بورودۋليحا اۋدانى – ورماندى القاپ پەن قۇنارلى ەگىستىككە سۇيەنگەن ءوڭىر. ولار اۋىل شارۋاشىلىعىن دامىتىپ قانا قويماي, ەكولوگيالىق تەپە-تەڭدىكتى ساقتاۋدا دا ەرەكشە ءرول اتقارادى. جاقىندا اۋداندا ءبىر كۇندە ەكى بىردەي الەۋمەتتىك ماڭىزى بار نىسان ەل يگىلىگىنە بەرىلىپ, جەرگىلىكتى تۇرعىنداردى قۋانىشقا كەنەلتتى.
«اۋىل – ەل بەسىگى» باعدارلاماسى اياسىندا كامىشەنكا ەلدى مەكەنىندە اۋىلدىق كلۋب اشىلدى. كامىشەنكا اۋىلى – تىرەك ەلدى مەكەن, مۇندا بۇگىندە 957 ادام تۇرادى. جاڭا كلۋب اۋىل تۇرعىندارىنىڭ ماڭىزدى مادەني-الەۋمەتتىك ورتالىعىنا اينالىپ, 8 ادام تۇراقتى جۇمىسپەن قامتىلادى. بالالار مەن جاسوسپىرىمدەرگە ارنالعان شاحمات, دويبى, توعىزقۇمالاق, دومبىرا, ساز اسپاپتارىندا ويناۋدى ۇيرەتەتىن ۇيىرمەلەر جۇمىسىن باستايدى. اشىلۋ سالتاناتىنا ارنايى قاتىسقان وبلىس اكىمى بەرىك ءۋالي:
«بۇل اۋىلدا سوڭعى رەت 1985 جىلى جاڭا عيمارات رەتىندە مەكتەپ سالىنعان ەكەن. سودان بەرى بوي كوتەرگەن عيمارات وسى. بۇل جەردە جاقسى شارالار, كونتسەرت, كەزدەسۋلەر كوپتەپ ۇيىمداستىرىلاتىنىنا سەنەمىز. عيمارات قۇرىلىسى ساپالى جۇرگىزىلگەن ەكەن, قۇتتى بولسىن», دەي كەلىپ, نىسانعا جاڭا مۋزىكالىق اپپاراتتىڭ سەرتيفيكاتىن تابىس ەتتى.
اۋداندا جالپى 33 مادەنيەت مەكەمەسى, اتاپ ايتقاندا, ءبىر اۋداندىق, التى اۋىلدىق مادەنيەت ءۇيى, ءتورت اۋىلدىق كلۋب, ءبىر اۋداندىق, جيىرما ءبىر اۋىلدىق كىتاپحانا بار.
سونداي-اق اۋداننىڭ پەتروپاۆلوۆكا اۋىلىندا سپورتتىق ساۋىقتىرۋ ورتالىعى اشىلدى. پەتروپاۆلوۆكا سەمەي قالاسىنان 37 شاقىرىم جەردە ورنالاسقان. ەلدى مەكەندە قازىردە 883 ادام تۇرادى. مۇندا دا 2000 جىلدان بەرى مادەنيەت پەن سپورتقا ارنالعان مەكەمە بولماعان ەكەن.
«نىسان قۇرىلىسى 2024 جىلى باستالىپ, بيىل اياقتالدى. عيماراتتىڭ جالپى اۋدانى – 864 شارشى مەتر. ءبىر ۋاقىتتا 300 ادامدى قابىلداي الادى. ورتالىقتىڭ اشىلۋى ەلدى مەكەن تۇرعىندارى بوس ۋاقىتىن ءتيىمدى ءارى پايدالى وتكىزۋگە مۇمكىندىك بەرەدى. مۇندا مادەني, رۋحاني, سپورتتىق باعىتتارداعى ءتۇرلى ۇيىرمەلەر اشۋ جوسپارلانىپ وتىر. اتاپ ايتقاندا, دومبىرا, فورتەپيانو, گيتارا ۇيرەتەتىن مۋزىكالىق ۇيىرمەلەر, سۋرەت سالۋعا ارنالعان ساباقتار ۇيىمداستىرىلادى. سونىمەن قاتار تەاتر ۇيىرمەسى جۇمىس ىستەپ, تۇرعىنداردىڭ شىعارماشىلىق قابىلەتىن دامىتادى. اقپاراتتىق تەحنولوگيالار سالاسىنا قىزىعۋشىلىق تانىتاتىندارعا IT ۇيىرمەسى جۇمىس ىستەيدى. بۇدان بولەك, زياتكەرلىك دامۋعا باعىتتالعان دويبى, شاحمات, توعىزقۇمالاق ۇيىرمەلەرىن, سونداي-اق ۆولەيبول, باسكەتبول, فۋتبول, فيتنەس, باسقا دا سپورت تۇرلەرىنەن سەكتسيالار ۇيىمداستىرۋ كوزدەلگەن», دەيدى ورتالىق قىزمەتكەرلەرى.
رەسمي دەرەكتەرگە سۇيەنسەك, اۋداندا 65 سپورت نىسانى مەن 33 سپورت زالى, سونداي-اق بورودۋليحا بالالار-جاسوسپىرىمدەر سپورت مەكتەبىندە سپورت كەشەنى مەن ستاديون بار. سپورتتىڭ 35 تۇرىنەن 414 سەكتسيا تۇراقتى جۇمىس ىستەيدى. دەنەشىنىقتىرۋمەن, سپورتپەن جۇيەلى تۇردە شۇعىلداناتىن بارلىق جاستاعى تۇرعىندار سانى 13 014 ادامدى قۇرايدى.
اباي وبلىسى,
بورودۋليحا اۋدانى