ەلوردامىزدىڭ تورىندە تۇركى الەمىنىڭ مادەني بايلانىستارىن نىعايتۋعا ارنالعان ماڭىزدى ءىس-شارا ءوتتى. قازاق ونەرىنىڭ الەمدىك ساحناداعى مارتەبەسىن تاعى ءبىر مارتە دالەلدەگەن جيىندا قازاقستاننىڭ حالىق ءارتىسى ديماش قۇدايبەرگەن مەن حالىقارالىق كانن كينوفەستيۆالىنىڭ جەڭىمپازى سامال ەسلياموۆا تۇركسوي حالىقارالىق ۇيىمىنىڭ جوعارى ماراپاتىنا يە بولدى.
اتاپ ايتساق, ديماش قۇدايبەرگەن تۇركى الەمى مادەنيەتىن دامىتۋعا قوسقان ەلەۋلى ۇلەسى ءۇشىن ۇيىمنىڭ ەڭ جوعارى ناگراداسى سانالاتىن «تۇركى الەمىنىڭ مادەني ەلشىسى» وردەنىمەن ماراپاتتالدى. بۇل ديماشتىڭ مۋزىكا ارقىلى حالىقتاردى بىرىكتىرۋى, مادەني ديپلوماتيالىق ميسسيانى اتقارۋى قازىر تەك ەلىمىزدە عانا ەمەس, بۇكىل تۇركى الەمىندە تانىلعانىن كورسەتەدى.
سونىمەن قاتار قازاقستاننىڭ ەڭبەك سىڭىرگەن قايراتكەرى, اكتريسا سامال ەسلياموۆا تۇركى جانە الەمدىك كينو ونەرىنىڭ دامۋىنا قوسقان ايرىقشا ۇلەسى ءۇشىن «تۇركى الەمىنىڭ ۇزدىك ءارتىسى» اتالىمى بويىنشا تۇركسوي ارنايى جۇلدەسىنە يە بولدى. سامالدىڭ ەكرانداعى تابيعي تالانتى – وتاندىق كينەماتوگرافيانىڭ ايتۋلى تابىسى.
پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا اتىنان ونەر يەلەرىن قۇتتىقتاعان مادەنيەت جانە اقپارات ۆيتسە-ءمينيسترى ايبەك سىدىقوۆ قوس تالانتتىڭ ەڭبەگىن تۇركى الەمى ەلدەرى اراسىنداعى مادەني بايلانىستى نىعايتۋعا, قازاق ونەرىن حالىقارالىق دەڭگەيدە تانىتۋعا زور ۇلەس قوسىپ وتىرعانىن اتاپ ءوتتى. ال تۇركسوي ۇيىمىنىڭ باس حاتشىسى سۇلتان راەۆ ماراپاتتاردىڭ ماڭىزىنا توقتالىپ, قازاقستاندىق مادەنيەت قايراتكەرلەرىنىڭ ورتاق تۇركى مادەني كەڭىستىگىن نىعايتۋداعى ءرولى تۋرالى ايتتى:
«بۇگىن ءبىز ونەر ارقىلى تۇركى الەمىن شىنايى بىرىكتىرىپ جۇرگەن تۇلعالاردى قۇرمەتتەپ وتىرمىز. ديماش قۇدايبەرگەن مۋزىكا ارقىلى مادەني ەلشى ميسسياسىن اتقارىپ كەلەدى. ال سامال ەسلياموۆا قازاقستاندىق كينو ونەرىنىڭ رامىزىنە اينالدى. بۇل ماراپاتتار – ولاردىڭ ەڭبەگىنە بەرىلگەن لايىقتى قۇرمەت», دەدى تۇركسوي باس حاتشىسى.
ءوز كەزەگىندە ديماش قۇدايبەرگەن ماراپاتتى زور ريزاشىلىقپەن قابىلداي وتىرىپ, ونەر ادامى ءۇشىن ەڭ ۇلكەن ماراپات حالىقتىڭ قولداۋى ەكەنىن اتاپ ءوتتى.
«ونەر ادامى ءۇشىن ەڭ جوعارى ماراپات – حالىقتىڭ مويىنداۋى مەن قولداۋى. بۇل قۇرمەتتى مەن ەلدەرىمىز اراسىنداعى ديپلوماتيالىق قارىم-قاتىناستاردىڭ نىعايۋىن بىلدىرەتىن ماڭىزدى بەلگى رەتىندە قابىلدايمىن. سوندىقتان دا ايتۋلى ماراپاتتى جەكە وزىمە ەمەس, بۇكىل قازاق حالقىنا كورسەتىلگەن قۇرمەت پەن ءىلتيپات دەپ بىلەمىن», دەدى ءانشى.
ايتا كەتەيىك, ديماش – بۇل ماراپاتقا يە بولعان ەكىنشى تۇلعا. بۇعان دەيىن مۇنداي اتاق تۇركيانىڭ نوبەل سىيلىعىنىڭ لاۋرەاتى, پروفەسسور ازيز ساندجارعا بەرىلگەن بولاتىن.