تالدىقورعان قالاسى كەيىنگى جىلدارى قارقىندى دامۋ جولىنا ءتۇستى. الداعى جىلدارى قوسىمشا 3 شاعىن اۋداننىڭ ىرگەسى قالانادى. جاڭا مەكتەپتەر مەن مەديتسينا مەكەمەلەرى اشىلادى. قالا ەكونوميكاسىندا تۇراقتى ءوسىم ساقتالعان. ماسەلەن, وتكەن جىلى بۇل كورسەتكىش 107%-دى قۇرادى.
بىلتىر وبلىس اكىمى بەيبىت يساباەۆ تالدىقورعان قالاسىنىڭ جىلدىق بيۋدجەتى 30%-عا كوبەيەتىنىن مالىمدەدى. سوعان ساي الداعى ءۇش جىلدا وبلىس ورتالىعىندا قۇرىلىس جۇمىستارى قارقىندى تۇردە جۇرەدى. ايتالىق, بۇگىندە جاقسى جاعدايداعى جولداردىڭ ۇلەسى 91%-عا جەتتى. بۇل سالاعا قالالىق بيۋدجەتتەن 13,5 ملرد تەڭگە باعىتتالدى. وتكەن جىلى 28,3 شاقىرىم جاڭا جول سالىندى.
ودان بولەك, قالا تۇرعىندارىنىڭ وتىنىشىمەن, قوعامدىق كولىك قوزعالىسى جاقسارتىلدى. گاۋحار انا كوشەسىندەگى قوزعالىس بىرجاقتىدان ەكىجاقتىعا وزگەرتىلىپ, №27 «ىنتىماق – ورتالىق» اۆتوبۋس باعىتى ىسكە قوسىلدى. قالا اۋماعىندا №28, №29 جاڭا اۆتوبۋس باعىتتارى اشىلدى.
«تالدىقورعاندا ءۇش بىردەي جاڭا شاعىن اۋدان بوي كوتەرىپ, قاراتال وزەنىنىڭ وڭ جاعالاۋىندا تۇرعىن ءۇي قۇرىلىسى باستالدى. بۇل اۋماق الداعى جىلدارى زاماناۋي تۇرعىن ۇيلەرمەن قاتار, الەۋمەتتىك, مەديتسينالىق نىساندار شوعىرلانعان جاڭا قالا كەڭىستىگىنە اينالادى. جالپى, 2027 جىلدان باستاپ وزەننىڭ وڭ جاعالاۋىن كەشەندى دامىتۋ كوزدەلىپ وتىر», دەيدى قالا باسشىسى ەرنات ءبازىل.
وتكەن جىلى وبلىس ورتالىعىندا بىرنەشە ءوندىرىس ورنى ىسكە قوسىلدى. گازبەتون, كەراميكا, ەلەكتر جابدىقتارىن شىعاراتىن كاسىپورىندار مەن كونديتەرلىك ءونىم دايىندايتىن تسەح اشىلىپ, اككۋمۋلياتور زاۋىتىندا جاڭا وندىرىستىك جەلى پايدالانۋعا بەرىلدى.
ء«بىز تەلەكوممۋنيكاتسيا, اۋرۋحانالار, جەل ەلەكتر ستانسالارى مەن ءىرى كاسىپورىندارعا ارنالعان باتارەيا قۇرىلعىلارىن شىعارامىز. ءوندىرىس تولىق جاڭعىرتىلىپ, تسيفرلاندىرۋ جۇيەسى ەنگىزىلدى», دەيدى زاۋىتتىڭ وندىرىستىك ديرەكتورى تالعات قوناقباەۆ.
تۇرعىن ءۇي قۇرىلىسى دا قارقىن العان. قالادا 200-گە جۋىق تۇرعىن ءۇي سالىنىپ, جاڭا تۇرعىن الاپتار پايدا بولدى. ۇزاق جىل بويى قاراۋسىز قالعان اسكەري قالاشىقتاعى الەۋمەتتىك ماسەلەلەر كەزەڭ-كەزەڭىمەن شەشىلىپ جاتىر. «ۇلان» شاعىن اۋدانىنداعى 20 ءۇيدىڭ قاسبەتى جاڭارتىلىپ, بالكوندارى اۋىستىرىلدى, اۋلاداعى ويىن الاڭدارى زامان تالابىنا ساي جابدىقتالدى.
ينفراقۇرىلىمدى جاڭارتۋ دا باستى نازاردا. بىلتىر جۇزدەن استام كوشەگە اسفالت توسەلىپ, «جاستار-3» اتتى جاڭا شاعىن اۋدان بوي كوتەردى. قالا اكىمى ەرنات ءبازىلدىڭ ايتۋىنشا, بارلىعى 790 تۇرعىن ءۇي سالۋ جوسپارلانعان.
