«Astana Musical» مەملەكەتتىك تەاترى كورەرمەنگە «Sulu: حور-كونتسەرت» اتتى ەرەكشە مۋزىكالىق جوباسىن ۇسىندى. تەاتر ارتىستەرى دايىنداعان بۇل كەش ءداستۇرلى كونتسەرت فورماتىنان وزگەشە, مۋزىكا مەن تەاتر ونەرىن شەبەر ۇشتاستىرعان تەاترلاندىرىلعان قويىلىم رەتىندە ءوتتى.
كەش شىمىلدىعى اشىلعان ساتتەن-اق كورەرمەن ايرىقشا شىعارماشىلىق اتموسفەراعا ەندى. ساحناداعى ءار ءنومىر مۋزىكالىق ورىنداۋ, اكتەرلىك شەبەرلىك پەن بي ەلەمەنتتەرى ارقىلى كوركەم ءورىلىپ, حور ونەرىنىڭ جاڭا قىرىن تانىتتى. ارتىستەردىڭ ۇيلەسىمدى ورىنداۋى, ساحنالىق پلاستيكاسى مەن مۋزىكالىق دراماتۋرگياسى كەشكە ايرىقشا كوركەمدىك سيپات بەرگەن جوبانىڭ باس حورمەيستەرى – المات ابىشەۆ.
كونتسەرتتىك باعدارلاما مازمۇنى جاعىنان دا الۋان ءتۇرلى بولدى. قازاقتىڭ حالىق اندەرى حورعا لايىقتالعان جاڭا ينتەرپرەتاتسيادا شىرقالىپ, ۇلتتىق مۋزىكانىڭ باي مۇراسى تىڭ قىرىنان اشىلدى. «كەرىم-اۋ ايداي», «كوكشولاق», «دجۋليا», «ەكى جيرەن» سەكىلدى حالىققا كەڭىنەن تانىس اندەر حوردىڭ قۋاتتى ۇنىمەن ەرەكشە اسەر قالدىردى.
سونىمەن قاتار كونتسەرتتە الەمدىك ەسترادا مەن پوپ-مۋزىكا كلاسسيكاسىنىڭ تانىمال تۋىندىلارى دا ورىندالدى. اتاپ ايتقاندا, مايكل دجەكسون, فرەددي مەركيۋري, پول ماككارتني شىعارمالارى كورەرمەنگە حور فورماتىندا ۇسىنىلدى. اسىرەسە الەمگە ايگىلى «Billie Jean» ءانىنىڭ كوپداۋىستاعى ەرەكشە وڭدەۋى كورەرمەننىڭ زور قوشەمەتىنە يە بولدى.
باعدارلامادا سونداي-اق ميۋزيكل اريالارى, رەترو-كومپوزيتسيالار مەن الەمدىك مۋزىكا كلاسسيكاسىنىڭ زاماناۋي وڭدەۋلەرى ورىندالىپ, جاندى داۋىستاعى ۆوكال, بي, ساحنالىق ارەكەت ارقىلى اسەرلى كوركەمدىك شەشىمدەر ۇسىنىلدى. ايتۋلى كونتسەرت حور ونەرىنىڭ مۇمكىندىگى كەڭ ەكەنىن, ونىڭ زاماناۋي ساحنا كەڭىستىگىندە جاڭا سيپاتقا يە بولا الاتىنىن ايقىن كورسەتتى.