قوي جۇنىنەن – قۇرىلىس ماتەريالى

زاۋىت جىلىنا 3 مىڭ توننادان استام ءونىم شىعارۋدى جوسپارلاپ وتىر. جوبانىڭ ينۆەستيتسيالىق كولەمى 5,3 ملرد تەڭگەنى قۇرايدى. قاراجاتقا يتاليانىڭ پراتو قالا­سىندا ورنالاسقان «Cormatex S.r.L.» زاۋىتىنان «Cormatex Airlay» تەحنولوگياسىنا نەگىزدەلگەن زاماناۋي جابدىقتار مەن قوندىرعىلار ساتىپ الىندى.

جابدىقتاردى ورنالاستىرۋ جۇمىس­تارى ءالى جۇرگىزىلىپ جاتىر. سو­عان قاراماستان زاۋىتتىڭ ءبىر تسەحى ىسكە قوسىلىپ, العاشقى ونىم­دەرىن شىعارا باستادى. قازىر ءجۇن قابىلداۋ مەن جۋ تسەحىندا 20 ادام ەڭبەك ەتەدى.

ءوندىرىس وشاعىندا قولدانىلا­تىن Airlay تەحنولوگياسىمەن ءجۇن تالشىقتارى جۋىلىپ, قوقىمنان تازالانىپ, كەپتىرىلەدى. سودان كەيىن ءتۇرلى قالىپقا سالىنىپ, تىعىز ءارى بەرىك ماتەريال رەتىندە وندىرىسكە شىعادى. بۇل ونىمدەردى قۇرىلىستا جىلۋ مەن دىبىس وقشاۋلاعىش ماتەريالدارى عانا ەمەس, اۆتوكولىك تاقتايشالارى مەن ورىندىق قاپتا­عىشتاردىڭ, جيھاز بەن كورپە, جاستىقتاردىڭ تولتىرعىشى رەتىن­دە دە پايدالانۋعا بولادى.

مۇنداي زاۋىتتىڭ اشىلعانى ەڭ الدىمەن وڭىردەگى قوي ءوسىرىپ وتىرعان شارۋاشىلىق يەلەرىنە پايدالى ەكەنى ءسوزسىز. اقتوبە قالا­سىنا جاقىن ورنالاسقان شارۋا­شىلىقتار كوكتەمگى قىرقىمدا العاشقى ونىمدەرىن وتكىزۋگە كەلىسىم­شارت جاساسىپ تا ۇلگەردى. سولاردىڭ ءبىرى – العا اۋدانىنىڭ ۇشقۇدىق اۋىلدىق وكرۋگىندە 250 باس بيازى ءجۇندى قوي ءوسىرىپ وتىرعان جاندوس اقىنوۆ. ول بەس جىلدان بەرى وسى كاسىپپەن اينالىسىپ كەلە جاتسا دا قىرقىلعان قوي ءجۇنىن وتكىزەتىن جەر تاپپاي قينالاتىنىن جاسىرمادى. «جىل سايىن توننا-توننا تابيعي تازا ءونىم قوقىسقا كەتىپ, ءراسۋا بولىپ جاتىر. قوراعا جيناپ قويامىز. ول جان-جاققا ۇشىپ, سوڭىندا شوپپەن ارالاسىپ جوق بولادى. سول سەبەپتى امالسىزدان قوقىسقا اپارىپ توگەمىز, نە ورتەپ جىبەرەتىن ەدىك. كەيدە قوي ءجۇنى جينالعان قورا ورتەنىپ كەتە مە دەپ تە الاڭدايتىن ەدىك. ەندى مىنە, اقتوبەدە قوي ءجۇنىن پايداعا اسىراتىن ءوندىرىس ورنى اشىلىپ, قۋانىپ جاتىرمىز. ارزان باعاعا بولسا دا بىزگە وتكىزگەن جاقسى», دەيدى شارۋا.

الداعى كوكتەمنەن باستاپ «KazFeltec» جىلىنا 3 مىڭ توننادان استام ءجۇن قابىلداۋدى جوسپارلاپ, ساپاسىنا قاراي ءار كيلوسىنا 50 تەڭگەدەن 150 تەڭگەگە دەيىن تولەمەكشى.

كاسىپورىن اشىلعان كەزدە زاۋىتقا ءجۇن سۇرىپتاۋشى بولىپ جۇمىسقا كىرگەن ەرلان جاقىپوۆ سۇرىپتاۋدان ءوتىپ, تازارتىلعان قوي ءجۇنى وسى تسەحتا ارناۋلى قوندىرعىدا بەس رەت جۋىلىپ, كەپتىرىلەتىنىن ايتادى. ودان كەيىن تەگىستەلگەن تازا ءجۇن قالىپقا سالىنىپ, ءونىم ءوندىرۋ تسەحىنا جىبەرىلەدى.

«KazFeltec» زاۋىتىنىڭ باس تەح­نولوگى ەرلان امىرعاليەۆتىڭ ايتۋىن­شا, Cormatex Airlay جابدىق­تارى ارقىلى ءارتۇرلى ولشەمدەگى 20 ءونىم شى­عارۋعا بولادى. بىراق زاۋىت ازىرشە ءۇش ءتۇرلى ءونىم عانا شىعارادى. قازىر يتاليادان كەلگەن «Cormatex S.r.L.» كومپانياسىنىڭ جۇمىسشىلارى قۇرىلعىلاردى ىسكە قوسىپ جاتىر. زاۋىت باسشىلىعى الداعى ۋاقىتتا جۇمىسشىلار سانىن 50-گە ارتتىرىپ, كورشى وبلىستاردان دا ءجۇن قابىلداۋدى جوسپارلاپ وتىر.

كاسىپورىن تولىق قۋاتىمەن ىسكە قوسىلسا, ەكولوگيالىق ساپالى بۇيىمدار ەلىمىزدىڭ وڭىرلەرىنە دە جىبەرىلمەك.

اقتوبە وبلىسى