قازاقمىس ءوزىنىڭ بارلىق كاسىپورىندارىندا ەڭبەك قاۋىپسىزدىگى شارالارىنا ەرەكشە ەكپىن بەردى
كورپوراتسيانىڭ 2012 جىلى قابىلدانعان «ونەركاسىپتىك قاۋىپسىزدىك جانە ەڭبەك قورعاۋ تۋرالى» بەسجىلدىق ستراتەگياسىندا وندىرىستە جاراقات الۋ فاكتىلەرىن كەزەڭ-كەزەڭىمەن تومەندەتۋ جانە مۇنداي وقيعالاردى نولدىك دەڭگەيگە دەيىن جەتكىزۋ جوسپارلانعان. ءبىر سوزبەن ايتقاندا, 2017 جىلعا تامان قازاقمىس كەن-مەتاللۋرگيا ءوندىرىسىن مۇمكىندىگىنشە قاۋىپسىز ەتكىسى كەلەدى.
كورپوراتسيا باسشىلىعى ءار جىل سايىن وسى ماقساتقا ارناپ ەداۋىر كولەمدە ينۆەستيتسيالار بولەدى. ول قاراجات ءوندىرىستى جاڭعىرتۋعا, ەڭبەككە قاۋىپسىز جاعداي تۋعىزۋعا, قازىرگى زامانعى جەكە قورعانىش قۇرالدارىن ساتىپ الۋعا, ەڭبەك قورعاۋعا قاتىستى ءتۇرلى تاۋەكەلدەردى مەيلىنشە تومەندەتۋگە جۇمسالادى.
الايدا, تاجىريبەنىڭ كورسەتكەنىندەي, ءتىپتى ونەركاسىپتىك قاۋىپسىزدىك سالاسىنداعى وسىنداي كەڭ اۋقىمدى شارالاردىڭ ءوزى جەتكىلىكسىز ەكەن. بالقاش پەن جەزقازعان كەن بايىتۋ فابريكالارىندا جۋىقتا بولعان ەكى قايعىلى وقيعا سونىڭ كۋاسى. دۇرلىكتىرگەن ادام فاكتورىنان تۋىندايتىن ءوز باسىڭنىڭ قاۋىپسىزدىگىنە دەگەن ەنجار كوزقاراس كورپوراتسيا كاسىپورىندارىنا ونەركاسىپتىك قاۋىپسىزدىكتىڭ قازىرگى زامانعى ادىستەرىن ەنگىزىپ وتىرعان ەڭبەك قورعاۋ سالاسىنداعى مامانداردىڭ كۇش-جىگەرىن ەداۋىر دارەجەدە جوققا شىعارادى. مىنە, سوندىقتان دا, ءاربىر قايعىلى وقيعا كەڭىنەن جاريالانىپ, جان-جاقتى زەرتتەلىنىپ, قازاقمىستىڭ جوعارى باسشىلىعىنىڭ قاتىسۋىمەن ونەركاسىپتىك قاۋىپسىزدىك جانە ەڭبەك قورعاۋ جونىندەگى ارناۋلى كوميتەتتە تالقىعا سالىنسا دا, ازىرگە وندىرىستەگى جاراقات الۋ وقيعالارىن ايتا قالارلىقتاي ازايتۋدىڭ ءساتى تۇسپەي كەلەدى.
ناق وسى جاعدايعا بايلانىستى ءوندىرىس جونىندەگى ديرەكتور تالعات ماعزۇموۆ باسقاراتىن «قازاقمىس كورپوراتسياسى» جشس-ءنىڭ ورتالىق شتابىن قۇرۋ تۋرالى شەشىم قابىلداندى. وعان تىكەلەي قولدان باسقارا وتىرىپ كومپانيانىڭ بارلىق كاسىپورنىندا ەڭبەك قورعاۋدى قامتاماسىز ەتۋ جونىندە مىندەت جۇكتەلدى. مۇنداي شتابتار كورپوراتسيانىڭ بارلىق فيليالدارىندا جەدەل قۇرىلدى.