«بىلتىر 56 ءۇيدى پايدالانۋعا بەردىك. بيىل 206 ءۇيدى تولىق اياقتاپ, «وتباسى بانككە» وتكىزۋگە دايىنبىز. سونداي-اق 9-شاعىن اۋداندا ەكى ءىرى ءۇيدىڭ قۇرىلىسى ءجۇرىپ جاتىر», دەدى قالا اكىمى.
الداعى جىلدارى «باتىس», «قۇلاگەر» شاعىن اۋداندارىندا مەكتەپتەر سالىنىپ, جاڭا تۇرعىن ءۇي الاپتارىنىڭ نەگىزى قالانباقشى. قازىردىڭ وزىندە 11, 12, 13-شاعىن اۋدانداردا ينجەنەرلىك-ينفراقۇرىلىم جەلىلەرى تارتىلىپ جاتىر. سونىمەن قاتار رەسپۋبليكالىق بيۋدجەت ەسەبىنەن ءورت ءسوندىرۋ دەپوسى, ءىرى قازاندىق, تۇرعىن ۇيلەر سالۋ جوسپارلانعان.
قالانىڭ ەكونوميكالىق كورسەتكىشتەرى دە وڭ ناتيجە كورسەتىپ وتىر. 2025 جىلى جالپى ەكونوميكالىق ءوسىم 107%-دى قۇرادى. ونەركاسىپ ءونىمىنىڭ كولەمى 174,4 ملرد تەڭگەگە جەتسە, اۋىل شارۋاشىلىعىنىڭ جالپى ءونىمى 39,4 ملرد تەڭگەنى قۇراپ, ءوسىم 103,3% دەڭگەيىندە قالىپتاستى. قۇرىلىس سالاسىندا دا ىلگەرىلەۋ بار. 2024 جىلى 1283 تۇرعىن جاڭا باسپانامەن قامتىلسا, وتكەن جىلى 1400-دەن استام وتباسى قونىس تويىن تويلادى. «ىنتىماق» تۇرعىن ءۇي الابىنداعى 200 پاتەرلى بەس كوپقاباتتى ءۇيدىڭ قۇرىلىسى بيىل اياقتالادى.
«الەۋمەتتىك سالالار دا نازاردان تىس قالعان جوق. بيىل 300 ورىندىق جاڭا ء«بىلىم-يننوۆاتسيا» ليتسەيى پايدالانۋعا بەرىلەدى. ەسكى عيماراتتىڭ توزۋىنا بايلانىستى دارىندى وقۋشىلارعا ارنالعان زاماناۋي ليتسەي سالۋ – ۋاقىت تالابى. سونىمەن قاتار «قۇلاگەر», «باتىس» تۇرعىن اۋداندارىندا 1200 ورىندىق مەكتەپتەردىڭ قۇرىلىسى باستالادى. بۇگىندە قالا مەكتەپتەرىندە 37 مىڭنان استام وقۋشى ءبىلىم السا, ونىڭ 4 مىڭعا جۋىعى – ءبىرىنشى سىنىپ وقۋشىلارى», دەيدى قالا باسشىسى.
دەنساۋلىق ساقتاۋ سالاسىندا دا اۋقىمدى جوبالار قولعا الىنعان. «وڭتۇستىك-باتىس» اۋدانىندا اۋىسىمىنا 500 كەلۋشىگە ارنالعان جاڭا ەمحانانىڭ قۇرىلىسى باستالدى. قاراتال وزەنىنىڭ وڭ جاعالاۋىندا 150 ورىندىق مۇمكىندىگى شەكتەۋلى جاندارعا ارنالعان وڭالتۋ ورتالىعى سالىنىپ جاتىر. وتەناي اۋىلىندا كۇنىنە 100 پاتسيەنت قابىلدايتىن ءۇش قاباتتى زاماناۋي امبۋلاتوريا پايدالانۋعا بەرىلدى.
قالا اكىمى اتاپ وتكەندەي, جۇزەگە اسىرىلىپ جاتقان جوبالار مەن باستامالار تۇرعىنداردىڭ ءومىر ءسۇرۋ ساپاسىن ارتتىرۋعا باعىتتالعان. قۇرىلىس, ءوندىرىس, ءبىلىم مەن مەديتسينا سالالارىنداعى جۇيەلى جۇمىس – تالدىقورعاننىڭ شىن مانىندە تۇرلەنىپ كەلە جاتقانىن كورسەتەدى.
جەتىسۋ وبلىسى