پاۆلوداردا قىلمىستىق-اتقارۋ جۇيەسىنىڭ لاۋازىمدى تۇلعاسى سوتتالۋشىنى ۇزاق ۋاقىت بوپسالاپ, ءىرى كولەمدە اقشا الىپ كەلگەنى اشكەرە بولدى. ال جازاسىن وتەۋشى ازامات تۇرمە باستىعىمەن كورشىلەس بولمەدە قالاعانىنشا تۇرىپ, ءتىپتى وزگە سوتتالۋشىلاردى قوناققا شاقىرعان.
وبلىستىق قىلمىستىق اتقارۋ جۇيەسى دەپارتامەنتىنىڭ اسا ماڭىزدى ىستەر جونىندەگى جەدەل توبىنىڭ اعا جەدەل ۋاكىلى ا.ادريشەۆ 2023–2025 جىلدارى ءوز قىزمەت بابىن پايدالانىپ, «№45 مەكەمە» رمم-دە جازاسىن وتەپ جاتقان ر.بەكسۇلتانوۆتى بوپسالاۋ ارقىلى قوماقتى كولەمدە پارا الىپ وتىرعان.
پاۆلودار قالاسىنىڭ قىلمىستىق ىستەر جونىندەگى اۋدانارالىق سوتىنىڭ 2025 جىلعى 2 قىركۇيەكتەگى شەشىمىندە ايتىلعانداي, سوتتالۋشى ر.بەكسۇلتانوۆ №45 تۇزەۋ مەكەمەسىندە جازاسىن وتەۋ ۋاقىتىندا پودپولكوۆنيك ا.ادريشەۆتىڭ قىرىنا ىلىككەن. 2023 جىلدىڭ باسىندا اعا جەدەل ۋاكىل تۇرمەگە كەلىپ تەكسەرىس جۇرگىزگەندە اتالعان سوتتالۋشىنىڭ جازانى وتەۋ رەجىمىن بۇزعانىن انىقتايدى. ودان سوڭ ر.بەكسۇلتانوۆتى شاقىرىپ الىپ, ونى قاتاڭداتىلعان رەجىمدەگى مەكەمەگە اۋىستىرامىن دەپ قورقىتادى. ءسوزىن «دالەلدى ەتىپ» كورسەتۋ ءۇشىن پودپولكوۆنيك ءتىپتى قۇجات جوباسىن قولدان جاساعان. «قىسقاسى باسقا مەكەمەگە اۋىسپايمىن دەسەڭ, تولەيسىڭ» دەگەن تالاپ قويادى.
«سوت كابينەتىندەگى» مالىمەتتەرگە سۇيەنسەك, 2024 جىلدىڭ شىلدە ايىندا ا.ادريشەۆ وبلىس ورتالىعىنداعى ساۋدا ۇيلەرىنىڭ بىرىنەن وزىنە جانە زايىبىنا جالپى سوماسى 165 مىڭ تەڭگە تۇراتىن كيىم پەن پارفيۋم («Creed Absolu Aventus» ءپارفيۋمى – 40 مىڭ تەڭگە, «Bulgari» ءپارفيۋمى – 40 مىڭ تەڭگە, «Dolce&Gabanna» برەندىنىڭ شالبارى – 50 مىڭ تەڭگە, «Armani Exchange» جەڭسىز جەيدەسى – 40 مىڭ تەڭگە) ساتىپ الىپ, ونىڭ اقشاسىن تاپ سول ساتتە تەلەفونمەن ۆيدەوقوڭىراۋ شالىپ تۇرىپ سوتتالۋشىعا (اۋدارىمدى ر.بەكسۇلتانوۆتىڭ ايەلى جاساعان) تولەتكەن.
– ا.ادريشەۆ جازاسىن وتەۋشىگە مورالدىق-پسيحولوگيالىق قىسىم جاساۋىن ودان ءارى ۇدەتە ءتۇسىپ, 2024 جىلدىڭ قىركۇيەك ايىندا وعان تاعى كەلەدى. پاۆلودار وبلىستىق قىلمىستىق-اتقارۋ جۇيەسى دەپارتامەنتىنىڭ سول كەزدەگى باستىعى م.ءاشىموۆتىڭ تۋعان كۇنى ەكەنىن ايتىپ, سوعان جينالۋ ءۇشىن 500 مىڭ تەڭگە كەرەك دەپ تالاپ ەتەدى. ءارى ونى ءموبيلدى اۋدارىم ارقىلى تۋىسىنىڭ ەسەپشوتىنا جىبەرۋدى ۇسىنعان, – دەپ باياندالادى سوت شەشىمىندە.
