شەتەلدەن زات الۋ ەرەجەسى وزگەردى: سالىق قالاي ەسەپتەلەدى؟

مەملەكەتتىك كىرىستەر كوميتەتىنىڭ ءباسپاسوز قىزمەتىنىڭ تۇسىندىرۋىنشە, ەاەو ەرەجەلەرىنە سايكەس, ەندى شەتەلدەن ينتەرنەت ارقىلى ساتىپ الىنعان بارلىق تاۋارلار جەكە پايدالانۋعا ارنالعان كادىمگى تاۋارلار دەپ سانالمايدى. ولار «ەلەكتروندىق ساۋدا تاۋارلارى» دەگەن جەكە ساناتقا ەنگىزىلدى. بۇل سانات ءۇشىن جەكە كەدەندىك باج, سالىق, بولەك كەدەندىك دەكلاراتسيا قاراستىرىلعان. ەلەكتروندىق ساۋدا تاۋارلارى ءۇشىن جاڭا كەدەندىك باج مولشەرلەمەسى بەكىتىلدى.

ەاەو ەلدەرىنە تاۋاردى باجسىز اكەلۋ شەگى – 200 ەۋرو بولىپ قالا بەرەدى. ەگەر تاۋاردىڭ قۇنى 200 ەۋروعا دەيىن بولسا, كەدەندىك باج دا, ققس تا تولەنبەيدى. ەگەر تاۋاردىڭ قۇنى 200 (118 مىڭ تەڭگە) ەۋرودان اسسا, وندا ساتىپ الۋدىڭ تولىق سوماسىنان 5% كەدەندىك باج, 16% قوسىلعان قۇن سالىعى (ققس) تولەنەدى. بۇرىن باج تەك 200 ەۋرودان اسقان بولىگىنە عانا سالىناتىن.

ماركەتپلەيستەردەگى تاۋارلار مەن قىزمەتتەردى ءبولىپ تولەۋ ەرەجەسى رەتتەلمەك

«وسىلايشا, شەتەلدىك ينتەرنەت-پلاتفورمادان قۇنى 200 ەۋرودان اسپايتىن تاۋار ساتىپ العان جەكە تۇلعا كەدەندىك باج دا, ققس تا تولەمەيدى. ال شەكتەن اسقان جاعدايدا 5% باج جانە 16% ققس تولەنەدى», دەلىنگەن حابارلامادا.

كوميتەت كەيبىر تاۋارلار ءۇشىن ەرەكشە مولشەرلەمەلەر قولدانىلاتىنىن اتاپ ءوتتى.جەڭىل اۆتوكولىكتەرگە باج كادىمگى جەكە كولىكتەر سياقتى – شىعارىلعان جىلى مەن قوزعالتقىش كولەمىنە قاراي ەسەپتەلەدى.

ەلەكتروموبيلدەرگە, موتوتسيكلدەرگە, ياحتالارعا جانە ەسكەك قايىقتارعا – 15% باج قولدانىلادى. سونداي-اق ەلەكتروندىق ساۋداعا جاتپايتىن تاۋارلار ءتىزىمى بار. ولار ءۇشىن ادەتتەگى كەدەندىك دەكلاراتسيالاۋ ءتارتىبى ساقتالادى:

الكوگول ونىمدەرى; تەمەكى; اسىل تاستار مەن قىمبات مەتالدار;

ماركەتپلەيستەردە «قازاقستاندا جاسالعان» دەپ اتالاتىن ارنايى ءبولىم اشىلادى

بۇرىن شەتەلدەن الىنعان ينتەرنەت-ساتىپ الۋلار جەكە پايدالانۋ تاۋارلارى رەتىندە راسىمدەلەتىن. مۇنى تەك قاراپايىم تۇتىنۋشىلار عانا ەمەس, سالىق تولەمەي قايتا ساتۋ ءۇشىن تاۋار اكەلگەندەر دە پايدالانعان. سونىڭ سالدارىنان مەملەكەت سالىقتان ايىرىلىپ, ال جەرگىلىكتى ساتۋشىلار شەتەلدىك ماركەتپلەيستەرمەن سالىستىرعاندا تەڭ ەمەس جاعدايدا قالعان. جاڭا ەرەجەلەر ەلەكتروندىق ساۋدا تاۋارلارىن جەكە ساناتقا ءبولىپ, 200 ەۋروعا دەيىن – سالىقسىز, ال ودان اسسا – باج بەن ققس سالۋ ءتارتىبىن ەنگىزەدى.

قازىرگى ۋاقىتتا بۇل ەرەجەلەردىڭ ناقتى كۇشىنە ەنۋ كۇنى بەلگىسىز. ۆەدومستۆو مالىمەتىنشە, ءتيىستى حاتتاما ەاەو-عا مۇشە بارلىق ەلدەر ىشكى راسىمدەردىڭ اياقتالعانى تۋرالى حابارلاما جىبەرگەننەن كەيىن عانا كۇشىنە ەنەدى.