قازاقستان رەسپۋبليكاسى پرەزيدەنتىنىڭ جانىنداعى ورتالىق كوممۋنيكاتسيالار قىزمەتىندە ءبىلىم جانە عىلىم ۆيتسە-ءمينيسترى ەسەنعازى يمانعاليەۆ پەن مينيسترلىكتىڭ مەكتەپكە دەيىنگى جانە ورتا ءبىلىم, اقپاراتتىق تەحنولوگيالار دەپارتامەنتىنىڭ ديرەكتورى جاڭىل جونتاەۆانىڭ قاتىسۋىمەن «نۇرلى جول» باعدارلاماسىن ىسكە اسىرۋ شەڭبەرىندە مەكتەپكە دەيىنگى جانە ورتا ءبىلىم بەرۋدى دامىتۋ» تاقىرىبىندا بريفينگ وتكىزىلدى.
مينيسترلىك جەرگىلىكتى اتقارۋشى ورگاندارمەن بىرلەسە وتىرىپ, ۇلتتىق قور قاراجاتى ەسەبىنەن اپاتتى جانە ءۇش اۋىسىمدى مەكتەپتەردىڭ ورنىنا قۇرىلىس سالۋعا قاجەت ءبىلىم ۇيالارىنىڭ سانىن انىقتاعان. ەلباسىنىڭ قازاقستان حالقىنا ارناعان «نۇرلى جول – بولاشاققا باستار جول» اتتى جولداۋىنىڭ شەڭبەرىندە جۇرگىزىلگەن جۇمىستىڭ ناتيجەسىندە ۇلتتىق قور ەسەبىنەن 2015-2017 جىلدارعا جالپى سوماسى 61,9 ملرد. تەڭگەنى قۇرايتىن 73 مەكتەپتىڭ قۇرىلىسى جوسپارلانىپتى. ياعني ءۇش اۋىسىمدى ساباقتاردى جويۋ ءۇشىن ۇلتتىق قوردان 57 مەكتەپ, اپاتتى مەكتەپتەردىڭ ورنىنا 16 مەكتەپ سالۋ قاراستىرىلىپ وتىر ەكەن.
رەسپۋبليكادا 8467 مەكتەپكە دەيىنگى ۇيىم تىركەلىپ, ولارعا 727,4 مىڭ بالا بارادى. ونىڭ ىشىندە 3832 بالاباقشا (541,5 مىڭ بالا) جانە 4635 شاعىن ورتالىق (185,8 مىڭ بالا) بار. بالالاردى مەكتەپكە دەيىنگى ۇيىمدارمەن قامتۋ 78,6%-دى قۇرايدى.
رەسپۋبليكانىڭ 6 وڭىرىندە – الماتى (62,9%), ماڭعىستاۋ (68,1%), وڭتۇستىك قازاقستان (72,4%), جامبىل (70,9%) وبلىستارىندا جانە الماتى (64,7%) مەن استانا (63,1%) قالالارىندا بالالاردى مەكتەپكە دەيىنگى ورىندارمەن قامتۋ رەسپۋبليكالىق دەڭگەيدەن تومەن, ولاردا 2020 جىلعا قاراي 100% نىسانالى كورسەتكىشىنە قول جەتكىزبەۋ قاۋپى بار. وسىعان بايلانىستى جوعارىدا كورسەتىلگەن وڭىرلەردىڭ ماڭعىستاۋ وبلىسىنان (2 بالاباقشا) باسقا ارقايسىسىندا ۇلتتىق قور قاراجاتى ەسەبىنەن جالپى سوماسى 15,39 ملرد. تەڭگە تۇراتىن 3 بالاباقشادان, باسقا وڭىرلەردە 1 بالاباقشانىڭ قۇرىلىسى قولعا الىنباق. جالپى العاندا, وسى شارالار 2018 جىلعا قاراي ءۇش اۋىسىمدى جانە اپاتتى مەكتەپتەردى جويۋعا جانە مەكتەپكە دەيىنگى ۇيىمداردا ورىن تاپشىلىعى ماسەلەسىن تۇبەگەيلى شەشۋگە مۇمكىندىك بەرەدى.
بەرىك سادىر,
«ەگەمەن قازاقستان».