ءاز ناۋرىز – شىعىس ەلدەرىنىڭ بۇكىلحالىقتىق مەيرامى, جىل باسى. قازاق حالقى دا ناۋرىز مەرەكەسىن ايرىقشا باعالاپ, ونى تويلاۋدى داستۇرگە اينالدىرعان. بۇل – بىرلىكتىڭ, ىزگىلىكتىڭ جانە قاتال قىستان امان-ەسەن شىعىپ, كۇن نۇرىنا بولەنىپ, جاڭا جىلدى قارسى الۋ مەرەكەسى. سول سەبەپتى, وسى كۇنى شاتتانبايتىن, قۋانبايتىن, مەيىرلەنبەيتىن جان جوق شىعار, ءسىرا.
ءار جىلدان جاقسىلىق پەن جاڭالىق كۇتەتىن حالقىمىز بيىلعى ناۋرىزدى دا ەرەكشە قارسى الدى. ماسەلەن, استاناداعى دارىندى بالالارعا ارنالعان №9 «زەردە» مەكتەبىندەگى ناۋرىز مەرەكەسى وزگەشە ايشىقپەن اتالىپ ءوتتى. اتالعان ءبىلىم ۇياسىنىڭ ديرەكتورى ءاليا سەكسەنوۆانىڭ, ديرەكتوردىڭ وقۋ ءىسى جونىندەگى ورىنباسارى گۇلنازيا بايۋلوۆانىڭ بەلسەندىلىگىمەن ۇيىمداستىرىلعان, سونداي-اق, ۇستازدار مەن وقۋشىلار قۇلشىنىس تانىتقان مەرەكەلىك شارا وزگەشە بوياۋمەن ارلەنىپ, جينالعاندارعا ايرىقشا كوڭىل-كۇي سىيلادى.
ۇلىستىڭ ۇلى كۇنى بۇل ءبىلىم ورداسىندا اقشاڭقان كيىز ۇيلەر تىگىلىپ, ۇلتتىق سالت-داستۇرىمىزگە بايلانىستى سالت-جورالعىلار جاسالدى. ماسەلەن, «حالقىن سۇيگەن – سالتىن سۇيەر» تاقىرىبىندا ۇيىمداستىرىلعان ارنايى باعدارلاما اياسىندا سىنىپ جەتەكشىلەرىنىڭ باستاماسىمەن «تولە بي», «قازىبەك بي», «ايتەكە بي», «ماڭگىلىك ەل», «اباي» سىندى بىرنەشە «اۋىل» بوي كوتەرىپ, ولاردىڭ ارقايسىسىندا باتا بەرۋ, ايتىس سەكىلدى قازاقتىڭ ۇلتتىق سالت-داستۇرلەرى جان-جاقتى ناسيحاتتالدى. ال مەرەكەلىك كونتسەرت اياسىندا ونەرلى جاستار مىڭ بۇرالا بيلەپ, ءان مەن كۇيدەن, جىردان شاشۋ شاشتى.
بۇل كۇنى وسى ءبىلىم ۇياسىنىڭ 5ا سىنىبىنىڭ جەتەكشىسى, تاريح ءپانىنىڭ مۇعالىمى گۇلنار راحيموۆانىڭ قولعا الۋىمەن ازىرلەنگەن كورمە دە ءوزىنىڭ تانىمدىلىق مازمۇنىمەن كوپتىڭ ەسىندە قالدى. ماسەلەن, XIX عاسىردان جەتكەن كونە جادىگەرلەر, ونىڭ ىشىندە زەرگەرلىك بۇيىمدار, تۇرمىستىق زاتتار, مونشاقپەن ارلەنگەن تۇسكيىز, نيكولاي پاتشا كەزەڭىنىڭ تيىندارىنان جاسالعان قاپسىرما قويىلعان كورمە بالالاردىڭ تانىم كوكجيەگىن كەڭەيتىپ قانا قويماي, بىلىمدەرىن دە جەتىلدىرە ءتۇستى. سونداي-اق, مەكتەپ وقۋشىلارىنىڭ اسىق ويناۋ, ارقان تارتۋ, قازاقشا كۇرەس سىندى ۇلتتىق ويىنداردان جارىسقا ءتۇسۋى مەرەكەنىڭ شىرايىن كىرگىزدى.
«ۇلتتىق مەرەكە – ۇرپاققا ونەگە» تاقىرىبىندا وتكەن مادەني شارا سوڭىندا وعان اتسالىسقان بارلىق ونەر ۇجىمى مەن وقۋشىلار ەرەكشە كوڭىل-كۇيمەن تارقاستى.
ءلايلا ەدىلقىزى,
«ەگەمەن قازاقستان».
استانا.