ولجاس بەكتەنوۆ ەكونوميكالىق ساياسات جونىندەگى كەڭەستىڭ وتىرىسىن وتكىزدى. بۇل تۋرالى ۇكىمەتتىڭ ءباسپاسوز قىزمەتى حابارلادى.
مەملەكەت باسشىسى قاسىم-جومارت توقاەۆتىڭ تاپسىرمالارىن ورىنداۋ اياسىندا ەكونوميكانىڭ ءوسۋىن قامتاماسىز ەتۋ جانە حالىقتىڭ ءال-اۋقاتىن جاقسارتۋ بويىنشا جۇرگىزىلىپ جاتقان جۇمىستار قارالدى.
وتىرىسقا ۇلتتىق بانك توراعاسى تيمۋر سۇلەيمەنوۆ, پرەمەر-ءمينيستردىڭ ورىنباسارى — ۇلتتىق ەكونوميكا ءمينيسترى سەرىك جۇمانعارين, پرەمەر-ءمينيستردىڭ ورىنباسارى قانات بوزىمباەۆ, پرەمەر-ءمينيستردىڭ ورىنباسارى — جاساندى ينتەللەكت جانە تسيفرلىق دامۋ ءمينيسترى جاسلان ماديەۆ, پرەزيدەنت اكىمشىلىگى باسشىسىنىڭ ورىنباسارى ەربولات دوساەۆ, قارجى, ونەركاسىپ جانە قۇرىلىس مينيسترلىكتەرىنىڭ, قارجى نارىعىن رەتتەۋ جانە دامىتۋ, ستراتەگيالىق جوسپارلاۋ جانە رەفورمالار اگەنتتىكتەرىنىڭ باسشىلىعى جانە تاعى باسقالار قاتىستى.
2025 جىلعى 11 ايدىڭ قورىتىندىسى بويىنشا ەل ەكونوميكاسىنىڭ ءوسۋى 6,4%-دى قۇرادى. ماكروەكونوميكالىق تۇراقتىلىقتى قامتاماسىز ەتۋ جانە حالىقتىڭ تابىسىن ارتتىرۋ ماقساتىندا پرەزيدەنت تاپسىرماسى بويىنشا ازىرلەنگەن ۇكىمەتتىڭ, ۇلتتىق بانكتىڭ جانە قارجى نارىعىن رەتتەۋ جانە دامىتۋ اگەنتتىگىنىڭ 2026-2028 جىلدارعا ارنالعان حالىقتىڭ ءال-اۋقاتىن تۇراقتاندىرۋ جانە ارتتىرۋ جونىندەگى بىرلەسكەن ءىس-قيمىل باعدارلاماسى جۇزەگە اسىرىلىپ جاتىر. جۇرگىزىلىپ جاتقان بيۋدجەتتىك-سالىقتىق رەفورمالار فيسكالدىق ساياساتتى جاڭعىرتۋعا جانە بيزنەس ءۇشىن اكىمشىلىك كەدەرگىلەردى كەشەندى تۇردە تومەندەتۋگە باعىتتالعان.
سونداي-اق جيىندا 2026 جىلدىڭ نەگىزگى سىرتقى جانە ىشكى سىن-قاتەرلەرى قارالدى, جاھاندىق ەكونوميكاداعى ءوسىمنىڭ باياۋلاۋى تۋرالى بولجامدار بار ترەندتەر ۇسىنىلدى. كەڭەس مۇشەلەرى ەكونوميكانىڭ تۇراقتى ءوسۋىن قامتاماسىز ەتۋ, ءونىمدى جۇمىس ورىندارىن قۇرۋ جانە مەدياندىق جالاقى مولشەرىن ارتتىرۋ بويىنشا الداعى شارالاردى تالقىلادى. نارىقتى وتاندىق تاۋارلارمەن تولىقتىرۋعا باعىتتالعان يمپورتتى الماستىرۋ بويىنشا جۇرگىزىلىپ جاتقان جۇمىستار, ونىڭ ىشىندە «ينۆەستيتسياعا تاپسىرىس» باعدارلاماسى حالىقتىڭ تابىسىن قولداۋعا ىقپال ەتپەك.
قازاقستاندىق ونىمدەردىڭ ساپاسىن جاقسارتۋ جانە زاماناۋي تەحنولوگيالاردى ەنگىزۋ ارقىلى باسەكەگە قابىلەتتىلىگىن ارتتىرۋدىڭ ماڭىزدىلىعى اتاپ ءوتىلدى. بۇگىنگى تاڭدا قازاقستان ەكونوميكاسى الەمدىك نارىقتارعا دايىن ءونىم ەكسپورتىن ۇلعايتا وتىرىپ, شيكىزات ەكسپورتىنان جوسپارلى تۇردە باس تارتىپ جاتىر, بۇل ءوز كەزەگىندە ارتاراپتاندىرىلعان قۇرىلىمنىڭ قالىپتاسقانىن ايعاقتايدى.
سونداي-اق ينفراقۇرىلىمدىق جوبالاردى جۇزەگە اسىرۋداعى جەكە ينۆەستيتسيالاردىڭ ۇلەسىن ارتتىرۋعا نازار اۋدارىلدى. ەكونوميكانىڭ ناقتى سەكتورىن قارجىلاندىرۋداعى ەكىنشى دەڭگەيلى بانكتەردىڭ ءرولىن ارتتىرۋ جانە شەتەلدىك ينۆەستيتسيالاردى مۋلتيپليكاتيۆتىك اسەرى بار ءىرى جوبالارعا باعدارلاۋ قاجەتتىگى اتاپ ءوتىلدى. پرەمەر-مينيستر ينفلياتسيا دەڭگەيىن تومەندەتۋ مىندەتىنە باسىمدىق بەرىلەتىنىن اتاپ ءوتتى. بۇل جەردە ماسەلە ازىق-ت ۇلىك جانە ازىق-ت ۇلىك ەمەس تاۋارلاردىڭ, قىزمەتتەر باعاسىنىڭ تۇراقتى تومەندەۋى تۋرالى بولىپ وتىر.
— كۇردەلى سىرتقى كونيۋنكتۋراعا قاراماستان, ەلىمىزدىڭ ەكونوميكاسى دامۋ ۇستىندە. قۇرىلىمدارى بويىنشا قاراساق, وڭدەۋ, قۇرىلىس, ساۋدا جانە كولىك سالاسى ءوسىپ جاتىر. ياعني, ءوسىم تەڭ جاعدايدا ءجۇرىپ جاتىر. ءبىز ينفلياتسيا بويىنشا تومەندەۋ ءۇردىسىن كورىپ وتىرمىز. باعىتىمىز — ينفلياتسيانى تومەندەتۋ بويىنشا الدىمىزعا قويىلعان مىندەتتەردى ساپالى ورىنداۋ, — دەپ اتاپ ءوتتى ولجاس بەكتەنوۆ.
وتىرىس قورىتىندىسى بويىنشا ۇلتتىق ەكونوميكا مينيسترلىگىنە ۇلتتىق بانكپەن, ستراتەگيالىق جوسپارلاۋ جانە رەفورمالار, قارجى نارىعىن رەتتەۋ جانە دامىتۋ اگەنتتىكتەرىمەن بىرلەسىپ, ەكونوميكالىق احۋالعا مونيتورينگ جۇرگىزۋ جانە ىقتيمال تاۋەكەلدەردىڭ الدىن الۋ جونىندە كەلىسىلگەن ءىس-قيمىلداردى جەدەل جۇزەگە اسىرۋ تاپسىرىلدى.