ادەبيەت سالاسى بويىنشا نوبەل سىيلىعىنىڭ لاۋرەاتى گراتسيا دەلەددا مەكتەپتە بار بولعانى ءتورت جىل عانا وقىعانىن بىلەسىز بە؟ ول ارتىنا ولشەۋسىز ەڭبەك قالدىرعان يتاليالىق قالامگەر, دەپ حابارلايدى Egemen.kz.
شەتەلدىكتەرمەن لاتىن تىلىندە سويلەسە الاتىن, ساۋاتتى ءدىني قىزمەتكەر بولعان اعاسى وعان ساۋات اشۋدان ءدارىس وقىعان. ونىڭ ۇستىنە سول داۋىردە قىز بالالار ءۇشىن كوپ وقۋدىڭ دا قاجەتى شامالى ەدى. ونىڭ العاشقى اڭگىمەسى نەبارى 13 جاسىندا جارىق كوردى. تالاي جىلعى تىنىمسىز ەڭبەگىنىڭ ارقاسىندا ول بىرنەشە رومان, اڭگىمەلەر, ادەبي ماقالالار, ساحنالىق پەسالار مەن ولەڭدەر جيناعىن وقىرمانعا ۇسىندى. ونىڭ العاشقى رومانى «ساردينيا گ ۇلى» 1892 جىلى جاريالاندى.
جازۋشىنىڭ كوپتەگەن شىعارمالارىندا وزبىرلىق كۇشتەر, مورالدىق تاڭداۋلار, قۇمارلىق پەن ادام السىزدىگى سياقتى تاقىرىپتار كورىنىس تابادى. گراتسيا دەلەددا ءوز شىعارمالارىن جازۋ بارىسىندا ساردينياداعى بالالىق شاعىنان, تەرەڭ تاريحي تامىرى بار كونە داستۇرلەردەن جانە وتباسى مۇشەلەرىنىڭ قايعىلى وقيعالارىنان اسەر العانى انىق.
1926 جىلى گراتسيا دەلەددا «يدەاليستىك رۋحتا جازىلعان تۋىندىلارى ارقىلى تۋعان دالاسىنىڭ ءومىرىن ايقىن بەينەلەپ, جالپىادامزاتتىق ماسەلەلەردى تەرەڭدىكپەن سۋرەتتەگەنى ءۇشىن» ادەبيەت سالاسىنداعى نوبەل سىيلىعىنا يە بولدى.