اقش پرەزيدەنتى دونالد ترامپ يرانمەن ساۋدا-ساتتىق جاسايتىن بارلىق ەلگە 25 پايىزدىق باج سالىعىن ەنگىزەتىنىن مالىمدەگەن ەدى. مالىمدەمەگە قاتىستى ەلىمىزدىڭ ساۋدا جانە ينتەگراتسيا مينيسترلىگى پىكىر ءبىلدىردى, دەپ جازادى Egemen.kz.
سالالىق مينيسترلىك حالىقارالىق ساۋدا-ەكونوميكالىق كۇن ءتارتىبى مەن جاعدايدىڭ دامۋ ءۇردىسىن, ونىڭ ىشىندە اقش-تىڭ يرانمەن ساۋدا بايلانىسى بار ەلدەرگە قاتىستى جاريالاعان مالىمدەمەلەرىن مۇقيات قاداعالاپ وتىرعانىن حابارلادى.
مينيسترلىكتىڭ حابارلاۋىنشا, قازىر ىقتيمال شارالاردىڭ قولدانۋ پارامەترلەرى ءالى ناقتىلانباعان. دەسە دە ۆەدومستۆو وسىعان بايلانىستى ءارتۇرلى دامۋ ستسەناريلەرىن باعالاۋدى جالعاستىرادى.
«سونىمەن قاتار قازاقستان وزىنە العان حالىقارالىق ساۋدا-ەكونوميكالىق مىندەتتەمەلەرىن تۇراقتى تۇردە ورىنداپ كەلەدى جانە سىرتقى ەكونوميكالىق ساياساتتا سالماقتى ءارى پراگماتيكالىق ۇستانىمدى باسشىلىققا الادى», دەلىنگەن مينيسترلىك تاراتقان حابارلامادا.
ترامپتىڭ ايتۋىنشا, 25 پايىزدىق باج سالىعى يران ۇكىمەتىنە قىسىم كورسەتۋ قۇرالى رەتىندە قولدانىلماق.
ەسكە سالايىق, يرانداعى ساياسي احۋال جانە وعان قارسى سانكتسيالاردىڭ كۇشەيۋىنە بايلانىستى الەمدىك نارىقتا مۇناي باعاسى كۇرت ءوستى.
ال يران بيلىگى نارازىلىقتار كەزىندە شامامەن 2000 ادامنىڭ قازا تاپقانىن مويىنداپ وتىر.