قاسىم-جومارت توقاەۆ ەل دامۋىنىڭ قازىرگى كەزەڭىنە توقتالىپ, مەملەكەتتىك اپپاراتتىڭ بارلىق دەڭگەيىنە ناقتى تالاپ قويدى, دەپ جازادى Egemen.kz.
پرەزيدەنتتىڭ ايتۋىنشا, بۇگىندە بۇكىل الەم كۇردەلى كەزەڭدى باستان وتكەرىپ جاتقانىمەن, قازاقستان تۇراقتى دامۋ قارقىنىن ساقتاپ وتىر.
«قازىر بۇكىل الەم كۇردەلى كەزەڭدى باستان وتكەرىپ جاتىر. سوعان قاراماستان ەلىمىز جاقسى قارقىنمەن دامىپ كەلەدى», دەدى مەملەكەت باسشىسى.
ول وڭدەۋ ونەركاسىبى, قۇرىلىس جانە كولىك-لوگيستيكا سالالارى ەكونوميكانىڭ نەگىزگى قوزعاۋشى كۇشىنە اينالعانىن اتاپ ءوتتى.
«وڭدەۋ ونەركاسىبى, قۇرىلىس, كولىك-لوگيستيكا سالالارى دامۋدىڭ قوزعاۋشى كۇشىنە اينالدى», دەدى پرەزيدەنت.
قاسىم-جومارت توقاەۆتىڭ مالىمدەۋىنشە, جىل قورىتىندىسى بويىنشا ەل ەكونوميكاسىنىڭ ءوسىمى 6 پايىز دەڭگەيىندە بولادى دەپ بولجانىپ وتىر. ال جان باسىنا شاققانداعى ىشكى جالپى ءونىم 15 مىڭ دوللاردان اسادى.
«جىل قورىتىندىسى بويىنشا ەكونوميكامىز 6 پايىزعا وسەدى دەپ بولجانىپ وتىر. ال جان باسىنا شاققاندا ىشكى جالپى ءونىم 15 مىڭ دوللاردان اسادى. جۇيەلى تۇردە جۇرگىزىلىپ جاتقان اۋقىمدى جۇمىس ءوز ناتيجەسىن بەرۋدە», دەدى ول.
پرەزيدەنت قازىرگى كەزەڭدى ەل ومىرىندەگى بەتبۇرىس ءسات دەپ باعالادى.
ء«بىز قازىر ەل ومىرىندەگى تاعدىرشەشتى رەفورمالار كەزەڭىنە قادام باستىق», دەدى مەملەكەت باسشىسى.
ونىڭ ايتۋىنشا, بۇل وزگەرىستەردىڭ ماڭىزىن مەملەكەتتىك اپپاراتتىڭ بارلىق بۋىنى, ءبىرىنشى باسشىدان باستاپ قاراپايىم قىزمەتكەرگە دەيىن, تەرەڭ ءتۇسىنۋى قاجەت.
«بۇكىل مەملەكەتتىك اپپارات, ءبىرىنشى باسشىدان قاراپايىم قىزمەتكەرگە دەيىن مۇنى تەرەڭ ءتۇسىنۋى كەرەك. بۇرىن-سوڭدى بولماعان ماڭىزدى مىندەتتەردى جۇزەگە اسىرۋ ءۇشىن جوعارى قارقىن مەن باستاماشىلىق تانىتۋ قاجەت», دەدى پرەزيدەنت.
قاسىم-جومارت توقاەۆ باتىل, ءداستۇرلى شەڭبەردەن شىعاتىن, بىراق اقىلعا قونىمدى شەشىمدەر قابىلداۋدىڭ ماڭىزىن اتاپ ءوتتى.
«باتىل, شەڭبەرگە سىيمايتىن, بىراق اقىلعا قونىمدى شەشىمدەر قابىلداعان ءجون», دەدى ول.
سونداي-اق مەملەكەت باسشىسى مەملەكەتتىك قىزمەتتە جاۋاپسىزدىق پەن جالقاۋلىققا جول بەرىلمەيتىنىن قاداپ ايتتى.
«مەملەكەتتىك قىزمەتتە جالقاۋلىققا, جۇمىسقا جاۋاپسىز قاراۋعا ورىن جوق», دەدى پرەزيدەنت.
ول حالىققا فورمالدى ەسەپ ەمەس, ناقتى ناتيجە قاجەت ەكەنىن باسا ايتتى.
«حالىققا ادەمى ەسەپ ەمەس, ناقتى ءىس كەرەك. سوندىقتان بارلىق باسشى مەن لاۋازىمدى تۇلعادان ەلگە پايداسى بار جۇمىس تالاپ ەتەمىن», دەدى قاسىم-جومارت توقاەۆ.
پرەزيدەنت ءسوزىن الدا اتقارىلاتىن مىندەتتەردىڭ اۋقىمى كەڭ ەكەنىن اتاپ وتۋمەن تۇيىندەدى.
«الدىمىزدا اتقاراتىن مىندەت كوپ», دەدى مەملەكەت باسشىسى.