باتىس قازاقستان وبلىسىنداعى دوستىق اۋىلىنىڭ تۇرعىنى ءنادىر قۋاناەۆ استاناداعى اقوردا عيماراتىنىڭ بەينەسىن قاردان جاساپ شىقتى. اۋىلداعى وسىناۋ كەرەمەتتى كورۋگە الىس-جاقىننان ارنايى بارعاندار دا از ەمەس ەكەن.
قاردان جاسالعان اقوردانىڭ بيىكتىگى – 160 سم, ۇزىندىعى 5 مەتر, ەنى 3 مەتر شاماسىندا. بۇل جاڭالىق الەۋمەتتىك جەلى ارقىلى كەڭ تاراپ, ءنادىردىڭ بۇدان بۇرىن دا جاساعان تۋىندىلارىن حالىق ەسكە الىپ جاتىر. ايتا كەتەيىك, ءنادىر ارمان ۇلى وتكەن جىلدارى ورالداعى ورتالىق مەشىت عيماراتىن, پوليتسيانىڭ قىزمەتتىك كولىگىن, باسقا دا قار مۇسىندەرىن جاساعان. ول الەۋمەتتىك جەلىدەگى ءوز پاراقشاسىندا ءمۇسىننىڭ جاسالۋ جولىن دا كورسەتىپ, تاجىريبەسىن دوستارىنا تاراتىپ وتىرادى.
شەبەر جىگىت بۇل جولى نەگە ەلىمىزدىڭ باس كەڭسەسى – اقوردا عيماراتىن تاڭداعان ەكەن؟ «بۇعان ەل پرەزيدەنتىنىڭ جاستارعا ۇندەۋى سەبەپ بولدى», دەيدى ول.
«مەملەكەت باسشىسى سوزىندە «بولاشاق – جاستاردىڭ قولىندا» دەپ اتاپ وتەتىن. وسى ورايدا جاستاردىڭ وزىق يدەيالارىن, قولىنان ءىس تە كەلەتىنىن قار مۇسىنىمەن دالەلدەگىم كەلدى. بولاشاقتا مەتالل قالدىقتارىن دا كادەگە جاراتىپ, ءتۇرلى ءمۇسىن جاساعىم كەلەدى. 2022 جىلى ءوز بەتىمشە كولىك قۇراستىرا باستادىم. كولىكتىڭ الدىڭعى بولىكتەرىن دايىنداپ, وعان قوزعالتقىش ورناتتىم. وكىنەتىنىم, قارجى تاپشى بولىپ, بۇل ءىسىم اياقسىز قالدى. جاساعان كولىك بولشەكتەرىن ساتىپ جىبەردىم. بىراق وسى جوبامدى قايتا قولعا الىپ, ماقساتىما جەتكىم كەلەدى», دەيدى ءنادىر.
شەبەر جىگىتتىڭ ونەرى جىلدان-جىلعا جەتىلىپ, دامىپ كەلەدى. مىسالى, بيىلعى اقوردا مۇسىنىنە ورناتىلعان جارىقشام تۇندە جارقىراپ, عيماراتتىڭ ءسانىن ودان ءارى ارتتىرىپ تۇر.
باتىس قازاقستان وبلىسى