى داۋىس بەرۋ پروتسەسىنىڭ اشىق جانە زاڭ تالاپتارىنا ساي وتكەنىن كورسەتتى. ءبىزدىڭ بايقاۋشىلار جەلىسى ەل تاريحىنداعى ەڭ ءىرى قوعامدىق باقىلاۋ قۇرىلىمدارىنىڭ بىرىنە اينالدى» دەدى گۇلنار نۇراحمەتحانوۆا.
سپيكەردىڭ ايتۋىنشا, ساياسي ناۋقان باستالعانعا دەيىن بارلىق بايقاۋشىلار ارنايى وقىتۋ كۋرستارىنان ءوتىپ, ءتيىستى دايىندىقتان وتكەن.
«رەفەرەندۋم الدىندا بارلىق بايقاۋشىلار ارنايى وقىتۋ كۋرستارىنان وتكەنىنە ەرەكشە نازار اۋدارىلدى. ناقتىراق ايتقاندا, 2-13 ناۋرىز ارالىعىندا ونلاين جانە وفلاين سەمينارلار ۇيىمداستىرىلدى, بايقاۋشىلاردىڭ قۇقىقتارى مەن مىندەتتەرى, سايلاۋ زاڭناماسى مەن باقىلاۋ جۇرگىزۋ ءتارتىبى جان-جاقتى وقىتىلدى, داۋىس بەرۋ راسىمدەرىنىڭ اشىقتىعىن قامتاماسىز ەتۋ ماسەلەلەرى تالقىلاندى», دەدى ول.
تاۋەلسىز باقىلاۋشىلار: بيۋللەتەندەردى سۋرەتكە ءتۇسىرىپ, ينتەرنەتكە جاريالاعاندار بولدى
ءباسپاسوز ءماسليحاتى بارىسىندا رەفەرەندۋم كۇنى ەلىمىزدىڭ كوپ وڭىرىندە تىنىشتىق پەن اشىقتىق ساقتالعانى اتاپ ءوتىلدى. ءوز تاڭداۋىن جاساۋ ءۇشىن ۋچاسكەلەرگە كەلگەن ازاماتتاردىڭ جوعارى بەلسەندىلىگى بايقالدى. بايقاۋشىلار وڭ الەۋمەتتىك احۋالدى اتاپ ءوتتى: وتباسىلار, ءارتۇرلى بۋىن وكىلدەرى, سپورتشىلار جانە العاش رەت داۋىس بەرىپ وتىرعان جاستار داۋىس بەرۋ ۋچاسكەلەرىنە كوپتەپ كەلدى.
ءوز كەزەگىندە, پارتيا وكىلى ارعىن تەمىرجانوۆ ماڭىزدى قوعامدىق-ساياسي وقيعا بارىسى جونىندە پىكىر ءبىلدىردى.
«بايقاۋشىلارىمىز ەل اۋماعىنداعى بارلىق ۋچاسكەدە جۇمىس ىستەدى. جالپى العاندا داۋىس بەرۋ بارىسى تىنىش, ۇيىمداسقان جانە اشىق جاعدايدا ءوتتى. تاڭ مەزگىلىنەن باستاپ-اق ازاماتتاردىڭ جوعارى بەلسەندىلىگىن بايقادىق. ۋچاسكەلەرگە وتباسىمەن بىرگە كەلگەن ادامدار كوپ بولدى. بۇل رەتتە, جاستار دا بەلسەندى قاتىستى. ولاردىڭ اراسىندا العاش رەت داۋىس بەرگەندەر دە بار. بۇل قوعامنىڭ جوعارى ازاماتتىق جاۋاپكەرشىلىگىن جانە ەل بولاشاعىنا دەگەن قىزىعۋشىلىعىن كورسەتەدى», دەدى ول.
مونيتورينگ بارىسىندا جەكەلەگەن ۋچاسكەلەردە تەحنيكالىق نەمەسە راسىمدىك سيپاتتاعى بولماشى ەسكەرتۋلەر تىركەلگەنىمەن, ونىڭ بارلىعى زاڭدا بەلگىلەنگەن تارتىپپەن ۋچاسكەلىك كوميسسيالار تاراپىنان جەدەل تۇردە شەشىلدى.
جالپى العاندا, «AMANAT» پارتياسى بايقاۋشىلارىنىڭ باعالاۋىنشا, داۋىس بەرۋ بارىسى زاڭ تالاپتارىنا تولىق سايكەس كەلىپ, جۇيەلى ۇيىمداستىرىلعان ءارى اشىق ءوتتى. تۇرعىنداردىڭ رەكوردتىق دەڭگەيدە قاتىسۋى قوعامنىڭ ستراتەگيالىق مەملەكەتتىك مىندەتتەردى شەشۋ ىسىنە اتسالىسۋعا دايىن ەكەنىن كورسەتتى. ءىس-شارا سوڭىندا پارتيا وكىلدەرى باقىلاۋ ميسسياسىنا قاتىسقان بارلىق بايقاۋشىعا, كوميسسيا مۇشەلەرىنە جانە ءوز كونستيتۋتسيالىق بورىشىن ورىنداعان ازاماتتارعا شىنايى العىسىن ءبىلدىردى.
تۇركيا جوعارى سايلاۋ كەڭەسىنىڭ توراعاسى قازاقستانداعى رەفەرەندۋمعا وڭ باعا بەردى
بۇعان دەيىن قازاقستان رەسپۋبليكاسىنىڭ ورتالىق رەفەرەندۋم كوميسسياسى ەل اۋماعىنداعى رەسپۋبليكالىق ۋچاسكەلەردەگى داۋىس بەرۋدىڭ الدىن الا ناتيجەلەرىن جاريالاعان بولاتىن. كوميسسيا دەرەكتەرىنە سايكەس, داۋىس بەرۋگە قاتىسۋ دەڭگەيى 73,12 پايىزدى قۇرادى. باس-اياعى داۋىس بەرۋگە 9 127 192 ادام قاتىستى.
الدىن الا مالىمەتتەرگە سايكەس, ۇسىنىلعان وزگەرىستەردى قابىلداۋدى 7 954 667 ادام, ياعني داۋىس بەرۋگە قاتىسقانداردىڭ 87,15 پايىزى قولداپ داۋىس بەردى. ال 898 099 ازامات قارسى داۋىس بەردى. 146 558 بيۋللەتەن جارامسىز دەپ تانىلدى.
رەسەي وسك وكىلى: قازاقستانداعى رەفەرەندۋم زاڭ تالاپتارىنا ساي ءوتتى