تاياۋداعى جوسپار بويىنشا جۇمىسشى جينالىستارى كەڭ اۋقىمدا وتكىزىلىپ, ولاردا ءوندىرىستى قاۋىپسىز جۇرگىزۋدىڭ نورمالارى مەن تالاپتارىن قاتاڭ ساقتاۋعا ەرەكشە ەكپىن تۇسىرىلمەك. ماڭىزدى مىندەت – قاۋىپسىزدىك تەحنيكاسى مەن ەڭبەك قورعاۋ نەگىزدەرىن مۇلتىكسىز ساقتاۋ قاجەتتىگىن ءاربىر جۇمىسشىعا دەيىن جەتكىزۋ. وسى ءتۇسىندىرۋ جۇمىستارىنا الدەبىر سەبەپتەرمەن جەر استىنداعى قازبا جۇمىستارىندا نەمەسە مىس بالقىتۋ تسەحتارىندا ەڭبەك ەتۋگە جارامايتىن كورپوراتسيا قىزمەتكەرلەرى تارتىلاتىن بولادى. شتابتار مۇنىڭ سىرتىندا, نەگىزگى وندىرىستەن بوساپ قالعان جۇمىسشىلاردى وسى ىسكە قوسادى. باستى ماقسات – كەنشى نەمەسە بالقىتۋشى ءوز جۇمىس ورنىنا بارىپ, ەڭبەگىن باستاعانعا دەيىن, قاۋىپتى جۇمىس ورىندارىن انىقتاپ, كەمشىلىكتى تۇزەتۋ. بايقالعان ەڭ كىشكەنتاي اقاۋدىڭ ءوزى دۇرىستالماي, ءتيىستى ورىندا جۇمىس جۇرگىزىلمەيتىن بولادى. مەيلىنشە قاۋىپسىز ەڭبەك – بۇل ورتالىق شتاب پەن ونىڭ فيليالدارى جۇمىسىنىڭ نەگىزگى كوكەيكەستى ماسەلەسى.
وسى جاعدايعا بايلانىستى «قازاقمىس كورپوراتسياسى» جشس باس ديرەكتورى باقتيار كرىكپىشەۆ بىلاي دەپ تۇسىنىكتەمە بەردى:
– وسىدان ءۇش جىل بۇرىن قابىلداعان بەسجىلدىق ستراتەگيالىق باعدارلامامەن ءبىز جۇرگىزىپ جاتقان ءوندىرىس قاۋىپسىزدىگىن ساقتاۋ شارالارى سايكەس ەكەندىگىن, جۇمىستىڭ باعدارلاما بويىنشا ىسكە اسىرىلىپ جاتقانىن اتاپ ايتقىم كەلەدى. قازىر ءوندىرىس قاۋىپسىزدىگىنە جاۋاپكەرشىلىكتى كۇشەيتىپ, قاتاڭ تالاپ قوياتىن كەزەڭ جەتتى دەپ ەسەپتەيمىن. ءبىزدىڭ شتابتا كۇندەلىكتى اتقارىلىپ جاتقان جۇمىستار جۇمىسكەرلەردەن قولداۋ تاۋىپ, بىزگە جاقىن ارادا, قىسقا مەرزىمدە ەڭبەك قاۋىپسىزدىگىن ساقتاۋ سالاسىندا ماقساتتى وڭ ناتيجەلەرگە قول جەتكىزۋگە – كورپوراتسيانىڭ بارلىق ءوندىرىس ورىندارىندا جاراقاتتانۋ مەن وقىس وقيعالاردى بولدىرماۋعا ىقپال ەتەدى دەپ ءۇمىت ارتامىن, – دەدى.
قازىرگى تاڭدا كومپانيا قۇرامىندا – ون كەنىش, بەس كەن بايىتۋ فابريكاسى, ەكى مىس قورىتۋ زاۋىتى جانە ەكى كومىر كەنىشى بار. «قازاقمىس» كورپوراتسياسى كەن ءوندىرۋ ورىندارى مەن ونى ساتۋ دەڭگەيىنە دەيىن جەتكىزەتىن ءوندىرىس ورىندارىن باسقارادى. وتكەن جىلى كاتودتىق ەكۆيۆالەنتپەن ەسەپتەگەندە الىنعان كەننەن 295,2 مىڭ توننا مىس وندىرىلگەن.
سونىمەن قاتار, قازاقمىس دۇنيەجۇزىندە كۇمىس وندىرۋدەن دە الدىڭعى قاتاردا. وتكەن جىلى 329 توننا اففينيرلەنگەن تازا كۇمىس جانە 2946 كيلوگرامم سوم التىن ءوندىرىلدى. كورپوراتسيا ءوندىرىس وشاقتارى ورنالاسقان ايماقتارعا قاجەتتى ەلەكترەنەرگياسىن دا قامتاماسىز ەتەدى. كورپوراتسيا قۇرامىندا 40 مىڭداي ادام ەڭبەك ەتەدى.
سۇڭعات ءالىپباي,
«ەگەمەن قازاقستان».