اقش سەناتى پرەزيدەنت دونالد ترامپتىڭ وكىلەتتىگىن شەكتەۋ باعىتىندا قادام جاساپ, ەكى پارتيا وكىلدەرى قولداعان رەزوليۋتسيانى قابىلدادى. بۇل قۇجات كونگرەستىڭ الدىن الا كەلىسىمىنسىز ۆەنەسۋەلانىڭ «ىشىندە نەمەسە وعان قارسى» اسكەري كۇش قولدانۋعا تىيىم سالادى. زاڭ جوباسىن 52 سەناتور قولداپ, 47 سەناتور قارسى داۋىس بەردى, دەپ حابارلايدى Egemen.kz.
داۋىس بەرۋ ترامپتىڭ ۆەنەسۋەلاعا قارسى ىقتيمال «ەكىنشى تولقىن» شابۋىلدارى تۋرالى سوڭعى قوقان-لوققىلارىنا جاۋاپ رەتىندە ءوتتى. بۇعان دەيىن ول ۆەنەسۋەلا پرەزيدەنتى نيكولاس مادۋرونى تۇتقىنداۋ جانە ەكستراديتسيالاۋ ماقساتىندا اسكەري وپەراتسيا جۇرگىزۋ تۋرالى بۇيرىق بەرگەن. رەزوليۋتسيانى بارلىق 47 دەموكراتپەن بىرگە 5 رەسپۋبليكاشىل سەناتور قولدادى.
زاڭ جوباسىنىڭ باستاماشىسى – ۆيردجينيا شتاتىنان سايلانعان دەموكرات سەناتور تيم كەين. ول «ترامپتىڭ سوعىسى ايقىن زاڭسىز, ويتكەنى بۇل اسكەري وپەراتسيا كونگرەستىڭ رۇقساتىنسىز بۇيىرىلعان» دەپ مالىمدەدى. سەناتور ارىپتەستەرىن باتىلدىق تانىتىپ, سايلاۋشىلاردىڭ مۇددەسىن قورعاۋعا شاقىرىپ, اسكەري ءىس-قيمىلدار باستالماس بۇرىن كونگرەستە تالقىلاۋ مەن داۋىس بەرۋدىڭ ماڭىزىن اتاپ ءوتتى.
اقش كونگرەسى ۆەنەسۋەلاعا قاتىستى ارەكەتى ءۇشىن ترامپتى ايىپتادى
ەندى زاڭ جوباسى كەلەسى اپتادا سەناتتا تاعى ءبىر داۋىس بەرۋدەن ءوتىپ, كەيىن وكىلدەر پالاتاسىنىڭ ماقۇلداۋىن الىپ, پرەزيدەنتتىڭ قول قويۋىنا ۇسىنىلۋى ءتيىس. وسىعان بايلانىستى ونىڭ تۇپكىلىكتى قابىلدانۋ ىقتيمالدىعى تومەن. دەگەنمەن بۇل قۇجات ترامپقا سىرتقى ساياسات ماسەلەلەرىندە كونگرەستىڭ پىكىرىن ەسكەرۋ قاجەتتىگى جونىندە ماڭىزدى بەلگى بەرەدى.
ءوز كەزەگىندە دونالد ترامپ رەزوليۋتسيانى قولداعان رەسپۋبليكاشىلداردى قاتاڭ سىنعا الىپ, ولاردىڭ ارەكەتىن «اقىماقتىق» دەپ اتادى جانە بۇل قادام پرەزيدەنتتىڭ باس قولباسشى رەتىندەگى وكىلەتتىگىن شەكتەۋگە باعىتتالعانىن ايتتى. سونداي-اق ول مۇنداي داۋىس بەرۋ اقش-تىڭ ۇلتتىق قاۋىپسىزدىگىنە قاتەر توندىرەدى دەپ ەسەپتەيدى.
كەنتۋككي شتاتىنان رەسپۋبليكاشىل سەناتور رەند پول زاڭ جوباسىن قولداپ, كونگرەستىڭ كەيبىر مۇشەلەرى سوعىس باستاۋ جاۋاپكەرشىلىگىن پرەزيدەنتتىڭ موينىنا جۇكتەگىسى كەلەدى دەپ مالىمدەدى.
«باسقا ءبىر ەلدىڭ باس شاھارىن بومبالاۋ جانە ونىڭ باسشىسىن قۇلاتۋ – بۇل سوعىس ارەكەتى», دەدى ول.
پحەنيان اقش-تىڭ ۆەنەسۋەلاداعى ارەكەتىنەن سەسكەنە مە؟