وبلىس ورتالىقتارى, شاعىن قالالار مەن ەلدى مەكەندەردە ورنالاسقان 124 ۆوكزال ءبىر ۋاقىتتا جاڭارتىلىپ جاتىر. كولىك مينيسترلىگىنىڭ مالىمەتىنشە, بۇل تىزىمدەگى ۆوكزالدار كەڭەس داۋىرىنە دەيىن نەمەسە كەڭەستىك كەزەڭدە سالىنىپ, 30–40 جىلدان بەرى كۇردەلى جوندەۋدەن وتپەگەن, دەپ جازادى Egemen.kz.
تەحنيكالىق تەكسەرۋ ناتيجەسىندە كەيبىر ۆوكزالدار اپاتتى جاعدايدا ەكەنى انىقتالعان. مۇنداي عيماراتتار بۇزىلىپ, ولاردىڭ ورنىنا زاماناۋي جاڭا ۆوكزال كەشەندەرىنىڭ قۇرىلىسى باستالعان.
«باعدارلاما اياسىندا ۆوكزال اۋماقتارى كەڭەيتىلىپ, ينجەنەرلىك جۇيەلەر جاڭارتىلادى. سونداي-اق عيماراتتاردىڭ قاسبەتتەرى مەن ىشكى كورىنىسى, كۇتۋ زالدارى مەن جولاۋشىلار پلاتفورمالارى جوندەلەدى. سانيتارلىق جاعداي مەن قاۋىپسىزدىك دەڭگەيى دە جاقسارتىلادى. جوبانى ىسكە اسىرۋ ۆوكزالداردىڭ وتكىزۋ قابىلەتىن ارتتىرىپ, كولىك قىزمەتىنىڭ ساپاسىن جاقسارتۋعا جانە مۇمكىندىگى شەكتەۋلى ازاماتتار ءۇشىن قولجەتىمدى ورتا قالىپتاستىرۋعا قولايلى جاعداي جاسايدى», دەلىنگەن كولىك مينيسترلىگى تاراتقان حابارلامادا.
جوندەۋ جۇمىستارىن «قازاقستان تەمىر جولى» ۇك» اق قاراجاتى ەسەبىنەن وبلىستىق اكىمدىكتەر تاڭداعان مەردىگەر ۇيىمدار جۇرگىزىپ جاتىر.
ۆوكزالداردى قايتا جاڭعىرتۋ اياقتالعاننان كەيىن جولاۋشىلار زاماناۋي كۇتۋ زالدارىن, جاڭارتىلعان اقپاراتتىق جانە ناۆيگاتسيالىق جۇيەلەردى پايدالانا الادى.
ايتا كەتەيىك, ەل اۋماعىندا قالىپتاسقان قولايسىز اۋا رايىنا بايلانىستى «جولاۋشىلار تاسىمالى» كومپانياسى قوسىمشا پويىزداردى ىسكە قوستى.