الماتى وبلىسىنا قاراستى قاراساي اۋدانىنىڭ يرگەلي اۋىلىنداعى لەۆ تولستوي اتىنداعى مەكتەپتە مۇعالىمدەردەن جاڭا جىلدىق بەزەندىرۋ مەن بالالارعا ارنالعان كوستيۋمدەرگە اقشا جينالعان. پەداگوگتاردىڭ ايتۋىنشا, بۇل ىسكە قاتىسۋدان باس تارتقاندارعا قىسىم كورسەتىلىپ, كەمسىتۋ بولعانى تۋرالى ۆيدەو تاراعان, دەپ حابارلايدى Egemen.kz.
الەۋمەتتىك جەلىلەردە ءبىر ايەلدىڭ اۋىل مەكتەبىنە كەلىپ, كامەرا الدىندا اقشا جيناۋدى باستاعان قىزمەتكەرلەرمەن داۋلاسىپ جاتقان ۆيدەوسى تاراعان. كادرلاردان ونىڭ مۇعالىمدەردەن مەرەكەلىك بەزەندىرۋ مەن كوستيۋمدەرگە ارقايسىسىنان 2 مىڭ تەڭگەدەن نە ءۇشىن جينالعانىن انىقتاۋعا تىرىسقانى بايقالادى.
«بيۋدجەتتەن بولىنەتىن اقشا قايدا؟ بىرەۋ 2 مىڭ تەڭگە بەرۋگە كەلىسپەسە, ول بالالاردىڭ يگىلىگى ءۇشىن ەشتەڭە جاساعىسى كەلمەيتىن ادام سياقتى بولىپ شىعادى. ماعان تەك وسى اقشانىڭ قايدا كەتكەنى قىزىق», دەپ تاڭعالادى ول.
الماتى وبلىسى قاراساي اۋداندىق ءبىلىم باسقارماسىنىڭ ءباسپاسوز قىزمەتى بۇل دەرەك بويىنشا تەكسەرۋ جۇرگىزىلگەنىن, الايدا اقشا جيناۋ فاكتىسى راستالماعانىن مالىمدەدى.
«تەكسەرۋ ناتيجەسىندە پەداگوگتەردەن نەمەسە وزگە قىزمەتكەرلەردەن ءماجبۇرلى تۇردە اقشا جيناۋ فاكتىلەرى انىقتالعان جوق. وقۋ كابينەتتەرىن بەزەندىرۋ باستاۋىش سىنىپ مۇعالىمدەرىنىڭ باستاماسى بولعان, اقشا جيناۋ جۇرگىزىلمەگەن. اتالعان ءىس-شارانى مەكتەپ اكىمشىلىگى ۇيىمداستىرماعان. قاراساي اۋداندىق ءبىلىم ءبولىمىنىڭ 2025 جىلعى 8 جەلتوقسانداعى №807 بۇيرىعىنا سايكەس, الدىن الا پەداگوگتەردەن اقشا جيناۋعا تىيىم سالىناتىنى جونىندە ءتۇسىندىرۋ جۇمىستارى جۇرگىزىلگەن. بۇل جاعداي مەكتەپتىڭ ادەپ كەڭەسىندە قارالىپ, قولدانىستاعى زاڭناما مەن پەداگوگيكالىق ادەپ تالاپتارىنا ساي ءتيىستى شەشىمدەر قابىلداندى. قازىرگى تاڭدا جاعداي باقىلاۋدا, ءتۇسىندىرۋ جۇمىستارى جالعاسىپ جاتىر. احۋال تۇراقتى», دەپ حابارلادى ۆەدومستۆو.
ەسكە سالايىق, بۇعان دەيىن ەلوردادا اتا-اناسىنىڭ قايتىس بولعانى جالعان اقپارات تاراتىپ, اقشا جيناعان ەر ادام ۇستالعان بولاتىن.
قوستانايدا مەكتەپ مۇعالىمى ارىپتەستەرىنىڭ اتىنا نەسيە راسىمدەگەن.