ءوزىنىڭ پودپولكوۆنيككە كىرىپتار بولىپ قالعانىن, باسقا امالىنىڭ جوقتىعىن تۇسىنگەن ر.بەكسۇلتانوۆ كەلەسى كۇنى ءوز ايەلىنە حابارلاسۋ ارقىلى كورسەتىلگەن نومىرگە 400 مىڭ تەڭگە, ال تاعى ءبىر سوتتالۋشىنىڭ ايەلى ارقىلى 100 مىڭ تەڭگە جونەلتكەن. سوتتا ا.ادريشەۆ بۇل اقشانى كەيىن م.اشىموۆكە سىيلىق رەتىندە جىبەرگەنىن, ونى سوتتالۋشى ءوز ەركىمەن بەردى دەپ ايتىپ اقتالعان.
ول ول ما, 2024 جىلدىڭ اقپان-شىلدە ارالىعىندا اتالعان سوتتالۋشى ا.ادريشەۆكە 200 مىڭ تەڭگەدەن 1 ملن تەڭگەگە دەيىنگى سومادا اقشا بەرىپ وتىرعان. بۇل قاراجاتتاردى پودپولكوۆنيك كەلگەن كوميسسياعا داستارقان جايۋعا جانە م.ءاشىموۆتىڭ قاجەتتىلىگى ءۇشىن جۇمسادىم دەپ جاۋاپ بەرگەن. الايدا ول اقشانىڭ قاي كەزەڭدەردە الىنعانىن جانە سومالارىن بىلمەيتىنىن ايتقان.
سوتتالۋشى ر.بەكسۇلتانوۆ تۇراقتى پارا بەرىپ تۇرۋدىڭ ارقاسىندا مەكەمەدە جامان كۇنەلتپەگەن. ول ءتىپتى ءبىراز ۋاقىت مەكەمە باستىعى وتىراتىن بولمەنىڭ ءدال جانىندا ورنالاسقان جەكە بولمەدە تۇرىپ, وزگە سوتتالۋشىلاردى ەمىن-ەركىن قوناققا شاقىرىپ وتىرعان.
– ر.بەكسۇلتانوۆتىڭ 2025 جىلعى 9 قاڭتارداعى سوتقا دەيىنگى تەرگەۋ بارىسىندا كورسەتكەن مالىمەتتەرى بويىنشا, سوتتالۋشى 2022 جىلدان باستاپ 2024 جىلدى قوسا العانداعى كەزەڭدە مەكەمە باستىعى ك.كويچۋباەۆتىڭ رۇقساتىمەن جەدەل ءبولىم باستىعىنىڭ بولمەسىندە تۇرعان. سونىمەن قاتار كويچۋباەۆتىڭ رۇقساتى بويىنشا كىر جۋاتىن بولمەنى مەكەن ەتىپ, بوس ۋاقىتىندا مەكەمەنىڭ سپورت زالىندا جاتتىعىپ, مونشاعا بارىپ, اكىمشىلىك كورپۋسىنىڭ اسحاناسىندا داستارقان جايىپ كەز كەلگەن سوتتالۋشىنى وزىنە قوناققا شاقىرا العان, – دەپ جازىلعان سوت كابينەتىندە.
سوت وڭىرلىك قىلمىستىق-اتقارۋ جۇيەسىنىڭ بۇرىنعى قىزمەتكەرى ا.ادريشەۆتى بوپسالاۋ جولىمەن سوتتالۋشىدان پارا الىپ تۇرعانى ءۇشىن كىنالى دەپ تانىپ, ونى 7 جىلعا باس بوستاندىعىنان ايىردى. سونداي-اق سوت شەشىمىمەن «ادىلەت پولكوۆنيگى» شەنىنەن ايرىلىپ, ءومىر بويىنا مەملەكەكەتتىك قىزمەتپەن اينالىسا المايدى.
پاۆلودار وبلىسى