اباي اتىنداعى قازاق ۇلتتىق وپەرا جانە بالەت تەاترى تۇڭعىش رەت سينگاپۋر ەلىنە گاسترولدىك ساپارمەن باردى. تەاتر ۇجىمى سينگاپۋر ۇلتتىق ۋنيۆەرسيتەتىنىڭ (NUS) مادەنيەت ورتالىعىندا ونەر كورسەتتى.
اباي تەاترىنىڭ سينگاپۋردەگى گاسترولى – مادەنيەتتەر توعىسىنداعى ماڭىزدى وقيعا. بۇل شىعارماشىلىق ساپار عانا ەمەس, قازاقستان مادەنيەتىنىڭ الەمدىك كەڭىستىككە نىق ەنۋىنىڭ ايقىن كورىنىسى. گەوگرافيالىق تۇرعىدان دا, مادەني جاعىنان دا الىس سانالاتىن سينگاپۋر ساحناسىندا ونەر كورسەتۋ – اباي تەاترى ءۇشىن جاڭا كورەرمەن, تىڭ تالعام ءھام ايشىقتى مادەني ديالوگ دەگەن ءسوز. ال وڭتۇستىك-شىعىس ازياداعى ەڭ بەدەلدى مادەني ءارى ءبىلىم ورتالىقتارىنىڭ ءبىرى NUS الاڭىندا قازاق بالەتىنىڭ ۇسىنىلۋى ۇلتتىق ونەردىڭ حالىقارالىق دەڭگەيدە سۇرانىسقا يە ەكەنىن اڭعارتادى.
گاسترولدىك باعدارلامانىڭ مازمۇنى باي, كوركەمدىك شەشىمى جاعىنان سالماقتى. تەاتر سينگاپۋرلىق كورەرمەنگە ەكى ءتۇرلى باعىتتاعى قويىلىمدى ۇسىنىپ, كلاسسيكالىق بالەت پەن زاماناۋي حورەوگرافيانىڭ ۇزدىك ۇلگىلەرىن توعىستىردى.
اتاپ ايتساق, العاشقى باعدارلاما — «كلاسسيكالىق بالەت جاۋھارلارى» اتتى گالا-كەش. ونەر مەرەكەسى الەمدىك بالەت ونەرىنىڭ التىن قورىنا ەنگەن تاڭداۋلى شىعارمالاردان قۇرالعان. پەتر چايكوۆسكيدىڭ «اققۋ كولىنەن» ورىندالعان اداجيو – تازالىق پەن ماحابباتتىڭ رامىزىنە اينالعان ماڭگىلىك ليريكا بولسا, رومانتيكالىق بالەتتىڭ شىڭى سانالاتىن «سيلفيدا» قويىلىمى ارقىلى كورەرمەن نازىك سەزىم مەن قيالعا تولى پوەتيكالىق الەمگە ەندى. ال «دون كيحوت» بالەتىنەن ۇسىنىلعان ۇزىندىلەر ساحناعا شاتتىق پەن جارقىن اسەر سىيلاپ, كلاسسيكالىق بالەتتىڭ تەمپەرامەنتكە تولى قىرىن ايگىلەدى.
ايتۋلى گالا-كەش – تەك اسەم بي عانا ەمەس, ورىنداۋشىلاردىڭ كاسىبي دەڭگەيىن, ساحنالىق مادەنيەتىن, قازاق بالەت مەكتەبىنىڭ قالىپتاسقان ءداستۇرىن ايقىن كورسەتكەن كوركەم قويىلىم. ءاربىر قيمىل مەن پلاستيكالىق شەشىم ارقىلى ۇلتتىق ساحنانىڭ جوعارى تالعامى سەزىلدى.
گاسترول اياسىنداعى ەكىنشى باعدارلاما – ءبىر اكتىلى «كارمەن-سيۋيتا» بالەتى. اتالعان تۋىندى الەمدىك حورەوگرافيا ونەرىندە ەرەكشە ورىن الادى. قويىلىمدى ايگىلى كۋبالىق حورەوگراف البەرتو الونسو ساحنالاپ, مۋزىكاسىن حح عاسىردىڭ كورنەكتى كومپوزيتورى روديون ششەدرين جازعان. «كارمەن-سيۋيتا» – كلاسسيكالىق بالەت كانوندارىن بۇزعان, جاڭاشىل كوركەم تىلىمەن ەرەكشەلەنەتىن شىعارما. كارمەن بەينەسى ارقىلى ساحنادا ەركىندىككە ۇمتىلعان رۋح, قۇمارلىق پەن تاعدىردىڭ تايتالاسى, ماحاببات پەن قۇرباندىق تاقىرىپتارى تەرەڭ فيلوسوفيالىق دەڭگەيدە اشىلدى. قويىلىمداعى وتكىر دراماتۋرگيا, مىنەزدى پلاستيكا, ەموتسيالىق قارقىن كورەرمەندى بەيجاي قالدىرمايدى. بۇل بالەت – تەك كوركەم تۋىندى ەمەس, ادام بولمىسىنىڭ كۇردەلى تابيعاتىن ساحنالىق تىلمەن بەينەلەيتىن ويلى شىعارما.
تاريحى تەرەڭ, ءداستۇرى بەرىك اباي اتىنداعى قازاق ۇلتتىق وپەرا جانە بالەت تەاترى بۇگىنگى تاڭدا ۇلتتىق مادەنيەتتىڭ باستى تىرەكتەرىنىڭ ءبىرى سانالادى. ونىڭ سينگاپۋر ساحناسىنداعى ونەرى – قازاق ونەرىنىڭ الەمدىك كەڭىستىككە باتىل قادام باسقانىنىڭ ايعاعى. ايتۋلى گاسترول ۇلتتىق مادەنيەتىمىزدىڭ مارتەبەسىن كوتەرىپ قانا قويماي, ەلىمىزدى كلاسسيكالىق ونەر كارتاسىندا ايقىن تانىتا ءتۇستى.