ونەركاسىپ جانە قۇرىلىس مينيسترلىگى بۇعان دەيىن ەلدەگى وندىرۋشىلەر 30 قاڭتارعا دەيىن قازاقستاندىق تاۋار وندىرۋشىلەر رەەسترىندە تىركەلۋى كەرەك ەكەنىن جاريالاعان. دەسە دە وتاندىق تاۋار وندىرۋشىلەر سەرتيفيكات الۋى كەزىندە تەحنيكالىق كەدەرگىلەرگە تاپ بولىپ وتىر. بۇل تۋرالى بۇگىن ءماجىلىس وتىرىسىندا دەپۋتات ەدىل جاڭبىرشين ماسەلە كوتەردى, دەپ جازادى Egemen.kz.
ەدىل جاڭبىرشين وڭىردەگى كاسىپكەرلەرمەن كەزدەسۋ بارىسىندا ارنايى رەەستردەن سەرتيفيكات الۋ ماسەلەسى قوزعالعانىن ايتتى. دەپۋتاتتىڭ ايتۋىنشا, ونەركاسىپ جانە قۇرىلىس مينيسترلىگى كاسىپكەرلەرگە اتالعان سەرتيفيكاتتى الۋعا 1 اي ۋاقىت بەرگەن. وسى تالاپتى ورىنداۋ ءۇشىن سايتقا جاپپاي كىرۋ بارىسىندا سايت جۇكتەمەنى كوتەرە الماي بىرنەشە رەت ىستەن شىققان.
سونداي-اق ول ەلىمىزدە گاز وندىرەتىن شەتەلدىك كومپانيانىڭ اتالعان بازاعا كىرە الماي وتىرعانىنا دا نازار اۋدارىپ, ماسەلەنى شەشۋ جولىن ونەركاسىپ جانە قۇرىلىس ۆيتسە-ءمينيسترى ولجاس ساپاربەك ۇلىنان سۇرادى.
ءوز كەزەگىندە ۆيتسە-مينيستر رەەستردىڭ تەحنيكالىق ماسەلەلەرىن شەشۋ جۇمىستارى جۇرگىزىلىپ جاتقانىن اتاپ ءوتتى.
«ال گاز وندىرەتىن كومپانيانىڭ ماسەلەسى ەنەرگەتيكا مينيسترلىگىنىڭ قۇزىرەتىنە كىرەدى. مينيسترلىك تەحنيكالىق وپەراتسيالاردى بەلگىلەيدى. سول ارقىلى شىعارىلعان ءونىم وتاندىق دەپ سانالادى. اتالعان ساۋالدىڭ شەشىمىن تابۋ ءۇشىن ەنەرگەتيكا مينيسترلىگىمەن بىرلەسە جۇمىس ىستەۋگە دايىنبىز», دەدى ولجاس ساپاربەك ۇلى.
ايتا كەتەيىك, بۇگىنگى ءماجىلىس وتىرىسىندا دەپۋتات تەمىر قىرىقباەۆ ءسابىز ەكسپورتىنا تىيىم سالۋعا قاتىستى شارۋالاردى الاڭداتىپ وتىرعان ماسەلەردى كوتەرىپ, پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارينگە ساۋال جولدادى.
ال «AMANAT» پارتياسى فراكتسياسىنىڭ مۇشەسى ءمۇتالى ابۇتالىپ ەل اۋماعىندا جاسىرىن باقىلاۋعا ارنالعان تەحنيكالىق قۇرىلعىلاردىڭ باقىلاۋسىز اينالىمى مەن جاڭا بۋىنداعى اۆتوموبيلدەر ارقىلى جەكە دەرەكتەردىڭ شەتەلگە كەتۋ قاۋپىنە نازار اۋداردى.